(វ៉ារស្សាវ៉ា)៖ នាយករដ្ឋមន្ត្រីប៉ូឡូញ លោក Donald Tusk បានបញ្ជាក់យ៉ាងច្បាស់នៅថ្ងៃចន្ទនេះថា ប្រទេសប៉ូឡូញនឹងមិនបញ្ជូនទាហានទៅកាន់អ៊ុយក្រែនឡើយ។ ការបញ្ជាក់នេះធ្វើឡើងមុនពេលលោកធ្វើដំណើរទៅកាន់កិច្ចប្រជុំកំពូលបន្ទាន់មួយនៅទីក្រុងប៉ារីស ដែលផ្តោតលើតួនាទីរបស់អឺរ៉ុបក្នុងបទឈប់បាញ់ដែលអាចកើតមាន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។
ការប្រកាសនេះ កើតឡើងក្រោយពេលនាយករដ្ឋមន្ត្រីអង់គ្លេស លោក Keir Starmer បានក្លាយជាមេដឹកនាំអឺរ៉ុបដំបូងគេដែលបង្ហាញពីការត្រៀមខ្លួន ក្នុងការដាក់ពង្រាយកងកម្លាំងរក្សាសន្តិភាពនៅក្នុងប្រទេសអ៊ុយក្រែន។
លោក Tusk បានថ្លែងទៅកាន់អ្នកយកព័ត៌មានមុនពេលចាកចេញទៅកាន់ទីក្រុងប៉ារីសថា «ប៉ូឡូញនឹងគាំទ្រអ៊ុយក្រែន «ប៉ូឡូញនឹងបន្តគាំទ្រអ៊ុយក្រែន ក្នុងក្របខ័ណ្ឌនៃសមត្ថភាពហិរញ្ញវត្ថុរបស់យើង ទាំងជំនួយមនុស្សធម៌ និងយោធា»។ ទោះយ៉ាងណា លោកបានអះអាងយ៉ាងច្បាស់ថា «យើងគ្មានផែនការបញ្ជូនកងទ័ពប៉ូឡូញទៅកាន់អ៊ុយក្រែននោះទេ»៕
