(ញូវយ៉ក)៖ សន្ទស្សន៍ទីផ្សារភាគហ៊ុនធំៗនៅសហរដ្ឋអាមេរិក បានមើលឃើញការធ្លាក់ចុះដ៏ធំបំផុតក្នុងមួយថ្ងៃ កាលពីថ្ងៃព្រហស្បតិ៍សប្តាហ៍នេះ បើគិតចាប់តាំងឆ្នាំ២០២០មក ហើយប្រាក់ដុល្លារក៏បានធ្លាក់ថ្លៃគួរកត់សម្គាល់ផងដែរ ​ស្របពេលដែលវិធានការដាក់ពន្ធ​ជាសកល របស់ប្រធានាធិបតីអាមេរិក លោក ដូណាល់ ត្រាំ កំពុងបង្កការភ័យព្រួយខ្លាំង អំពីវិបត្តិសេដ្ឋកិច្ចពិភពលោក និងធ្វើឱ្យវិនិយោគិននាំគ្នាបាត់ទំនុកចិត្ត។ នេះបើតាមការចេញផ្សាយដោយ សារព័ត៌មាន ​The Wall Street Journal នាថ្ងៃសុក្រ ទី៤ ខែមេសា ឆ្នាំ២០២៥។

សន្ទស្សន៍ផ្សារហ៊ុនធំៗអាមេរិក កាលពីថ្ងៃព្រហស្បតិ៍ សុទ្ធតែបានមើលឃើញការធ្លាក់ចុះ ដោយខ្លះធ្លាក់ដល់៦ភាគរយ ហើយបើ​​គិតជារួម ភាគហ៊ុននៃក្រុមហ៊ុនទាំងអស់នៅសហរដ្ឋអាមេរិក បានបាត់បង់តម្លៃក្នុងទីផ្សារសរុបបញ្ចូលគ្នា រហូតដល់ប្រហែល៣.‌១ទ្រីលានដុល្លារឯណោះ ដែលជាការធ្លាក់ដាំក្បាលចុះដ៏ធំបំផុតមិនធ្លាប់មានឡើយ គិតចាប់តាំងពីខែមីនា ឆ្នាំ២០២០មក ជាពេលដែលទីផ្សារភាគហ៊ុនពិភពលោក បានរងផលប៉ះពាល់ធ្ងន់ធ្ងរ ពីវិបត្តិជំងឺរាតត្បាតសកលកូវីដ១៩។ ភាគហ៊ុនរបស់បណ្តាក្រុមហ៊ុនយក្សនៅអាមេរិក ដូចជា Apple, Amazon, Nvidia និង Microsoft បានធ្លាក់ចុះចន្លោះពី២ ទៅ៩ភាគរយ។

ភាពវឹកវរនេះបានកើតឡើង បន្ទាប់ពីលោក ត្រាំ បានប្រកាសកំណត់ការយកពន្ធគោលថ្មី១០ភាគរយ លើទំនិញនាំចូលទាំងអស់ រួមជាមួយការយកពន្ធខ្ពស់ៗជាងនេះទៀត ទៅលើប្រទេសជាច្រើនជុំវិញពិភពលោក ដោយប្រទេសខ្លះ រងការយកពន្ធដល់ជិត៥០ភាគរយ ហើយក្នុងនោះ ក៏រួមមានទាំងដៃគូពាណិជ្ជកម្មកំពូលៗ របស់អាមេរិកផងដែរ។ ក្រុមវិនិយោគិនព្រួយបារម្ភថា ការផ្ទុះសង្រ្គាមពាណិជ្ជកម្មជាលក្ខណៈពិភពលោក អាចនឹងធ្វើឱ្យកំណើនសេដ្ឋកិច្ចសកល ថយចុះយ៉ាងគំហុក ហើយជំរុញអតិផរណាកាន់តែខ្លាំងថែមទៀត ដោយវិធានការពន្ធគយថ្មីបង្អស់នេះរបស់លោក ត្រាំ កំពុងជះផលប៉ះពាល់យ៉ាងអវិជ្ជមានបំផុត ទៅលើសេដ្ឋកិច្ចពិភពលោក ដែលទើបតែងើបឡើងមិនទាន់រឹងមាំស្រួលបួលផង ពីការកើនឡើងនៃអតិផរណាក្រោយវិ​បត្តិកូវីដ និងការប្រឈមជាមួយជម្លោះភូមិសាស្រ្តនយោបាយ។

គួរបញ្ជាក់ថា ក្រៅពីទីផ្សារភាគហ៊ុនដាំក្បាល លុយដុល្លារអាមេរិក ក៏បានធ្លាក់ថ្លៃគួរឱ្យកត់សម្គាល់ផងដែរ។ ប្រាក់អឺរ៉ូរបស់អឺរ៉ុប បានលោតឡើងខ្ពស់ មិនធ្លាប់មានក្នុងរយៈពេល៦ខែ ធៀបនឹងលុយដុល្លារ ខណៈវាបានកើន១.៧៤ភាគរយ ដល់១.១០៣៧ដុល្លារ ក្នុង១អឺរ៉ូ។ ធៀបជាមួយប្រាក់យេនរបស់ជប៉ុន ដុល្លារអាមេរិកក៏បានធ្លាក់ចុះ១.៩៥ភាគរយផងដែរ ដោយ១ដុល្លារ ស្មើនឹង១៤៦.៤៤៥យេន ហើយបានធ្លាក់២.៣៥ភាគរយ ធៀបនឹងលុយហ្រ្វង់របស់ស្វីស មកនៅ០.៨៦០៨ស្វីសហ្រ្វង់ ក្នុង១ដុល្លារ៕