(ព្រុចសែល)៖ រដ្ឋមន្រ្តីការបរទេសអាមេរិក លោក Marco Rubio កាលពីថ្ងៃព្រហស្បតិ៍ ទី៣ ខែមេសា បានប្រាប់សម្ព័ន្ធមិត្ត NATO ថា ទីក្រុងវ៉ាស៉ីនតោន នៅតែមានការប្តេជ្ញាចំពោះបក្សសម្ព័ន្ធយោធានេះ ប៉ុន្តែរំពឹងថា ពួកគេនឹងបង្កើនការចំណាយកាន់តែច្រើនថែមទៀត លើវិស័យការពារជាតិ ហើយនឹងទុកពេល ឱ្យពួកគេដើម្បីសម្រេចរឿងនោះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។
លោក Rubio បានលើកឡើងដូចខាងលើ ក្នុងឱកាសដែលរូបលោក បានចូលរួមកិច្ចប្រជុំជាមួយ ក្រុមរដ្ឋមន្រ្តីការបរទេសនៃសមាជិក NATO នៅឯទីក្រុងព្រុចសែល។ ពាក្យសម្តីនិងសកម្មភាព របស់រដ្ឋបាលប្រធានាធិបតីអាមេរិក លោក ដូណាល់ ត្រាំ ប៉ុន្មានខែមកនេះ បានបង្កើតភាពស្រពេចស្រពិល ជុំវិញអនាគតរបស់ NATO ជាបក្សសម្ព័ន្ធយោធាលោកខាងលិច ដែលបានដើរតួនាទីជាសសរគ្រឹះយូរមកហើយ នៃសន្តិសុខរបស់អឺរ៉ុប សម្រាប់រយៈពេល៧៥ឆ្នាំចុងក្រោយ។
យ៉ាងណាមិញ លោក Rubio បានព្យាយាមរំងាប់មន្ទិលសង្ស័យ អំពីការប្តេជ្ញារបស់សហរដ្ឋអាមេរិក ចំពោះ NATO ដោយលោក បាននិយាយថា អាមេរិកស្ថិតក្នុង NATO ហើយនៅតែជាសមាជិកដ៏សកម្មមួយដដែល។ លោករដ្ឋមន្រ្តីការបរទេសអាមេរិក បានបន្តថា លោក ត្រាំ មិនប្រឆាំងអង្គការ NATO នោះទេ ប៉ុន្តែលោកប្រឆាំង NATO មួយ ដែលមិនមានសមត្ថភាពគ្រប់គ្រាន់ ដើម្បីបំពេញកាតព្វកិច្ចដែលសន្ធិសញ្ញា បានកំណត់លើរដ្ឋជាសមាជិកនីមួយៗ។
លោក ត្រាំ ធ្លាប់បាននិយាយថា សមាជិក NATO គួរតែចំណាយឱ្យដល់ ៥ភាគរយ នៃ GDP ទៅលើវិស័យការពារជាតិ ដែលជាកំណើនធំមួយ ពីគោលដៅ២ភាគរយបច្ចុប្បន្ន ហើយជាកម្រិតមួយ ដែលមិនទាន់មានសមាជិក NATO ណាមួយ រួមទាំងអាមេរិកផងដៃរ សម្រេចបាននៅឡើយទេ។ ពាក់ព័ន្ធនឹងរឿងនេះ លោក Rubio បាននិយាយថា «គ្មាននរណាម្នាក់រំពឹងថា អ្នកនឹងអាចធ្វើយ៉ាងដូច្នោះបាន ក្នុងពេល១ឆ្នាំឬ២ឆ្នាំឡើយ ប៉ុន្តែមធ្យោបាយដើម្បីសម្រេចគោលដៅនេះ ត្រូវតែមានភាពជាក់ស្តែង»។
គួរបញ្ជាក់ថា កន្លងមក ទីក្រុងវ៉ាស៉ីនតោន បានប្រាប់ក្រុមប្រទេសអឺរ៉ុបត្រង់ៗថា អាមេរិកនឹងមិនដើរតួនាទីស្នូល នៅក្នុងការធានាសន្តិសុខរបស់អឺរ៉ុបទៀតឡើយ ជាហេតុបង្កឱ្យអឺរ៉ុបបារម្ភថា តើអាមេរិកគ្រោងកាត់បន្ថយការចូលរួមកម្រិតណា នៅ NATO ដើម្បីពួកគេអាចរិះរកមធ្យោបាយ ក្នុងគោលបំណងចៀសវាងចន្លោះប្រហោងផ្នែកសន្តិសុខនៅអឺរ៉ុប។ បើយោងតាមការប៉ាន់ស្មានរបស់ NATO ប្រទេសសេដ្ឋកិច្ចធំៗមួយចំនួននៅអឺរ៉ុប ដូចជាអ៉ីតាលីនិងអេស៉្បាញ ស្ថិតក្នុងចំណោមសមាជិក ដែលបច្ចុប្បន្ននៅក្រោមគោលដៅ ២ភាគរយនៅឡើយ នៃការចំណាយលើវិស័យការពារជាតិ គឺខ្ទង់១.៥ភាគរយ និង១.៣ភាគរយ។ ប្រទេសសរុបចំនួន២៣ ក្នុងចំណោមសមាជិកទាំង៣២ របស់ NATO បានបំពេញតាម គោលដៅចំណាយ ២ភាគរយ ឬលើសពីនេះ កាលពីឆ្នាំ២០២៤៕
