(មូស្គូ)៖ ប្រធានាធិបតី លោក វ្ល៉ាឌីមៀ ពូទីន បាននិយាយថា រុស្ស៉ីបើកចំហរចំពោះសំណើរបស់ប្រទេសស្លូវ៉ាគី ក្នុងការធ្វើជាម្ចាស់ផ្ទះកិច្ចចរចាសន្តិភាពជាមួយអ៊ុយក្រែន ដើម្បីបិទបញ្ចប់ជម្លោះ ដែលរុស្ស៉ីក៏ចង់ឱ្យឈានដល់ការបញ្ចប់ដែរ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី២៧ ខែធ្នូ ឆ្នាំ ២០២៤។
លោក ពូទីន ដែលបានទទួលស្វាគមន៍នាយករដ្ឋមន្រ្តីស្លូវ៉ាគី លោក Robert Fico នៅវិមានក្រឹមឡាំងក្នុងសប្តាហ៍នេះ បាននិយាយថា លោក Fico មានបំណងឱ្យប្រទេសរបស់លោក ធ្វើជាម្ចាស់ផ្ទះនៃកិច្ចចរចារវាងរុស្ស៉ី និងអ៊ុយក្រែន។ លោក ពូទីន គូសបញ្ជាក់ថា «យើងមិនជំទាស់ទេ ប្រសិនបើវាកើតឡើងមែន។ មានអ្វីដែលមិនអាច បើស្លូវ៉ាគីប្រកាន់ជំហរអព្យាក្រឹតបែបនេះ»។
ស្លូវ៉ាគី ត្រូវបានគេមើលឃើញថាជារដ្ឋសមាជិកសហភាពអឺរ៉ុប ប៉ែកកណ្តាល និងខាងកើតដែលស្ទាក់ស្ទើរក្នុងការគាំទ្រអ៊ុយក្រែន ហើយគាំទ្រការចរចាជាមួយរុស្ស៉ី។ លោក ហ្សេលេនស្គី ប្រធានាធិបតីអ៊ុយក្រែន បានរិះគន់ម្តងហើយម្តងទៀត ចំពោះស្លូវ៉ាគីដែលជាអ្នកជិតខាងរបស់ខ្លួន ជុំវិញទំនាក់ទំនងដែល លោក Fico មានចំពោះរុស្ស៉ី ចាប់តាំងពីឡើងកាន់អំណាចក្រោយការបោះឆ្នោតឆ្នាំ ២០២៣៕
