(ភ្នំពេញ)៖ ប្រធានក្រុមប្រឹក្សាធម្មនុញ្ញ លោក អ៉ឹម ឈុនលឹម បានសម្តែងនូវសេចក្តីក្រៀមក្រំជាពន់ពេក បន្ទាប់ពីបានទទួលដំណឹងមរណភាពរបស់ លោក យ៉ុង សុខន ដែលជាឪពុកបង្កើតរបស់លោក សុខ ទូច ប្រធានរាជបណ្ឌិត្យសភាកម្ពុជា។
ក្នុងលិខិតចូលរួមរំលែកមរណទុក្ខផ្ញើជូនលោក សុខ ទូច, លោក អ៉ឹម ឈុនលឹម បាត់ចាត់ទុកមរណភាពរបស់លោក យ៉ុង សុខន ជាការបាត់បង់នូវលោកឪពុក លោកឪពុកក្មេក និងលោកតា ប្រកបដោយព្រហ្មវិហារធម៌ ជាទីគោរពស្រឡាញ់។
ជាមួយនឹងការចូលរួមរំលែកមរណទុក្ខជាមួយក្រុមគ្រួសារបស់លោក សុខ ទូច ហើយនោះ លោក អ៉ឹម ឈុនលឹម ក៏បានបួងសួងសូមឱ្យវិញ្ញាណក្ខន្ធរបស់លោក យ៉ុង សុខន បានអញ្ជើញទៅកាន់សុគតិភពកុំបីឃ្លៀងឃ្លាត។
សូមបញ្ជាក់ថា លោក យ៉ុង សុខន បានទទួលមរណភាពនៅថ្ងៃសុក្រ ទី០៥ ខែមិថុនា ឆ្នាំ២០២០ ក្នុងជន្មាយុ ៨១ឆ្នាំ ដោយជរាពាធ។ សពលោក យ៉ុង សុខន នឹងត្រូវបូជានៅថ្ងៃអាទិត្យ ២រោច ខែជេស្ឋ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃ៧ ខែមិថុនា ឆ្នាំ២០២០ នៅវេលាម៉ោង ៤៖០០រសៀល នៅភូមិស្វាយឧត្ដម សង្កាត់ពញ្ញាពន់ ខណ្ឌព្រែកព្នៅ រាជធានីភ្នំពេញ។
សូមបញ្ជាក់ថា លោក យ៉ុង សុខន កើតនៅថ្ងៃទី១១ ខែវិច្ឆិកា ឆ្នាំ១៩៣៩ នៅឃុំស្វាយរលំ ស្រុកស្អាង ខេត្តកណ្ដាល។ លោកមានកូនប្រុសស្រីសរុបចំនួន៧រូប។
លោក យ៉ុង សុខន បានចូលរួមចំណែកកសាងសង្គមជាតិ និងបន្សល់ទុកស្នាដៃជាច្រើនសម្រាប់ជាតិ តាមរយៈតួនាទីជាមន្ត្រីរាជការតាំងពីឆ្នាំ១៩៧៩។ លោក សុខន ធ្លាប់បានធ្វើការនៅគណៈឃោសនាអប់រំមជ្ឈិមបក្ស, ជាចៅហ្វាយខេត្តសៀមរាប, ជាចៅហ្វាយស្រុកវារិន, ជាអនុប្រធានពាណិជ្ជកម្ម ខេត្តសៀមរាប, ជាប្រធានសំណង់ខុទ្ទកាល័យមជ្ឈិមបក្សនៅភ្នំពេញ, ជាប្រធានសាឡាងព្រែកក្ដាម នៃក្រសួងសាធារណការ, ធ្វើការនៅក្រសួងគមនាគមន៍ ក្នុងផ្នែកការដ្ឋានស្ពានថ្នល់ និងធ្វើជាអនុប្រធានការិយាល័យអត្តសញ្ញាណកម្មជាដើម៕
