(សេអ៊ូល)៖ នៅថ្ងៃពុធ ទី២ ខែមេសា មេដឹកនាំស្តីទីនៃប្រទេសកូរ៉េខាងត្បូង បានអំពាវនាវឱ្យប្រទេសជាតិ យល់ព្រមទទួលយកដោយសន្តិវិធី នូវការសម្រេចចិត្តរបស់តុលាការធម្មនុញ្ញ ស្តីពីការចោទប្រកាន់ដកតំណែង ប្រធានាធិបតីព្យួរអំណាច លោក Yoon Suk Yeol ខណៈប៉ូលិសបាននិងកំពុងរឹតបន្តឹងការការពារសន្តិសុខ នៅជុំវិញតុលាការ មុនការប្រកាសសាលក្រម នៅថ្ងៃសុក្រសប្តាហ៍នេះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ក្នុងកិច្ចប្រជុំគណៈរដ្ឋមន្រ្តីស្តីពីសុវត្ថិភាព នៅមុនការប្រកាសសាលក្រមរបស់តុលាការធម្មនុញ្ញ ប្រធានាធិបតីស្តីទីកូរ៉េខាងត្បូង លោក Han Duck Soo បាននិយាយថា រូបលោកបានអំពាវនាវយ៉ាងទទូចឱ្យអ្នកនយោបាយទាំងអស់ កុំធ្វើការអត្ថាធិប្បាយណាមួយ ដែលអាចបំផុសឱ្យមានអំពើហិង្សាផ្ទុះឡើង។ លោក Han បានលើកឡើងថា «រដ្ឋាភិបាល នឹងមិនលើកលែងសកម្មភាពខុសច្បាប់ ឬហិង្សាណាមួយឡើយ។ ទោះការសម្រេចចិត្តចេញមកបែបណាក៏ដោយ ពួកយើងចាំបាច់​ត្រូវតែទទួលយកលទ្ធផល ដោយស្ងៀមស្ងាត់ យោងតាមនីតិរដ្ឋ។ ប្រសិនបើយើងអាចរួបរួមសាមគ្គីគ្នាម្តងទៀត ពួកយើងមុខជា​អាចជម្នះវិបត្តិមួយនេះ»។

ទន្ទឹមគ្នា ប៉ូលិសកូរ៉េខាងត្បូង បានបង្កើនការការពារសន្តិសុខ នៅតាមតំបន់ជុំវិញទីតាំងតុលាការធម្មនុញ្ញ ដោយត្រៀមដាក់ពង្រាយ​កងកម្លាំងទាំងអស់ ចាប់ពីវេលាយប់រំលងអធ្រាត្រ ឈានចូលថ្ងៃសុក្រ។ តុលាការគ្រោងនឹងប្រកាសសាលក្រម នៅម៉ោង១១ព្រឹកថ្ងៃសុក្រ (ម៉ោងក្នុងតំបន់នៅកូរ៉េខាងត្បូង)។ លោក Han ក៏បានបង្គាប់ឱ្យប៉ូលិស បង្កើនការការពារសុវត្ថិភាព សម្រាប់ចៅក្រមទាំងអស់នៃតុលាការធម្មនុញ្ញផងដែរ។

គួរបញ្ជាក់ថា លោក Yoon ត្រូវបានសភាបោះឆ្នោតចោទប្រកាន់ដកតំណែង កាលពីថ្ងៃទី១៤ ខែឧសភា ពាក់ព័ន្ធការប្រកាស​ដាក់ចេញច្បាប់អាជ្ញាសឹកដែលបរាជ័យ កាលពីដើមខែនោះ។ ប្រសិនបើតុលាការ សម្រេចដកតំណែងលោក Yoon ជាផ្លូវការ ការបោះឆ្នោតជ្រើសរើសប្រធានាធិបតីថ្មី ចាំបាច់ត្រូវតែរៀបចំឡើង ក្នុងរយៈពេល៦០ថ្ងៃ៕