(កំពង់ធំ)៖ ដោយមេីលឃេីញពីទុក្ខលំបាកវេទនា និងគួរឲ្យអាណិតអាសូរជាពន់ពេកនោះ នៅព្រឹកថ្ងៃសៅរ៍ ទី ២៩ ខែសីហា ឆ្នាំ២០២០នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យ លោកស្រី ម៉ែន នារីសោភ័គ អគ្គលេខាធិការរងទី ១ និងសហការី រួមជាមួយនឹងសាខាកាកបាទក្រហមកម្ពុជា ខេត្តកំពង់ធំ ចុះសួរសុខទុក្ខ និងនាំយកអំណោយរួមមាន ស្បៀង សម្ភារ និងថវិកាចំនួន ១០លានរៀល ផ្តល់ជូនគ្រួសារ ស្ត្រីឈ្មោះ តឹប ទុំ និងកូនស្រី រស់នៅភូមិសំណាក ឃុំកកោះ ស្រុកសន្ទុក ខេត្តកំពង់ធំ ដែលធ្លាក់ខ្លួនពិការជេីង ត្រូវកាត់ចេញសល់ត្រឹមជង្គង់ ដោយសារគ្រោះថ្នាក់ចរាចរណ៍ ក្នុងពេលធ្វេីដំណេីរទៅជួយធ្វើការងារប្តី ជាកម្មករដាប់ថ្ម នៅស្រុករវៀង ខេត្តព្រះវិហារ ។
ក្នុងឱកាសចុះសួរសុខទុក្ខនោះ លោកស្រី អគ្គលេខាធិការរងទី១ បានពាំនាំប្រសាសន៍ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលផ្តាំផ្ញើក្តីអាណិតអាសូរ និងការសោកស្តាយយ៉ាងក្រៃលែង ចំពោះឧបទ្ទវហេតុគ្រោះថ្នាក់ចរាចរណ៍ដែលបណ្តាលឱ្យមានគ្រោះថ្នាក់ដ៏ធ្ងន់ធ្ងរនេះ។
ជាមួយគ្នានេះ លោកស្រី បានផ្តាំផ្ញើ និងលេីកទឹកចិត្តឱ្យថែទាំសុខភាព ឱ្យបានល្អ រក្សាអនាម័យក្នុងការរស់នៅ ជាពិសេសត្រូវមានស្មារតីរឹងប៉ឹង ត្រូវខិតខំតស៊ូ ទោះជាពិការកាយតែមិនពិការចិត្ត ដេីម្បីជីវិតរស់នៅបន្តទៅមុខ ទៀត ។
ទន្ទឹមនឹងនេះ ដែរ លោកស្រី ក៏បានអំពាវនាវដល់ប្រជាពលរដ្ឋទាំងអស់ សូមមានស្មារតីប្រុងប្រយ័ត្នជានិច្ចការពារពីការឆ្លងជំងឺកូវីដ-១៩ ជាពិសេសត្រូវចូលរួមអនុវត្តច្បាប់ចរាចរណ៍ផ្លូវគោកឱ្យបានខ្ជាប់ខ្ជួន ដេីម្បីសេចក្តីសុខ និងសុភមង្គលក្នុងក្រុមគ្រួសារ។
ក្រុមគ្រួសាររងគ្រោះ បានថ្លែងអំណរគុណយ៉ាងជ្រាលជ្រៅបំផុតចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជាមាតាមនុស្សធម៌ ដែលតែងតែគិតគូរពីទុក្ខលំបាករបស់ប្រជាពលរដ្ឋរងគ្រោះទាំងអស់ ដោយគ្មានការរើសអើងអ្វីឡើយ ៕
