(តាលីន)៖ ប្រធានទីភ្នាក់ងារស៊េីបការណ៍សម្ងាត់របស់ប្រទេសអេស្តូនី លោក Kaupo Rosin បាននិយាយថា អង្គការណាតូនឹងនៅតែត្រូវទប់ស្កាត់រុស្ស៉ី សម្រាប់រយៈពេល ២០ឆ្នាំទៅមុខទៀត ខណៈអេស្តូនីបានបង្កើនការចំណាយទ្វេដងលើវិស័យការពារជាតិ ចាប់តាំងពីសង្រ្គាមនៅអ៊ុយក្រែនផ្ទុះឡេីង។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី២០ ខែធ្នូ ឆ្នាំ ២០២៤។
តាមការបញ្ជាក់របស់ លោក Rosin មកកាន់ Reuters «ភារកិច្ចសម្រាប់ណាតូពី ១០ឆ្នាំទៅ២០ឆ្នាំខាងមុខទៀត នោះគឺទប់ស្កាត់ ឬរារាំងរុស្ស៉ី ដូច្នេះទេីបមិនមានគំនិតឆោតល្ងង់ណាមួយរុញច្រានដោយយោធា ឆ្ពោះមករកលោកខាងលិច។ ខ្ញុំគិតថាអាចធ្វើបាន ប៉ុន្តែបញ្ហាត្រូវតែយកចិត្តទុកដាក់យ៉ាងខ្លាំងក្នុងប្រទេសលោកខាងលិច ហើយយើងត្រូវវិនិយោគក្នុងវិស័យការពារជាតិ»។ តាមលោក Rosin ផែនការរបស់អង្គការណាតូ និងយោធាជាតិត្រូវតែអាចទុកចិត្តបាន និងមានធនធានពិតប្រាកដ ទាក់ទងនឹងចំនួនកងទ័ព គ្រាប់រំសេវ និងការតាមដានលើអង្គភាពជាដេីម។
គួរបញ្ជាក់ថា រុស្ស៉ីបានបដិសេធម្តងហើយម្តងទៀតពីគំនិតវាយប្រហារលើប្រទេសណាតូណាមួួយ តែរដ្ឋមន្ត្រីការពារជាតិរបស់ខ្លួនបាននិយាយនៅសប្តាហ៍នេះថា មូស្គូត្រូវតែត្រៀមជាស្រេចដើម្បីប្រយុទ្ធប្រឆាំងនឹងបក្សសម្ព័ន្ធយោធាណាតូនៅអឺរ៉ុប ក្នុងទសវត្សរ៍ក្រោយ។ អេស្តូនីដែលមានព្រំប្រទល់ជាប់រុស្ស៉ី និងជាសមាជិកអង្គការណាតូ ផងនោះបាននិងកំពុងវិនិយោគលេីវិស័យការពារឱ្យដល់៣.៤ភាគរយនៃផលិតផលក្នុងស្រុកសរុបនៅឆ្នាំនេះ ដែលជាចំនួនធំបំផុតទីពីរនៅក្នុងអង្គការណាតូ៕
