(កណ្ដាល)៖ លោកបណ្ឌិត គង់ សោភ័ណ្ឌ អភិបាលខេត្តកណ្ដាល បានលើកទឹកចិត្ត និងជំរុញយុវជនទាំងអស់ឱ្យចៀសឆ្ងាយពីទង្វើអបាយមុខទាំងឡាយ ប៉ុន្តែជំនួសមកវិញនូវការប្រមូលគ្នា លេងកីឡាឱ្យបានច្រើនៗ ដើម្បីមានសុខភាពល្អ ហើយខិតខំរៀនសូត្រ ដើម្បីក្លាយជាធនធានដ៏ខ្លាំងរបាកម្ពុជា ក្នុងការជួយកសាងប្រទេសជាតិយើងឱ្យរីកចំរើនទៅមុខជាលំដាប់។

លោកបណ្ឌិតអភិបាលខេត្ត បានថ្លែងយ៉ាងដូច្នេះ នៅគ្រាដែលលោកអញ្ជើញបិទការប្រកួតកីឡាមហាជនជ្រើសរើសជើងឯកខេត្តកណ្តាល ឆ្នាំ២០២០ នៅវិទ្យាល័យ ជ័យវរ្ម័នទី៧ ស្ថិតក្នុងស្រុកកៀនស្វាយ ខេត្តកណ្តាល នារសៀលថ្ងៃទី១១ ខែកញ្ញា ឆ្នាំ២០២០នេះ។

លោកបណ្ឌិត គង់ សោភ័ណ្ឌ បានអំពាវនាវដល់អាជ្ញាធរក្រុង-ស្រុក ទាំងអស់ក្នុងខេត្ត ត្រូវពង្រឹងកីឡាគ្រប់ប្រភេទ និងនាំគ្នាលេងកីឡាជាប្រចាំ ព្រោះកីឡាបង្កើតនូវសាមគ្គីភាព ឯកភាពគ្នា មានសុខភាពល្អ និងចៀសឆ្ងាយពីគ្រឿងញៀន។

លោកបណ្ឌិតអភិបាលខេត្តបន្តថា រាជរដ្ឋាភិបាលដែលមានសម្ដេចតេជោ ប្រមុខដឹកនាំដ៏ឆ្នើម បានដាក់ចេញនូវគោលនយោបាយជាតិ នៃការអភិវឌ្ឍអប់រំកាយ និងកីឡា ក្នុងគោលបំណង លើកកម្ពស់សិទ្ធិ ឱកាស និងបណ្ដុះវប្បធម៌អប់រំកាយ និងកីឡាដល់ប្រជាជនគ្រប់រូប ឱ្យមានសុខភាពល្អ និងសុខមាលភាពល្អ កាយសម្បទារឹងមាំ ឆន្ទៈមោះមុត អំណត់ព្យាយាម វិន័យ ស្មារតីក្រុម គំនិតច្នៃប្រឌិត និងមានការតស៊ូស្វិតស្វាញ សំដៅដណ្ដើមបានលទ្ធផលល្អប្រសើរ ក្នុងការប្រកួតកីឡាទាំងនៅថ្នាក់ជាតិ និងលើឆាកអន្តរជាតិ។

លោកបណ្ឌិត គង់ សោភ័ណ្ឌ បានកោតសរសើរ ដល់កីឡាករ កីឡាការិនី ដែលបានតស៊ូយ៉ាងស្វិតស្វាញ ប្រកបដោយភាពស្វាហាប់ គោរពបាននូវក្រមសីលធម៌ និងវិន័យ រហូតដណ្ដើម បានជ័យលាភី នាឱកាសនេះផងដែរ។

សម្រាប់កីឡាករ កីឡាការិនី ដែលមិនទទួលបានជ័យលាភី មិនត្រូវមានការអស់សង្ឃឹមឡើយ ត្រូវខិតខំពង្រឹងសមត្ថភាពបន្ថែមទៀត ដើម្បីចូលរួមក្នុងការប្រកួត នៅលើកក្រោយៗទៀត ឱ្យទទួលបានជ័យលាភីផងដែរ។ ជាងនេះទៅទៀត កីឡាករ កីឡាការិនី ដែលទទួលបានជ័យលាភីហើយ ត្រូវខិតខំពង្រឹងសមត្ថភាពរបស់ខ្លួនបន្ថែមទៀត ព្រោះថាប្រទេសកម្ពុជា នឹងមានកិត្តិយសជាប្រវត្តិសាស្ត្រ ក្នុងការធ្វើជាម្ចាស់ផ្ទះប្រកួតកីឡាស៊ីហ្គេមលើកទី៣២ នៅឆ្នាំ២០២៣ ខាងមុខនេះ។

ក្នុងឱកាសនោះដែរ លោកបណ្ឌិតអភិបាលខេត្ត ក៏បានសំណូមពរដល់បងប្អូនប្រជាពលរដ្ឋទាំងអស់ សូមចូលរួមអនុវត្តឱ្យបាននូវវិធានការរបស់ក្រសួងសុខាភិបាល ក្នុងការបង្ការ ទប់ស្កាត់ ការឆ្លងរីករាលដាល នៃជំងឺកូវីដ១៩ ព្រោះថា នៅលើពិភពលោកនេះមិនទាន់មានថ្នាំព្យាបាលនៅឡើយទេ។

ជាងនេះទៅទៀត លោកបណ្ឌិតក៏បានសំណូមពរដល់ប្រជាពលរដ្ឋ សូមចូលរួមគោរពច្បាប់ចរាចរណ៍ ដើម្បីការពារអាយុជីវិតខ្លួនឯង អ្នកដទៃ និងក្រុមគ្រួសារផងដែរ។ ហើយអាជ្ញាធរមូលដ្ឋាន ត្រូវអនុវត្តឱ្យបាន នូវគោលនយោបាយរបស់ភូមិ-ឃុំមានសុវត្ថិភាពទាំង៩ ចំណុច ដើម្បីភាពសុខសាន្តរបស់ប្រជាពលរដ្ឋនៅក្នុងមូលដ្ឋានរបស់ខ្លួន។

លោក ចេង សំអ៊ុល ប្រធានមន្ទីរអប់រំ យុវជន និងកីឡាខេត្តកណ្ដាល បានឲ្យដឹងថា ការប្រកួតកីឡាមហាជននាពីនេះ មាន៣ផ្នែក គឺផ្នែកកីឡាបាល់ទាត់ មានចំនួន ១៨ក្រុម នារី ៦ក្រុម ផ្នែកកីឡាបាល់ទះ មានចំនួន ១១ ក្រុម នារី ៥ ក្រុម និងផ្នែកកីឡាទាញព្រ័ត្រ មាន ១២ក្រុម នារី ៦ក្រុម។

ផ្នែកកីឡាបាល់ទាត់ បុរសជ័យលាភីលេខ១បានទៅលើ ក្រុមយុវជន វិទ្យាល័យជ័យវរ្ម័នទី ៧ លេខ២ បានទៅលើ ក្រុមនគរបាលព្រហ្មទណ្ឌខេត្ត និងលេខ៣ បានទៅលើក្រុម ស ស យ ក ស្រុកល្វាឯម។ បាល់ទាត់នារី ជ័យលាភីលេខ១ បានទៅលើក្រុមNERC លេខ ២ បានទៅលើក្រុម ស ស យ ក ស្រុកស្អាងA និងលេខ៣ បានទៅលើក្រុម ស ស យ ក ស្រុកស្អាងB។

ផ្នែកបាល់ទះបុរស ជ័យលាភីលេខ ១ បានទៅលើក្រុមសម្រែកយុវជនព្រែកតាពៅ លេខ២ បានទៅលើក្រុមយុវជនក្រាំងយ៉ូវ និងលេខ៣ បានទៅលើក្រុមយុវជនស្រុកស្អាង។ ផ្នែកបាល់ទះនារីជ័យលាភីលេខ១ បានទៅលើក្រុមរួមចិត្តតែមួយ លេខ២ បានទៅលើក្រុមវិទ្យាល័យព្រែកស្លែង និងលេខ៣ បានទៅលើក្រុមឃុំគោកត្រប់។ ផ្នែកកីឡាទាញព្រ័ត្រ បុរសជ័យលាភីលេខ១ បានទៅលើក្រុមភូមិព្រែកហូរកើត១ លេខ២ បានទៅលើក្រុមភូមិព្រែកហូរកើត២ និងលេខ៣ បានទៅលើក្រុមយុវជនU18។ ផ្នែកកីឡាទាញព្រ័ត្រនារី ជ័យលាភីលេខ១ បានទៅលើក្រុមរួមចិត្តតែមួយ១ លេខ ២ បានទៅលើក្រុមភូមិព្រែកហូរកើត និងលេខ៣ បានទៅលើក្រុមរួមចិត្តតែមួយ២ ៕