(បារាំង)៖ ប្រធានាធិបតីបារាំង លោក អែមម៉ានុយអែល ម៉ាក្រុង បានបង្ហាញទស្សនវិស័យរបស់លោកថា នៅប៉ុន្មានឆ្នាំខាងមុខទៀត សហភាពអឺរ៉ុបនឹងត្រូវការកងកម្លាំងប្រតិកម្មរហ័សរួម កញ្ចប់ថវិកាការពារជាតិតែមួយ និងគោលនយោបាយតែមួយសម្រាប់សកម្មភាព ហើយបើតាមលោក សហភាពអឺរ៉ុប ក៏គួរតែបង្កើតកងកម្លាំងការពារស៊ីវិល និងប៉ូលិសព្រំដែនតែមួយផងដែរ។ នេះបើតាមការចេញផ្សាយដោយ សារព័ត៌មាន Sputnik នៅរសៀលថ្ងៃពុធ ទី២៧ ខែកញ្ញា ឆ្នាំ២០១៧។
ការថ្លែងខាងលើរបស់លោក ម៉ាក្រុង ធ្វើឡើងនៅក្នុងសុន្ទរកថាមួយ នៅឯសាកលវិទ្យាល័យ Paris-Sorbonne University កាលពីថ្ងៃអង្គារ និងនៅចំពេលដែលគំនិតបង្កើតកងទ័ពអឺរ៉ុបបាន ក្លាយជាប្រធានបទជជែកដេញដោលយ៉ាងផុលផុស ក្រោយប្រធានាធិបតីអាមេរិក លោក ដូណាល់ ត្រាំ បានស្នើឱ្យរដ្ឋជាសមាជិកអង្គការណាតូ ជួយចេញថ្លៃចាយវាយ បើសិនជាចង់យក សហរដ្ឋអាមេរិក ធ្វើជាឆ័ត្រនុយក្លេអ៊ែរ។
ថ្លែងនាឱកាសនោះដែរ ប្រធានាធិបតីបារាំងកំពុងធ្លាក់កូដរូបនេះ បានគូសបញ្ជាក់បន្ថែមយ៉ាងដូច្នេះថា «គោលបំណងនៃការបង្កើតកងកម្លាំងយោធារួមគឺ ជួយឱ្យសហភាពអឺរ៉ុបមានសមត្ថភាពធ្វើសកម្មភាពដោយស្វ័យភាព»។ ទោះជាបែបនេះក្តី លោក ម៉ាក្រុង ក៏បានអះអាងបន្ថែមថា កងទ័ពអឺរ៉ុបរួមនេះមិនមែនបង្កើតឡើង ដើម្បីជំនួសអង្គការណាតូនោះទេ តែវានឹងបំពេញសមត្ថភាពយោធាបន្ថែម នៃប្រទេសជាសម្ព័ន្ធមិត្តប៉ុណ្ណោះ។
គួរបញ្ជាក់ថា កាលពីខែមិថុនាកន្លងទៅ ប្រធានគណកម្មាការអឺរ៉ុប លោក ហ្សង់ ក្លូដ ហ្សាំងឃើ (Jean-Claude Juncker) បាននិយាយថា សហភាពអឺរ៉ុបគួរតែមានកងទ័ពខ្លួនឯង ដោយមិនត្រូវពឹងផ្អែកទាំងស្រុង លើប្រទេសណាមួយនោះទេ តែគំនិតនេះត្រូវបានអង់គ្លេសជំទាស់ ដោយសំអាងថា វាអាចនឹងធ្វើឱ្យប៉ះពាល់ដល់ទំនាក់ទំនងជាមួយអង្គការណាតូ របស់សហរដ្ឋអាមេរិក៕
http://cdn.newsapi.com.au/image/v1/f1ddd39db1d9544742962f3ffdb8b1d9?width=650
