(បេរូត)៖ កាលពីថ្ងៃព្រហស្បតិ៍សប្តាហ៍នេះ លីបង់ បានបង្ហាញនូវការទន្ទឹងរង់ចាំ ក្នុងការធ្វើជាអ្នកជិតខាងដ៏ល្អជាមួយស៉ីរី ក្រោយការដួលរលំនៃរបបលោក Bashar al-Assad ដោយជាការបើកផ្លូវទៅកាន់យុគសម័យថ្មីមួយនៃទំនាក់ទំនង ដែលធ្លាប់ជួបប្រទះនូវភាពចលាចលញឹកញាប់ រវាងប្រទេសជិតខាងទាំងពីរ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី២៧ ខែធ្នូ ឆ្នាំ ២០២៤។
ទំនាក់ទំនងរវាងទីក្រុងដាម៉ាស និងទីក្រុងបេរូត តែងតែមានភាពតានតឹង ចាប់តាំងពីប្រទេសទាំងពីរក្លាយជារដ្ឋឯករាជ្យរៀងៗខ្លួន ក្នុងទសវត្សរ៍ឆ្នាំ ១៩៤០។ ក្រុមហេសបូឡាគាំទ្រដោយអ៉ីរ៉ង់នៅលីបង់ ដើរតួនាទីសំខាន់ណាស់ក្នុងការជួយដល់របបលោក Assad អំឡុងពេលនៃសង្គ្រាមស៉ីវិលស៉ីរី ប្រយុទ្ធប្រឆាំងនឹងក្រុមបះបោរ ដែលថ្មីៗនេះបានផ្តួលរំលំរបបរបស់លោក ហើយតែងតាំងរដ្ឋបាលថ្មី។
ក្រសួងការបរទេសលីបង់ បានឱ្យដឹងថា លោករដ្ឋមន្រ្តីការបរទេស Abdallah Bou Habib បានបញ្ជូនសារដំបូងបង្អស់នេះ របស់ទីក្រុងបេរូត ទៅកាន់រដ្ឋបាលថ្មីនៅទីក្រុងដាម៉ាស ទៅកាន់សមភាគីស៉ីរី លោក Asaad Hassan al-Shibani នៅក្នុងកិច្ចសន្ទនាមួយ តាមទូរស័ព្ទ៕
