(បាងកក)៖ ប្រទេសថៃ ដែលជាប្រធានប្តូរវេននៃអាស៊ាន នៅថ្ងៃសុក្រនេះ បានប្រាប់របបយោធាមីយ៉ាន់ម៉ាថា សមាជិកអាស៊ានចង់ឃើញការបោះឆ្នោតដែលរួមបញ្ចូលគ្រប់ភាគីពាក់ព័ន្ធទាំងអស់ នៅក្នុងការបោះឆ្នោតដែលគ្រោងនឹងធ្វើឡើងនៅឆ្នាំក្រោយ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី២០ ខែធ្នូ ឆ្នាំ២០២៤។
រដ្ឋមន្ត្រីការបរទេសថៃ លោក Maris Sangiampongsa បាននិយាយនៅក្នុងបទសម្ភាសន៍មួយនៅទីក្រុងបាងកក បន្ទាប់ពីកិច្ចប្រជុំជាមួយសមភាគី និងអ្នកការទូតជាន់ខ្ពស់នៃសមាគមប្រជាជាតិអាស៊ីអាគ្នេយ៍ (អាស៊ាន) ថា «ប្រសិនបើមានការបោះឆ្នោត អាស៊ាននឹងចង់បានដំណើរការមួយ ដែលរួមបញ្ចូលភាគីពាក់ព័ន្ធទាំងអស់»។
ប្រទេសថៃក្នុងសប្តាហ៍នេះ បានធ្វើជាម្ចាស់ផ្ទះនៃកិច្ចប្រជុំថ្នាក់តំបន់ពីរដាច់ដោយឡែកពីគ្នាស្តីពីវិបត្តិក្នុងប្រទេសមីយ៉ាន់ម៉ា ដែលទីមួយមានការចូលរួមពីរបបយោធា និងប្រទេសជិតខាងរបស់ខ្លួនរួមមានប្រទេសចិន បង់ក្លាដែស និងឥណ្ឌា បន្ទាប់មកមួយទៀតជាសមាជិកអាស៊ាន។
រដ្ឋមន្ត្រីការបរទេសមីយ៉ាន់ម៉ា បានពន្យល់ដល់អ្នកចូលរួមកិច្ចប្រជុំទីមួយ អំពីផែនទីបង្ហាញផ្លូវនយោបាយរបស់របបយោធា និងការរៀបចំការបោះឆ្នោត។ ប៉ុន្តែ អ្នករិះគន់បានច្រានចោលការបោះឆ្នោតនេះថា ជារឿងអាម៉ាស់ ដោយសារអវត្តមានរបស់ក្រុមប្រឆាំង។
មន្ត្រីក្រសួងការបរទេសថៃម្នាក់ទៀតគឺលោក Bolbongse Vangphaen បាននិយាយថា ការបោះឆ្នោតមីយ៉ាន់ម៉ាក៏ជាប្រធានបទនៃការពិភាក្សាក្នុងចំណោមសមាជិកអាស៊ានកាលពីថ្ងៃសុក្រ។ អាស៊ានកំពុងរង់ចាំព័ត៌មានលម្អិតបន្ថែមពីមីយ៉ាន់ម៉ា ហើយនឹងត្រូវស្វែងរកជំហររួមមួយលើការបោះឆ្នោតនេះ៕
