(ម៉ូស្គូ)៖ រុស្ស៊ីបាននិយាយនៅថ្ងៃអង្គារថា ខ្លួនមានឆន្ទៈធ្វើកិច្ចព្រមព្រៀងថ្មីស្តីពីសុវត្ថិភាពនៃការដឹកជញ្ជូននៅសមុទ្រខ្មៅ ដែលជាជំហានមួយអាចនាំទៅរកបទឈប់បាញ់ជាមួយអ៊ុយក្រែន ប៉ុន្តែលុះត្រាតែសហរដ្ឋអាមេរិកបានបញ្ជាឲ្យប្រធានាធិបតី Volodymyr Zelenskiy គោរពតាមកិច្ចព្រមព្រៀងនោះ។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters។
រដ្ឋមន្ត្រីការបរទេសរុស្ស៊ី លោក Sergei Lavrov បានថ្លែងថា មានតែការបញ្ជាបែបនេះទេដែលនឹងផ្តល់ការធានាដែលរុស្ស៊ីត្រូវការ។
ភាគីនីមួយៗបានរិះគន់ភាគីម្ខាងទៀត អំពីការដួលរលំកិច្ចព្រមព្រៀងនៅឆ្នាំ ២០២៣ ដែលមានបំណងធានាសុវត្ថិភាពនៃការដឹកជញ្ជូនទំនិញនៅសមុទ្រខ្មៅ បន្ទាប់ពីរុស្ស៊ីបានបញ្ជូនទាហានរាប់ម៉ឺននាក់ ទៅកាន់អ៊ុយក្រែនក្នុងខែកុម្ភៈ ឆ្នាំ ២០២២។
លោក Lavrov បានថ្លែងតាមទូរទស្សន៍ថា «យើងត្រូវការការធានាច្បាស់លាស់។ ដោយសារបទពិសោធន៍ដ៏ជូរចត់ជាមួយកិច្ចព្រមព្រៀងក្រុងកៀវ ការធានាពិតប្រាកដគឺមានតែបញ្ជាពីទីក្រុងវ៉ាស៊ីនតោនទៅកាន់ Zelenskiy និងក្រុមរបស់គាត់ឲ្យធ្វើសកម្មភាពជាក់លាក់ប៉ុណ្ណោះ»។
លោកបានបន្ថែមថា «ហើយវាហាក់ដូចជាខ្ញុំថា ដៃគូអាមេរិករបស់យើងបានទទួលសញ្ញានេះហើយ។ ពួកគេយល់ថាមានតែទីក្រុងវ៉ាស៊ីនតោនទេដែលអាចធានាបាននូវការបញ្ឈប់ការវាយប្រហារភេរវកម្ម, ការបាញ់ផ្លោងលើហេដ្ឋារចនាសម្ព័ន្ធស៊ីវិល និងថាមពលដែលមិនពាក់ព័ន្ធនឹងវិស័យយោធា-ឧស្សាហកម្ម»។
គួរបញ្ជាក់ថា យោងតាមសម្ដីរបស់លោក Lavrov រុស្ស៊ីនឹងមិនយល់ព្រមលើបទឈប់បាញ់តាមដែនសមុទ្រឡើយ លុះត្រាតែសហរដ្ឋអាមេរិកដាក់សម្ពាធខ្លាំងជាងមុនលើលោក Zelenskiy។ អាមេរិកមើលឃើញថាបទឈប់បាញ់តាមដែនសមុទ្រនេះជាជំហានឆ្ពោះទៅរកបទឈប់បាញ់ទូលំទូលាយ។
ជំនួបរវាងលោក Zelenskiy និងលោក ត្រាំ នៅសេតវិមានកាលពីខែមុនបានប្រព្រឹត្តទៅយ៉ាងអាក្រក់ ដែលបង្កឲ្យមានការព្រួយបារម្ភក្នុងចំណោមទីក្រុងកៀវ និងសម្ព័ន្ធមិត្តអឺរ៉ុបថា លោក ត្រាំ អាចនឹងចុះកិច្ចព្រមព្រៀងជាមួយលោក ពូទីន ដែលធ្វើឲ្យប៉ះពាល់ដល់សន្តិសុខរបស់ពួកគេ និងផ្ដល់ផលប្រយោជន៍ដល់រុស្ស៊ី៕
