(ភ្នំពេញ)៖ អគ្គលេខាធិការ អង្គការសហប្រតិបត្តិការឥស្លាម (OIC) លោក យូសហ្វ អះម៉ាត់ អាល់អូស្សៃម៉ីន តាមរយៈ លោកទេសរដ្ឋមន្រ្តី អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស នៃព្រះរាជាណាចក្រកម្ពុជា បេសជនពិសេសរបស់កម្ពុជា ប្រចាំអង្គការសហប្រតិបត្តិការឥស្លាម បានផ្ញើលិខិតមួយច្បាប់ ថ្លែងអំណរគុណ និងកោតសរសើររាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ដែលបានសម្រួលដល់សាសនិកឥស្លាម បានប្រតិបត្តិសកម្មភាពសាសនាឡើងវិញ នៅក្នុងអំឡុងនៃការរីករាលដាលជំងឺកូវីដ១៩នេះ។

តាមរយៈលិខិតរបស់ខ្លួន លោក យូសហ្វ អះម៉ាត់ អាល់អូស្សៃម៉ីន បានកោតសរសើរដល់រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោនាយករដ្ឋមន្រ្តី ក្នុងការប្រយុទ្ធប្រឆាំងជំងឺកូវីដ១៩ ប្រកបដោយជោគជ័យ។ ជាមួួយគ្នានេះដែរ អង្គការនេះ ក៏បានថ្លែងអំណរគុណដល់រាជរដ្ឋាភិបាលកម្ពុជា ដែលបានសម្រួលដល់សាសនិកឥស្លាមបានប្រតិបត្តិសកម្មភាពសាសនាឡើងវិញ នៅតាមវិហារ បន្ទាប់ពីបានបិទទ្វារបណ្ដោះអាសន្នរយៈពេល ២៥ សប្តាហ៍ ក្នុងការទប់ស្កាត់ និងបង្ការជំងឺកូវីដ១៩។

លិខិតរបស់អគ្គលេខាធិការ OIC កោតសរសើរកម្ពុជា គឺបានឆ្លើយតបចំពោះលិខិត៣ច្បាប់របស់ លោក អូស្មាន ហាស្សាន់ ដែលបានផ្ញើជូនអង្គការឥស្លាមធំសំខាន់ៗ រួមមាន៖ អង្គការសហប្រតិបត្តិការឥស្លាម OIC អង្គការសម្ព័ន្ធពិភពឥស្លាម RABITA និងក្រុមប្រឹក្សាសហគមន៍មូស្លិម ពិភពលោក WMCC បន្ទាប់ពីស្ថានការណ៍ជំងឺកូវីដ១៩ នៅកម្ពុជា មានសភាពថមថយ ក្រោមការដឹកនាំប្រយុទ្ធប្រឆាំង និងបង្ការទប់ស្កាត់របស់ សម្តេចតេជោ ហ៊ុន សែន។

លោក យូសហ្វ អះម៉ាត់ អាល់អូស្សៃម៉ីន បានចាត់ទុកថា កម្ពុជាជាប្រទេសគំរូដ៏ល្អប្រសើរ នៃការអត់ឱន សន្តិសហវិជ្ជមាន និងសមាហរណកម្មវិជ្ជមាន ដល់ខ្មែរឥស្លាមនៅក្នុងសង្គមកម្ពុជា ដូចមានក្នុងលិខិតជូនភ្ជាប់ជាមួយ។ ជាមួយគ្នានេះដែរ លោកបានកោតសសើរជាថ្មី ចំពោះទំនាក់ទំនងមិត្តភាព រវាងអង្គការសហប្រតិបត្តិការឥស្លាម និងប្រទេសកម្ពុជា និងសូមបញ្ជាក់នូវការបន្តកិច្ចប្រឹងប្រែងពង្រឹងកិច្ចសន្ទនា និងកិច្ខសហប្រតិបត្តិការប្រកបដោយផ្លែផ្កា រវាងភាគីទាំងពីរលើគ្រប់វិស័យ ជាពិសេសប្រទេសកម្ពុជា កំពុងធ្វើជាគំរូដ៏ល្អប្រសើរ សម្រាប់ការអត់ឱន សន្តិវិជ្ជមាន និងសមាហរណកម្មវិជ្ជមានដល់ខ្មែរឥស្លាមនៅក្នុងសង្គមកម្ពុជា៕

ខាងក្រោមនេះជាលិខិតរបស់អគ្គលេខាធិការ អង្គការសហប្រតិបត្តិការឥស្លាម (OIC)៖