(ព្រះវិហារ)៖ កូនឈើចម្រុះចំនួន២,៥០៥ដើម ត្រូវបានដាំស្តារព្រៃឈើឡើងវិញ ក្នុងសហគមន៍ព្រះលាន តាមផ្លូវចូលរមណីយដ្ឋានអេកូទេសចរណ៍ទឹកធ្លាក់ព្រះនិម្មិត ក្បែរចំការគ្រញូងចាស់ ស្ថិតក្នុងភូមិកំពង់សាម៉ី ឃុំកំពង់ស្រឡៅពីរ ស្រុកឆែប ខេត្តព្រះវិហារ ជាប់ព្រំប្រទល់ប្រទេសឡាវ។
ពិធីនេះដាំកូនឈើចម្រុះនេះ បានប្រព្រឹត្តធ្វើឡើងក្រោមវត្តមានលោក មុត ភិសិទ្ធនា អភិបាលរងខេត្ត តំណាងលោក ប្រាក់ សុវណ្ណ អភិបាលខេត្តព្រះវិហារ, លោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត ព្រមទាំងមន្ត្រីរដ្ឋបាលព្រៃឈើ កងកម្លាំងប្រដាប់អាវុធ ប្រជាសហគមន៍ ព្រះសង្ឃ និងប្រជាពលរដ្ឋជាច្រើនរូបទៀត នាថ្ងៃទី៣១ ខែកក្កដា ឆ្នាំ២០២០ ម្សិលមិញ។
លោក ពឹង ទ្រីដា បានថ្លែងដោយក្តីសោមនស្សរីករាយជាអនេក ដែលខណ្ឌរដ្ឋបាលព្រៃឈើ ផ្នែករដ្ឋបាលព្រៃឈើ សង្កាត់រដ្ឋបាលព្រៃឈើ និងគណៈកម្មការសហគមន៍ព្រៃឈើព្រះលាន បានរៀបចំកម្មវិធីដាំស្តារព្រសឈើឡើងវិញ ដើម្បីចូលរួមអបអរសារទរ ពិធីរុក្ខទិវា ៩ កក្កដា។ លោកក៏បានថ្លែងនូវការកោតសរសើរ ចំពោះមន្ត្រីរដ្ឋបាលព្រៃឈើ បានសហការយ៉ាងល្អជាមួយគណៈកម្មការសហគមន៍ព្រះលាន ក្នុងការអនុវត្តគម្រោងជីវិត និងធម្មជាតិ ដើម្បីជំរុញដំណើរអភិវឌ្ឍន៍សហគមន៍ព្រៃឈើស្របតាមច្បាប់ស្តីពី ព្រៃឈើ។
លោក ពឹង ទ្រីដា បានបញ្ជាក់ថា មនុស្ស និងព្រៃឈើមានទំនាក់ទំនងគ្នាមិនអាចខ្វះបាន ហើយព្រៃឈើបានផ្តល់នូវធនធានជាច្រើន ដូចជា៖ ឈើអនុផលព្រៃឈើ ផ្សិត ផ្តៅ ស្លឹក សំបកឈើ ជរ័ទឹក ជរ័ចុង និងរុក្ខជាតិឱសថជាច្រើនទៀត សម្រាប់ជីវិតរស់នៅរបស់មនុស្សប្រចាំថ្ងៃ។ មិនត្រឹមតែប៉ុណ្ណោះវាបានផ្តល់នូវខ្យល់អាកាសបរិសុទ្ធ បង្កឱ្យមានភ្លៀងច្រើន សម្រាប់បង្កបង្កើនផល ហើយវាជួយការពារការហូរច្រោះទឹកជំនន់ និងគ្រោះរាំងស្ងួតទៀតផង។
ដោយឡែកលោក មុត ភិសិទ្ធនា បានថ្លែងនូវការកោតសរសើរដល់មន្ទីរកសិកម្មខេត្ត មន្ត្រីរដ្ឋបាលព្រៃឈើគ្រប់ផ្នែក កងកម្លាំងប្រដាប់អាវុធ ព្រះសង្ឃ ប្រជាសហគមន៍និងបងប្អូនប្រជាពលរដ្ឋយើង ដែលបានចូលរួមដាំដើមឈើស្តារព្រៃឈើឡើងវិញ។
លោកអភិបាលរងខេត្ត ក៏បានបំផុសឱ្យប្រជាពលរដ្ឋ ត្រូវចូលរួមដាំដើមឈើឡើងវិញទាំងឈើប្រណិត ឈើហូបផ្លែ តាមទីសាធារណៈ តាមលំនៅដ្ឋានរៀងខ្លួនៗ និងត្រូវចេះថែរក្សាការពារព្រៃឈើឱ្យបានគង់វង្ស៕
