(ភ្នំពេញ)៖ នៅថ្ងៃទី០៥ ខែមិថុនា ឆ្នាំ២០២០ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានផ្ញើសារលិខិតមរណទុក្ខជូនលោក សុខ ទូច ប្រធានរាជបណ្ឌិត្យសភាកម្ពុជា ក្រោយទទួលដំណឹងថា ឧបសក យ៉ុង សុខន ជាឪពុករបស់លោក សុខ ទូច ទទួលមរណភាព ក្នុងជន្មាយុ៨១ឆ្នាំ ដោយជរាពាធ។
សារលិខិតរបស់សម្តេចតេជោ ហ៊ុន សែន បានរៀបរាប់ថា «នៅក្នុងឱកាសប្រកបដោយសមានទុក្ខនោះ ខ្ញុំនឹងភរិយាសូមសម្តែងនូវការសោកស្តាយ ស្រណោះអាឡោះអាល័យ សង្វេគស្ទើររកទីបំផុតគ្មាន ព្រោះថាការបាត់បង់ឧបាសក យ៉ុង សុខន គឺជាការបាត់បង់នូវ ឪពុក ឪពុកក្មេក ជីតា ប្រកបដោយព្រហ្មវិហារធម៌មិនចេះរីងស្ងួត ពិសេសគឺជាការបាត់បង់ឧបាសកដ៏ល្អឆ្នើមបំផុតមួយរូបក្នុងការលើកស្ទួយតម្លៃព្រះពុទ្ធសាសនា ដោយសទ្ធាជ្រះថ្លាបរិសុទ្ធទៀតផង»។
