(សេអ៊ូល)៖ ប្រធានាធិបតីស្តីទីកូរ៉េខាងត្បូង លោក Han Duck-soo បានអំពាវនាវរកកិច្ចពិភាក្សាជាមួយក្រុមមន្ត្រីអាមេរិក ដើម្បីការពារសេដ្ឋកិច្ចដែលពឹងផ្អែកលើការនាំចេញ ពីផលប៉ះពាល់នៃពន្ធគយរបស់សហរដ្ឋអាមេរិក ព្រមទាំងដាក់បញ្ជាឱ្យមាន វិធានការគាំទ្របន្ទាន់ សម្រាប់វិស័យអាជីវកម្ម។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី៣ ខែមេសា ឆ្នាំ ២០២៥។

នៅក្រោមវិធានការពាណិជ្ជកម្មថ្មីបង្អស់របស់ លោកប្រធានាធិបតី ដូណាល់ ត្រាំ កូរ៉េខាងត្បូងរងនូវពន្ធគយ ២៥ភាគរយ។ លោក Han បាននិយាយនៅឯកិច្ចប្រជុំជាមួយរដ្ឋមន្រ្តីហិរញ្ញវត្ថុ និងមន្រ្តីកំពូលៗថា «ស្របពេលដែលសង្រ្គាមពាណិជ្ជកម្មពិភពលោក បានក្លាយជាការពិត រដ្ឋាភិបាល​ត្រូវ​តែ​បញ្ចេញ​សមត្ថភាព​ទាំងអស់​​ ដើម្បី​ជម្នះ​វិបត្តិ​ពាណិជ្ជកម្ម»។ បើតាមរដ្ឋមន្រ្តីក្រសួងឧស្សាហកម្ម លោក Ahn Duk-geun ទីក្រុងសេអ៊ូល នឹងបន្តពិគ្រោះយោបល់ជាមួយមន្ត្រីជាន់ខ្ពស់ និងការងារថ្នាក់ខ្ពស់របស់សហរដ្ឋអាមេរិក អំពីពន្ធគយ។

គួរបញ្ជាក់ថា នៅក្នុងសុន្ទរកថារបស់ លោក ត្រាំ ស្តីពីសម្ព័ន្ធមិត្តសន្តិសុខអាស៉ីរបស់ទីក្រុងវ៉ាស៊ីនតោន លោកបានចោទប្រកាន់ កូរ៉េខាងត្បូង និងជប៉ុនថាបានការអនុវត្តពាណិជ្ជកម្មមិនយុត្តិធម៌ ប្រឆាំងសហរដ្ឋអាមេរិក។ ក្រុមអ្នកវិភាគនៅទីក្រុងសេអ៊ូល យល់ថា ការដាក់ពន្ធគយយ៉ាងទូលំទូលាយរបស់ លោក ត្រាំ នឹងជះផលប៉ះពាល់ធ្ងន់ធ្ងរ ដល់ប្រទេសដែលមានសេដ្ឋកិច្ចធំលំដាប់ទី ៤របស់អាស៉ីមួយនេះ៕