(ភ្នំពេញ)៖ លោក វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា បានលើកឡើងថា បានលើកឡើងថា គិតត្រឹមថ្ងៃទី២០ ខែកក្កដា ឆ្នាំ២០២០ ការបើកប្រាក់ឧបត្ថម្ភ សាច់ប្រាក់ជូនគ្រួសារក្រីក្រ និងជនងាយរងគ្រោះ ក្នុងកំលុងពេលប្រឆាំងជំងឺកូវីដ១៩ សម្រាប់ជុំទី១ សម្រេចបាន៩៣ភាគរយបានជាង ៥៣ម៉ឺនគ្រួសារ គឺនៅចំនួនតិចតួចទៀតមិនទាន់បានបើក។

ការថ្លែងប្រាប់អ្នកសារព័ត៌មានពីសំណាក់ លោក វង សូត បានធ្វើឡើងនៅក្នុងសិក្ខាសាលាស្តីពី នីតិវិធី និងដំណើរការនៃការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងជនងាយរងគ្រោះ ក្នុងអំឡុងពេលប្រឆាំងជំងឺកូវីដ១៩ ជូនអភិបាល ក្រុង ស្រុក ខណ្ឌ រៀបចមឡើងនៅថ្ងៃទី២០ ខែកក្កដា ឆ្នាំ២០២០ នាទីស្តីការក្រសួងសង្គមកិច្ច។

បន្ថែមពីលើនេះរដ្ឋមន្រ្តី វង សូត បានលើកឡើងថា ប្រជាពលរដ្ឋដែលនៅសេសសល់ សូមអញ្ជើញរួសរាន់មកបើកឲ្យបានមុនថ្ងៃកំណត់ សម្រាប់ជុំទី១នេះ ដែលបិទបញ្ចប់ថ្ងៃទី២៤ ខែកក្កដា ឆ្នាំ២០២០។ ដោយឡែក សម្រាប់ប្រជាពលរដ្ឋ ដែលបានបើករួចហើយ សូមអញ្ជើញទៅបើកជុំទី២ នៅថ្ងៃទី២៥ ខែកក្កដា រហូតដល់ថ្ងៃទី២៤ ខែសីហា ឆ្នាំ២០២០ ដែលនេះជាការជួយក្នុងខែទី២ របស់រាជរដ្ឋាភិបាលកម្ពុជា។

ជាមួយគ្នានោះ រដ្ឋមន្រ្តី វង សូត ក៏បានបន្តថា ដើម្បីឲ្យការអនុវត្តនេះ ទទួលបានជោគជ័យ ប្រកបដោយតម្លាភាព គណនេយ្យភាព និងកាត់បន្ថយនូវបញ្ហាប្រឈម ឲ្យបានជាអតិបរមានោះ គណៈកម្មាធិការដឹកនាំកម្មវិធីដែលជាអ្នកប្រតិបត្តិនៃការអនុវត្តកម្មវិធីនេះ ស្នើសុំការគាំទ្រ សហការ បន្តលើសកម្មភាពដូចខាងក្រោមនេះ៖

*ទី១៖ ស្នើសុំក្រុមការងារ របស់រាជរដ្ឋាភិបាលចុះមូលដ្ឋាន រាជធានី ខេត្ត បន្តចុះតាមដាន និងត្រួតពិនិត្យ ការកំណត់អត្តសញ្ញាណកម្មក្រីក្រទាំងតាមជុំ និងតាមការស្នើសុំការអនុវត្តកម្មវិធីឧបត្ថម្ភសាច់ជូនគ្រួសារក្រីក្រ និងងាយរងគ្រោះ ក្នុងអំឡុងជំងឺកូវីដ១៩

*ទី២៖ ស្នើសុំគណៈអភិបាល រាជធានីខេត្ត ក្រុង ស្រុក ខណ្ឌ ទាំងអស់បន្តជំរុញរដ្ឋបាល ឃុំសង្កាត់ ក្នុងការអនុវត្តឲ្យបានខ្ជាប់ខ្ជួន តាមប្រកាសលេខ១៦៦ ស.អ.យ ប្រក ចុះថ្ងៃទី១៥ ខែមិថុនា ឆ្នាំ២០២០ ស្តីពីការដាក់ឲ្យប្រើប្រាស់នីតិវិធី និងដំណើរការ អនុវត្តកម្មវិធីឧបត្ថម្ភ សាច់ប្រាក់ជូនគ្រួសារក្រីក្រ និងងាយរងគ្រោះ

*ទី៣៖ ស្នើសុំក្រសួងស្ថាប័ន និងគ្រប់ភាគីពាក់ព័ន្ធ ពិសេសរដ្ឋបាលថ្នាក់ក្រោមជាតិបន្តយ៉ាងសកម្មក្នុងការជួយផ្សព្វផ្សាយបន្ថែម អំពីកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះនៅអំឡុងពេលកូវីដ១៩ ដល់ប្រជាជននៅមូលដ្ឋាន ពិសេសគ្រួសារក្រីក្រ ដែលមានបណ្ណសមធម៌ មានសុពលភាព ដោយប្រើប្រាស់ប្រព័ន្ធឧគ្ឃោសនសព្វ ដូចយន្តការដែលបានប្រើប្រាស់នាពេលកន្លង ក្នុងការផ្សព្វផ្សាយពីជំងឺ កូវីដ១៩។

សូមបញ្ជាក់ថា ដើម្បីទទួលបានប្រាក់ឧបត្ថម្ភនេះ គ្រួសារក្រីក្រ និងងាយរងគ្រោះ ត្រូវមានបណ្ឌសមធម៌ ដែលមានសុពលភាព ដោយឈរលើកម្រិតភាពក្រីក្រ៖ ក្រ កម្រិត១ (ទីទ័លក្រ) ឬ ក្រកម្រិត២ (ក្រ) និងបានទៅផ្ទៀងផ្ទាត់បញ្ជីឈ្មោះ នៃកម្មវិធីឧបត្ថម្ភសាច់ប្រាក់ជូនគ្រួសារក្រីក្រ ក្នុងកំលុងពេលប្រយុទ្ធប្រឆាំងជំងឺកូវីដ១៩ នៅសាលាឃុំ សង្កាត់ណាមួយ។

លោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានគូសបញ្ជាក់ថា ការឧបត្ថម្ភសាច់ប្រាក់នេះនឹងត្រូវផ្តល់ជូនទៅតាមប្រភេទគ្រួសារក្រីក្រ និងងាយរងគ្រោះ។ ការឧបត្ថម្ភសាច់ប្រាក់នេះ កំណត់ដូចខាងក្រោម៖

*ទី១៖ តំបន់ទីប្រជុំជនក្នុងរាជធានីភ្នំពេញ

* «សម្រាប់បណ្ណ ក្រ-១» ៖ ក្នុង ១គ្រួសារទទួលបានប្រាក់ចំនួន ១២ ម៉ឺនរៀល បូកបន្ថែម ៥២០០០៛ សម្រាប់សមាជិកគ្រួសារម្នាក់ៗ ហើយបូកបន្ថែម៤ ម៉ឺនរៀល ម្នាក់ទៀត សម្រាប់សមាជិកនៅក្នុងគ្រួសារ ដែលជាកុមារអាយុក្រោម៥ ឆ្នាំ, ជនមានពិការភាព, ជនចាស់ជរាអាយុចាប់ពី ៦០ ឆ្នាំឡើង និងអ្នកផ្ទុកមេរោគអេដស៍។

* «សម្រាប់បណ្ណ ក្រ-២»៖ ក្នុង១គ្រួសារ ទទួលបានប្រាក់ចំនួន ១២ ម៉ឺនរៀល បូកបន្ថែម ៣៦ ០០០៛ សម្រាប់សមាជិកគ្រួសារម្នាក់ៗ ហើយបូកបន្ថែម ២៨ ០០០៛ម្នាក់ទៀត សម្រាប់សមាជិកនៅក្នុងគ្រួសារ ដែលជាកុមារអាយុក្រោម ៥ឆ្នាំ, ជនមានពិការភាព, ជនចាស់ជរាអាយុចាប់ពី ៦០ឆ្នាំឡើង និងអ្នកផ្ទុកមេរោគអេដស៍។

*ទី២៖ តំបន់ទីប្រជុំជនក្រៅពីរាជធានីភ្នំពេញ

* «សម្រាប់បណ្ណ ក្រ-១» ៖ ក្នុង ១គ្រួសារទទួលបានប្រាក់ចំនួន ១២ ម៉ឺនរៀល បូកបន្ថែម ៤ម៉ឺនរៀល)សម្រាប់សមាជិកគ្រួសារម្នាក់ៗ ហើយបូកបន្ថែម ៤ម៉ឺនរៀល ម្នាក់ទៀត សម្រាប់សមាជិកនៅក្នុងគ្រួសារ ដែលជាកុមារអាយុក្រោម ៥ ឆ្នាំ, ជនមានពិការភាព, ជនចាស់ជរាអាយុចាប់ពី ៦០ ឆ្នាំឡើង និងអ្នកផ្ទុកមេរោគអេដស៍ ។

* «សម្រាប់បណ្ណ ក្រ-២» ៖ ក្នុង ១គ្រួសារទទួលបានប្រាក់ចំនួន ១២ ម៉ឺនរៀល បូកបន្ថែម២៨ ០០០៛ សម្រាប់សមាជិកគ្រួសារម្នាក់ៗ ហើយបូកបន្ថែម ២៨ ០០០៛ ម្នាក់ទៀត សម្រាប់សមាជិកនៅក្នុងគ្រួសារ ដែលជាកុមារអាយុក្រោម ៥ឆ្នាំ, ជនមានពិការភាព, ជនចាស់ជរាអាយុចាប់ពី ៦០ ឆ្នាំ ឡើង និង អ្នកផ្ទុកមេរោគអេដស៍ ។

*ទី៣៖ តំបន់ជនបទ* «សម្រាប់បណ្ណ ក្រ១» ៖ ក្នុង ១គ្រួសារទទួលបានប្រាក់ចំនួន ៨ម៉ឺនរៀល បូកបន្ថែម ២៤ ០០០៛ សម្រាប់សមាជិកគ្រួសារម្នាក់ៗ ហើយបូកបន្ថែម ២៤ ០០០៛ ម្នាក់ទៀត សម្រាប់សមាជិកនៅក្នុង គ្រួសារ ដែលជាកុមារអាយុក្រោម ៥ ឆ្នាំ, ជនមានពិការភាព, ជនចាស់ជរាអាយុចាប់ពី ៦០ឆ្នាំ ឡើង និង អ្នកផ្ទុកមេរោគអេដស៍។

* «សម្រាប់បណ្ណ ក្រ-២» ៖ ក្នុង ១គ្រួសារទទួលបានប្រាក់ចំនួន ៨ ម៉ឺនរៀល បូកបន្ថែម ១៦ ០០០៛ សម្រាប់សមាជិកគ្រួសារម្នាក់ៗ ហើយបូកបន្ថែម១៦ ០០០៛ ម្នាក់ទៀត សម្រាប់សមាជិកនៅក្នុង គ្រួសារ ដែលជាកុមារអាយុក្រោម ៥ ឆ្នាំ, ជនមានពិការភាព, ជនចាស់ជរាអាយុចាប់ពី ៦០ឆ្នាំ ឡើង និងអ្នកផ្ទុកមេរោគអេដស៍៕