(ប៉ារីស)៖ ប្រធានាធិបតីបារាំង លោក Emmanuel Macron បានកោះប្រជុំរដ្ឋមន្ត្រី និងអ្នកជំនាញសំខាន់ៗនៅថ្ងៃពុធនេះ ដើម្បីពិភាក្សាជាពិសេសអំពីប្រទេសអ៊ីរ៉ង់ រួមទាំងកម្មវិធីនុយក្លេអ៊ែររបស់ប្រទេសនេះ ខណៈដែលភាពតានតឹងរវាងទីក្រុងតេអេរ៉ង់ និងប្រធានាធិបតីអាមេរិក លោក ដូណាល់ ត្រាំ កំពុងកើនឡើងយ៉ាងខ្លាំង។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី២ ខែមេសា ឆ្នាំ ២០២៥។

កិច្ចប្រជុំគណៈរដ្ឋមន្ត្រីដែលផ្តោតលើប្រធានបទតែមួយបែបនេះ កម្រនឹងធ្វើឡើងណាស់ ហើយវាបង្ហាញពីការព្រួយបារម្ភកើនឡើង ក្នុងចំណោមសម្ព័ន្ធមិត្តអឺរ៉ុបរបស់ទីក្រុងវ៉ាស៊ីនតោនថា សហរដ្ឋអាមេរិក ឬអ៊ីស្រាអែលអាចនឹងបើកការវាយប្រហារតាមអាកាសលើទីតាំងនុយក្លេអ៊ែររបស់អ៊ីរ៉ង់ ប្រសិនបើការចរចារហ័សលើកម្មវិធីនុយក្លេអ៊ែរ មិនអាចសម្រេចបាន។

មន្ត្រីជាន់ខ្ពស់អឺរ៉ុបម្នាក់បាននិយាយថា អ្នកយុទ្ធសាស្រ្តអឺរ៉ុបកំពុងសួរខ្លួនឯងថា តើយុទ្ធនាការយោធាថ្មីៗរបស់អាមេរិកប្រឆាំងនឹងក្រុមហ៊ូទី (Houthis) ដែលគាំទ្រដោយអ៊ីរ៉ង់ អាចជាបុព្វហេតុនៃការវាយប្រហាររបស់សហរដ្ឋអាមេរិក លើប្រទេសអ៊ីរ៉ង់ក្នុងពេលឆាប់ៗខាងមុខនេះដែរឬទេ។

គួរបញ្ជាក់ថា ការប្រជុំនេះកើតឡើងចំពេលដែលលោក ត្រាំ បានគំរាមកំហែងអ៊ីរ៉ង់ជាមួយនឹងការទម្លាក់គ្រាប់បែក និងពន្ធបន្ថែម ប្រសិនបើខ្លួនមិនឈានដល់កិច្ចព្រមព្រៀងលើកម្មវិធីនុយក្លេអ៊ែររបស់អីរ៉ង់ ដែលបណ្តាប្រទេសលោកខាងលិចបារម្ភថា កំពុងឆ្ពោះទៅរកការអភិវឌ្ឍអាវុធនុយក្លេអ៊ែរ។ ខណៈពេលដែលរដ្ឋមន្ត្រីការបរទេសអ៊ីស្រាអ៊ែលក៏គ្រោងនឹងមកដល់ទីក្រុងប៉ារីសនៅថ្ងៃព្រហស្បតិ៍នេះ មហាអំណាចអឺរ៉ុបកំពុងព្យាយាមបង្កើនកិច្ចខិតខំប្រឹងប្រែងការទូតជាមួយអ៊ីរ៉ង់ ដើម្បីចៀសវាងការកើនឡើងនៃជម្លោះ៕