(ហ៊្សេរុយសាឡិម)៖ យោធាអ៉ីស្រាអែល ​បានអះអាងពី​​ការ​វាយ​ប្រហារ​តាម​ផ្លូវអាកាស​ ទៅលើ​មូលដ្ឋាន​ទ័ព​អាកាស ​និង​ទីតាំងផ្សេងទៀតក្នុង​ទីក្រុង​ដាម៉ាស Hama និង Homs របស់ប្រទេស​ស៉ីរី ​កាល​ពី​ថ្ងៃ​ពុធសប្តាហ៍នេះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទៅ៣ ខែមេសា ឆ្នាំ ២០២៥។

ប្រព័ន្ធផ្សព្វផ្សាយរដ្ឋស៉ីរី និងក្រុមមន្ត្រីបាននិយាយថា ការវាយប្រហារផ្តោតលើព្រលានយន្តហោះយោធា ក្នុងទីក្រុង Hama ក៏ដូចជាតំបន់ជុំវិញមជ្ឈមណ្ឌលស្រាវជ្រាវវិទ្យាសាស្ត្រ ក្នុងសង្កាត់ Barzeh នៃទីក្រុងដាម៉ាស។ បើតាមក្រសួងការបរទេសស៉ីរី ការវាយប្រហារនោះ បានបង្កការខូចខាតស្ទើរតែទាំងស្រុងដល់ព្រលានយោធា Hama និងបណ្តាលឱ្យមនុស្សជាច្រើននាក់របួស ក្នុងចំណោមជនស៉ីវិល និងបុគ្គលិកយោធា។ អ៉ីស្រាអែល ក៏បានកំណត់គោលដៅលើមូលដ្ឋានទ័ពអាកាស T4 ក្នុងទីក្រុង Homs ផងដែរ បន្ទាប់ពីបានវាយប្រហារទីក្រុងនេះម្តងហើយម្តងទៀត ក្នុងរយៈពេលប៉ុន្មានសប្តាហ៍កន្លងមក។

គួរបញ្ជាក់ថា ក្រោយការដួលរលំនៃរបបលោក Assad អ៉ីស្រាអែល បានបង្កើនការវាយប្រហារតាមផ្លូវអាកាសលើប្រទេសស៉ីរី ដោយលើកឡើងពីបំណងទប់ស្កាត់ក្រុមឧទ្ទាម។ មូលដ្ឋានទ័ពអាកាស Hama ដែលស្ថិតនៅភាគខាងលិចនៃទីក្រុង គឺជាទីតាំងដ៏សំខាន់មួយរបស់ស៉ីរី ដែលត្រូវបានប្រើប្រាស់យ៉ាងទូលំទូលាយ អំឡុងសង្រ្គាមស៉ីវិលជាង ១៣ឆ្នាំរវាងរបបលោក Assad និងក្រុមឧទ្ទាម៕