(ម៉ានីល)៖ រដ្ឋាភិបាលទីក្រុងម៉ានីល នៅថ្ងៃព្រហស្បតិ៍ ទី៣ ខែមេសា បាននិយាយថា គម្រោងទិញយន្តហោះចម្បាំង F-16 ពីសហរដ្ឋអាមេរិក គឺមិនមែនដើម្បីគំរាមកំហែងផលប្រយោជន៍ របស់ប្រទេសទី៣ណាមួយឡើយ រួមទាំងចិនផងដែរ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

អ្នកនាំពាក្យក្រុមប្រឹក្សាសន្តិសុខជាតិហ្វីលីពីន លោក Jonathan Malaya បាននិយាយថា ផែនការទិញយន្តហោះចម្បាំងនោះ គឺគ្រាន់តែជា​ផ្នែកនៃកិច្ចប្រឹងប្រែងរបស់ប្រទេសហ្វីលីពីន ដើម្បីធ្វើទំនើបកម្មយោធារបស់ខ្លួនប៉ុណ្ណោះ។ លោក Malaya បានសង្កត់ធ្ងន់ដូច្នេះថា «យើងចង់ធានាអះអាងចំពោះសាធារណរដ្ឋប្រជាមានិតចិនថា គម្រោងទិញយន្តហោះចម្បាំង F-16 ពីសហរដ្ឋអាមេរិក គឺគ្មានចេតនា ដើម្បីបង្កការគំរាមកំហែង ចំពោះភាគីទី៣ណាមួយនោះទេ»។

គួរបញ្ជាក់ថា កាលពីថ្ងៃអង្គារសប្តាហ៍នេះ ទីភ្នាក់ងារកិច្ចសហប្រតិបត្តិការសន្តិសុខ នៃក្រសួងការពារជាតិអាមេរិក បាននិយាយថា ក្រសួងការបរទេសអាមេរិក បានផ្តល់ភ្លើងបៃតង ចំពោះគម្រោងលក់យន្តហោះចម្បាំង F-16 ចំនួន២០គ្រឿង ឱ្យមកហ្វីលីពីន ក្នុងទំហំទឹកប្រាក់ប្រហែល៥.៥៨ពាន់លានដុល្លារ។ ប៉ុន្មានឆ្នាំចុងក្រោយនេះ ហ្វីលីពីនបានជួបហេតុការណ៍ប្រឈមមុខដាក់គ្នា ​យ៉ាងញឹកញាប់ នៅឯតំបន់សមុទ្រចិនខាងត្បូង ដែលមានបញ្ហាវិវាទទឹកដី៕