(កំពង់ធំ)៖ លោក រឹម សុខឡង ជាក្រឡាបញ្ជីខេត្តកំពង់ធំ បានស្លាប់ភ្លាមៗយ៉ាងអាណោចអធ័មនៅក្នុងប្រឡាយទឹក ខណៈបើករថយន្តម៉ាកកាមរីស្វិត តាមដងផ្លូវក្រាលគ្រោះក្រហម បានដាច់ការឡេក្រឡាប់ធ្លាក់ចូលប្រឡាយទឹក។
សមត្ថកិច្ចបានឱ្យដឹងថា ហេតុការណ៍គ្រោះថ្នាក់ចរាចរណ៍ដ៏រន្ធត់នេះ បានកើតឡើងនៅថ្ងៃទី១៧ ខែកក្កដា ឆ្នាំ២០២០ វេលាម៉ោង១៩៖២០នាទីយប់ នៅលើផ្លូវគ្រួសក្រហម ចំណុចប្រឡាយទឹក ភូមិវាំងខាងជើង ឃុំតាំងក្រសាំង ស្រុកសន្ទុក ខេត្តកំពង់ធំ។
ជនរងគ្រោះជិះរថយន្តម៉ាកកាមរីស្វិត កែច្នៃផ្លាកលេខ ច-៣៦៣៩ ភ.ព២ បើកបរដោយឈ្មោះ រឹម សុខឡង ភេទប្រុស អាយុ៣៤ឆ្នាំ នៅភូមិពោធិ៍បាក់ក សង្កាត់ដំរីជាន់ខ្លា ក្រុងស្ទឹងសែន មុខរបរក្រឡាបញ្ជីខេត្តកំពង់ធំ បានបើកបរពីទិសខាងកើត ឆ្ពោះទៅទិសលិច បានភ្លូកធ្លាក់ក្រោមផ្លូវបណ្ដាលឱ្យស្លាប់នៅកន្លែងកើតហេតុ មូលហេតុបើកបររថយន្តដាច់ការឡេ។
បច្ចុប្បន្ន សាកសពជនរងគ្រោះ ត្រូវសាច់ញាតិយកទៅធ្វើបុណ្យតាមប្រពៃណីនៅឯគេហដ្ឋាន៕
