(ហ្សាកាតា)៖ ក្រុមសកម្មជនឥណ្ឌូណេស៉ី បានរិះគន់បទប្បញ្ញត្តិថ្មីមួយ ដែលអនុញ្ញាតឱ្យប៉ូលិសតាមដានអ្នកកាសែត និងអ្នកស្រាវជ្រាវបរទេស ដែលកំពុងធ្វើការនៅក្នុងប្រទេសឥណ្ឌូណេស៉ី ដោយនិយាយថាជាទង្វើដាក់កំហិត លើសេរីភាពសារព័ត៌មាន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃសុក្រ ទី៤ ខែមេសា ឆ្នាំ ២០២៥។

ច្បាប់ថ្មីដែលដាក់ចេញ កាលពីថ្ងៃទី១០ ខែមីនា រួចត្រូវបានផ្សព្វផ្សាយលើអ៉ីនធឺណេត គឺជនបរទេសត្រូវមានលិខិតបញ្ជាក់ ទីតាំងធ្វើការជាក់លាក់របស់ពួកគេ ពីសំណាក់ប៉ូលិសជាចាំបាច់។ ប៉ូលិសនិយាយថា ច្បាប់ថ្មីនេះគឺចាំបាច់ដើម្បី រក្សាអធិបតេយ្យភាពរដ្ឋ និងផ្តល់ការការពារសម្រាប់ជនបរទេស នៅក្នុងទឹកដីឥណ្ឌូនេស៉ី។

ប្រធានប្រតិបត្តិក្រុមតស៊ូមតិមួយនៃវិទ្យាស្ថាន Legal Aid Institute for the Press លើកឡើងថា ច្បាប់នេះអាចបង្កការលំបាក សម្រាប់អ្នកកាសែត ឬអ្នកមកធ្វើការស្រាវជ្រាវនៅឥណ្ឌូណេស៉ី។ លោក Mustafa Layong បានប្រាប់ AFP ថា «ការលំបាក គឺនៅត្រង់ថាអ្នកកាសែតបរទេស ឬអ្នកស្រាវជ្រាវអាចត្រូវបានចាត់ទុកថាខុសច្បាប់ នៅពេលពួកគេមិនមានលិខិតបញ្ជាក់»។

ដោយឡែកលោក Andreas Harsono មកពីអង្គការឃ្លាំមើលសិទ្ធិមនុស្ស ក៏បានថ្កោលទោសច្បាប់នេះផងដែរ ដោយនិយាយថា វានឹងរឹតត្បិតសេរីភាព និងការធ្វើព័ត៌មានរសើបៗអំពីប្រទេសឥណ្ឌូណេស៉ី៕