(ញូវយ៉ក)៖ ក្រុមមន្ត្រីអង្គការសហប្រជាជាតិ ដែលបានធ្វើការស្ទង់មតិជុំវិញការខូចខាត ក្នុងគ្រោះរញ្ជួយដីនៅប្រទេសមីយ៉ាន់ម៉ា បានជំរុញសហគមន៍អន្តរជាតិ បង្កើនការផ្តល់ជំនួយរបស់ខ្លួន មុនពេលរដូវភ្លៀងមូសុងកាន់តែអាក្រក់ទៅៗ គ្រាដែលចំនួនអ្នកស្លាប់កើនឡើងដល់ ២ ៧១៩នាក់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី២ ខែមេសា ឆ្នាំ ២០២៥។

អ្នកសម្របសម្រួលផ្នែកមនុស្សធម៌របស់ UN លោក Marcoluigi Corsi បានឱ្យដឹងថា ទឹកស្អាត កត្តាអនាម័យ អាហារ ទីជម្រក និងថ្នាំពេទ្យ គឺជាតម្រូវការដ៏សំខាន់បំផុត បន្ទាប់ពីមានការខូចខាតធ្ងន់ធ្ងរដល់អគារ ផ្លូវថ្នល់ និងស្ពាន នៅមីយ៉ាន់ម៉ា។ អ្នកនាំពាក្យរបស់ UN លោក Stephane Dujarric បាននិយាថា យើង​ត្រូវ​តែ​ចាត់​វិធាន​ការ​យ៉ាង​ឆាប់​រហ័ស​ ដើម្បី​ផ្តល់​ការ​សង្គ្រោះ​មុន​រដូវ​​មូសុងចូលដល់នាពេល​ខាង​មុខ ដែល​ជា​ការ​ពិត​ណាស់​ វានឹង​ធ្វើ​ឲ្យ​វិបត្តិ​ដ៏​អាក្រក់​នេះ​កាន់​តែ​អាក្រក់​ទៅៗ។ បេសកជនពិសេសប្រចាំប្រទេសមីយ៉ាន់ម៉ា លោកស្រី Julie Bishop បាននិយាយថា សង្គ្រាមស៉ីវិលនៅមីយ៉ាន់ម៉ា បានធ្វើឱ្យមនុស្សជាង ៣លាននាក់ផ្លាស់ទីលំនៅ មុនពេលមានរញ្ជួយដី។ លោកស្រីបានជំរុញឱ្យភាគីទាំងអស់ បញ្ឈប់ការប្រយុទ្ធគ្នាជាបន្ទាន់ អនុញ្ញាតឱ្យមានដំណើរការការងារមនុស្សធម៌ និងធានាសុវត្ថិភាពបុគ្គលិកផ្តល់ជំនួយ។

គួរបញ្ជាក់ថា បន្ទាប់ពីការរញ្ជួយដីកម្រិត ៧.៧រ៉ិចទ័រក្នុងប្រទេសមីយ៉ាន់ម៉ា កាលពីថ្ងៃសុក្រសប្តាហ៍មុន មានមនុស្សចំនួន ៤៤១នាក់កំពុងបាត់ខ្លួននៅឡើយ ខណៈដែលមនុស្សចំនួន ៤ ៥២១នាក់បានរងរបួស៕