(ភ្នំពេញ)៖ នៅរសៀល ថ្ងៃទី១៩ ខែធ្នូ ឆ្នាំ២០១៩នេះ ក្រុមប្រឹក្សាធម្មនុញ្ញ បានបើកកិច្ចប្រជុំក្រោមអធិបតីភាព លោកកិត្តិនីតិកោសលបណ្ឌិត អ៉ឹម ឈុនលឹម ប្រធានក្រុមប្រឹក្សាធម្មនុញ្ញ ដើម្បីពិភាក្សា និងសម្រេចលើរបៀបវារៈចំនួន៣។
របៀបវារៈទាំង៣នោះរួមមាន៖
១៖ ពិធីចូលកាន់តំណែងរបស់សមាជិកាថ្មីនៃក្រុមប្រឹក្សាធម្មនុញ្ញ។
២៖ កិច្ចប្រជុំពេញអង្គអំពីការពិនិត្យធម្មនុញ្ញភាពច្បាប់ស្តីពីវិសោធនកម្មមាត្រា៣ មាត្រា១៧ មាត្រា២០ មាត្រា២១ មាត្រា២៧ មាត្រា២៨ មាត្រា២៩ មាត្រា៥៤ មាត្រា៥៥ មាត្រា៥៩ នៃច្បាប់ស្តីពីសហជីពដែលបានប្រកាសឱ្យប្រើដោយព្រះរាជក្រមលេខ នស/រកម/០៥១៦/០០៧ ចុះថ្ងៃទី១៧ ខែឧសភា ឆ្នាំ២០១៦។
៣៖ ការបែងចែកក្រុមនៃក្រុមប្រឹក្សាធម្មនុញ្ញ និងបញ្ហាផ្សេងៗ។
តាមសេចក្តីប្រកាសរបស់ក្រុមប្រឹក្សាធម្មនុញ្ញ បន្ទាប់ពីបញ្ចប់កិច្ចប្រជុំនេះ ក្រុមប្រឹក្សាធម្មនុញ្ញ បានសម្រេចលទ្ធផលដូចតទៅ៖
១៖ សម្តេច ស៊ីសុវត្ថិ ពង្សនារី មុនីពង្ស យាងចូលកាន់តំណែងជាសមាជិកាក្រុមប្រឹក្សាធម្មនុញ្ញ។
២៖ ក្រុមប្រឹក្សាធម្មនុញ្ញ បានអនុម័តជាឯកច្ឆន្ទច្បាប់ស្តីពីវិសោធនកម្មមាត្រា៣ មាត្រា១៧ មាត្រា២០ មាត្រា២១ មាត្រា២៧ មាត្រា២៨ មាត្រា២៩ មាត្រា៥៤ មាត្រា៥៥ មាត្រា៥៩ នៃច្បាប់ស្តីពីសហជីពដែលត្រូវប្រកាសឱ្យប្រើដោយព្រះរាជក្រមលេខ នស/រកម/០៥១៦/០០៧ ចុះថ្ងៃទី១៧ ខែឧសភា ឆ្នាំ២០១៦ ដែលរដ្ឋសភាបានអនុម័តនៅថ្ងៃទី២៦ ខែវិច្ឆិកា ឆ្នាំ២០១៩ នាសម័យប្រជុំរដ្ឋសភាលើកទី៣ នីតិកាលទី៦ និងព្រឹទ្ធសភាបានពិនិត្យ និងឱ្យយោបល់ឯកភាពទាំងស្រុងលើទម្រង់ និងគតិច្បាប់ ដោយឥតកែប្រែ និងចាត់ទុកជាការប្រញាប់ក្នុងសម័យប្រជុំលើកទី៤ ព្រឹទ្ធសភា នីតិកាលទី៤ នាថ្ងៃទី០៩ ខែធ្នូ ឆ្នាំ២០១៩ ត្រូវបានប្រកាសថា ស្របនឹងរដ្ឋធម្មនុញ្ញ។
៣៖ ក្រុមប្រឹក្សាធម្មនុញ្ញ បានអនុម័តជាឯកច្ឆន្ទកែសម្រួលសមាសភាព ក្រុមនៃក្រុមប្រឹក្សាធម្មនុញ្ញ
* ក្រុមទី១ (លោក អ៊ុត ឈន លោក សំ ព្រហ្មនា លោក កែវ ពុទ្ធរស្មី)
* ក្រុមទី២ (លោកកិត្តិនីតិកោសលបណ្ឌិត អ៉ឹម ឈុនលឹម លោកស្រី លី វួចឡេង សម្តេច ស៊ីសុវត្ថិ ពង្សនារី មុនីពង្ស)
* ក្រុមទី៣ (សម្តេចព្រះមហិស្សរា នរោត្តម ច័ក្រពង្ស់ លោក អ៉ឹម សួស្តី លោក ហ៊ី សោភា)។
ទន្ទឹមនឹងនេះ សម្តេច ស៊ីសុវត្ថិ ពង្សនារី មុនីពង្ស ត្រូវបានចាត់តាំងជាសមាជិកាក្រុមការងារបកប្រែភាសាបារាំងផងដែរ៕
ខាងក្រោមនេះជាសេចក្តីប្រកាសរបស់ក្រុមប្រឹក្សាធម្មនុញ្ញ៖
