(ពោធិ៍សាត់)៖ ដោយទទួលបានការសម្របសម្រួលពីលោក កូយ កាន់យ៉ា ព្រះរាជអាជ្ញាអយ្យការអមសាលាដំបូងខេត្តពោធិ៍សាត់ កម្លាំងនគរបាល ក្រុងពោធិ៍សាត់ ដឹកនាំលោកវរសេនីយ៍ឯក យឹម ស៊ាងហៃ អធិការនគរបាលក្រុង នៅរសៀលថ្ងៃទី១១ ខែសីហា ឆ្នាំ២០២០ បានចុះបង្ក្រាបបានជនសង្ស័យជួញដូរគ្រឿងញៀនម្នាក់ និងវត្ថុតាងបានមួយចំនួនធំ នៅភូមិស្ទឹងតូច សង្កាត់រលាប ក្រុងពោធិ៍សាត់។
ជនសង្ស័យជួញដូរគ្រឿងញៀនដែលបង្រ្កាបបាននេះមានឈ្មោះ ឆុន សុភារី ភេទប្រុស អាយុ២២ឆ្នាំ រស់នៅភូមិ ឃុំ ខាងលើ ដោយបានដកហូតវត្ថុតាងរួមមាន ម្សៅក្រាមពណ៍សថ្លា ចំនួន២១កញ្ចប់ (ធំ០១កញ្ចប់ នឹងតូច ២០កញ្ចប់), ជញ្ជីងថ្លឹង ថ្នាំញៀនចំនួន១, ថង់ផ្លាស្ទិចសម្រាប់ច្រក់គ្រឿងញៀនមួយចំនួន, ទុយោបឺតមួយចំនួន, ដែកកេះ១ដើម, កូនកាបូបតូ១, កាំបិតកែច្នៃចំនួន២ដើម, ទូរស័ព្ទដៃ ៥គ្រឿង និងម៉ូតូ ១គ្រឿង។
បច្ចុប្បន្នជនសង្ស័យរួមជាមួយនឹងវត្ថុតាង បានឃាត់ខ្លួន និងរក្សាទុកនៅអធិការដ្ឋាននគរបាលក្រុងពោធិ៍សាត់ ដើម្បីកសាងនិតិវិធីទៅតាមផ្លូវច្បាប់៕
