(ភ្នំពេញ)៖ ក្រុមប្រឹក្សាធម្មនុញ្ញនៅព្រឹកថ្ងៃទី១៧ ខែវិច្ឆិកា ឆ្នាំ២០២០នេះ បានបើកសវនាការពិនិត្យ និងសម្រេចលើបណ្តឹងរបស់ភ្នាក់ងារគណបក្សសម្ព័ន្ធដើម្បីប្រជាធិបតេយ្យ (LDP) ដែលមិនសុខចិត្តលើសេចក្តីសម្រេចរបស់គណៈកម្មាធិការជាតិរៀបចំការបោះឆ្នោត (គ.ជ.ប) ពាក់ព័ន្ធនឹងការចុះឈ្មោះបោះឆ្នោតនៅឃុំបួរ ស្រុកភ្នំព្រឹក ខេត្តបាត់ដំបង។

សវនាការធ្វើឡើងនៅអគារស នៃវិមានរដ្ឋចំការមន ក្រោមអធិបតីភាពលោក អ៉ឹម ឈុនលឹម ប្រធានក្រុមប្រឹក្សាធម្មនុញ្ញ ព្រមទាំងមានការយាង និងអញ្ជើញចូលរួមពីសមាជិក សមាជិកា៨អង្គ/រូប។

បន្ទាប់ពីបានពិនិត្យ និងពិភាក្សាលើពាក្យបណ្តឹងនេះទៅ ក្រុមប្រឹក្សាធម្មនុញ្ញបានសម្រេចលើកចោលនូវពាក្យបណ្តឹងនេះ ហើយបិទផ្លូវតវ៉ាផងដែរ។

លោក ព្រហ្ម វិចិត្រអក្ខរា អ្នកនាំពាក្យក្រុមប្រឹក្សាធម្មនុញ្ញ បានប្រាប់អង្គភាពព័ត៌មាន Fresh News ថា ការលើកចោលនូវពាក្យបណ្តឹងនេះ ដោយសារអ្នកប្តឹងពុំមានគុណវុឌ្ឍិក្នុងការប្តឹងមកក្រុមប្រឹក្សាធម្មនុញ្ញ ស្របតាមច្បាប់កំណត់។ ករណីនេះចាត់ទុកជាបណ្តឹងមានលក្ខណៈផ្ទុយច្បាប់ ពីព្រោះអ្នកប្តឹងពុំមែនជាអ្នករងឥទ្ធិពលផ្ទាល់ពីសេចក្តីសម្រេចរបស់ គ.ជ.ប នោះទេ។

បើតាមអ្នកនាំពាក្យរូបនេះ ការសម្រេចរបស់ក្រុមប្រឹក្សាធម្មនុញ្ញ យោងទៅតាមមាត្រា១៦៤ នៃច្បាប់ស្តីពីការបោះឆ្នោត និងផ្អែកលើមាត្រា ២៦.៦ថ្មី និងមាត្រា ២៨ថ្មី នៃច្បាប់ស្តីពីការរៀបចំ និងប្រព្រឹត្តទៅនៃក្រុមប្រឹក្សាធមន្មនុញ្ញ។

មាត្រា១៦៤ នៃច្បាប់ស្តីពីការបោះឆ្នោត បានគូសបញ្ជាក់ថា បុគ្គលដែលទទួលរងឥទ្ធិពលដោយផ្ទាល់ពីសេចក្តីសម្រេចរបស់គណៈកម្មាធិការជាតិរៀបចំការបោះឆ្នោត អាចប្តឹងតវ៉ាជាលាយលក្ខណ៍អក្សរទៅក្រុមប្រឹក្សាធម្មនុញ្ញក្នុងអំឡុងពេល ៧២ម៉ោង បន្ទាប់ពីកាលបរិច្ឆេទទទួលបានសេចក្តីសម្រេច។

ដោយឡែកមាត្រា ២៨ថ្មី នៃច្បាប់ស្តីពីវិសោធនកម្មមាត្រា២៦ មាត្រា២៧ថ្មី មាត្រា២៨ មាត្រា៣១ និងមាត្រា៣២ នៃច្បាប់ស្តីពីការរៀបចំ និងការប្រព្រត្តិទៅនៃក្រុមប្រឹក្សាធម្មនុញ្ញ បានកំណត់ថា បណ្តឹងដែលមានលក្ខណ:ផ្ទុយច្បាប់ ដែលចំណុចខ្វះខាតមិនអាចកែតម្រូវបាន ក្រុមប្រឹក្សាធម្មនុញ្ញអាចសម្រេចលើកបណ្តឹងចោលដោយមិនចាំបាច់ឆ្លងកាត់ការទាញហេតុផល។ ។

លោក ព្រហ្ម វិចិត្រអក្ខរា បានបញ្ជាក់ដូច្នេះ «អ្នកដែលបានដាក់ពាក្យប្តឹងនៅក្រុមប្រឹក្សាធម្មនុញ្ញហ្នឹង គឺគាត់ពុំមានគុណវុឌ្ឍិក្នុងការប្តឹងទេ ដោយសារគាត់មិនមែនជាអ្នករងឥទ្ធិពលផ្ទាល់ពីសេចក្តីសម្រេចរបស់ គ.ជ.ប ដូចនេះជាបណ្តឹងដែលមានលក្ខណៈផ្ទុយច្បាប់។ អ៊ីចឹងបានជាអង្គសវនាការព្រឹកមិញនេះ មើលឃើញនូវចំណុចផ្លូវច្បាប់ទាំងអស់ហ្នឹង ក្រុមប្រឹក្សាធម្មនុញ្ញក៏សម្រេចលើកបណ្តឹងហ្នឹងចោល»។

សូមរំលឹកថា កាលពីថ្ងៃទី២៦ ខែតុលា ឆ្នាំ២០២០ លោក ម៉ក់ តាំងយូ តំណាងទទួលសិទ្ធិពីឈ្មោះ នៅ សំអាត ដែលជាតំណាងឱ្យអ្នកប្តឹងដំបូងឈ្មោះ យ៉ុន យឿម ជាភ្នាក់ងារគណបក្សសម្ព័ន្ធដើម្បីប្រជាធិបតេយ្យ បានប្តឹងទៅ គ.ជ.ប ឱ្យដាក់ពិន័យក្រុមចុះឈ្មោះបោះឆ្នោត និងលុបចោលការផ្ទេចូលរបស់ប្រជាពលរដ្ឋមួយចំនួននៅក្នុងឃុំបួរ ស្រុកភ្នំព្រឹក ខេត្តបាត់ដំបង បន្ទាប់ពីពួកគេអះអាងថា ការចុះឈ្មោះនោះធ្វើខុសនឹងនីតិវិធីនៃការចុះបញ្ជីឈ្មោះបោះឆ្នោត។

បន្ទាប់ពីបានទទួលបណ្តឹងនោះ គ.ជ.ប ក៏បានយកមកពិនិត្យ និងស្រាវជ្រាវលើបញ្ហាទាំងអស់នេះ ហើយឈានដល់សេចក្តីសម្រេចមួយនៅថ្ងៃទី០៦ ខែវិច្ឆិកា ឆ្នាំ២០២០កន្លងទៅ។ ក្រុមប្រឹក្សាជំនុំជម្រះ នៃគ.ជ.ប បានសម្រេចបដិសេធចោលបណ្តឹងនេះដោយខុសនឹងគតិច្បាប់។

ក្នុងសេចក្តីសម្រេចរបស់ក្រុមប្រឹក្សាជំនុំជម្រះនៃគណៈកម្មាធិការជាតិរៀបចំការបោះឆ្នោត បានលើកឡើងថា ប្រជាពលរដ្ឋទាំង ១២នាក់ ដែលភ្នាក់ងារគណបក្សសម្ព័ន្ធដើម្បីប្រជាធិបតេយ្យប្តឹងនេះ មានលក្ខខណ្ឌគ្រប់គ្រាន់ ដើម្បីមានឈ្មោះក្នុងបញ្ជី បោះឆ្នោតនៃឃុំបួរ ស្រុកភ្នំព្រឹក ខេត្តបាត់ដំបង ស្របតាមមាត្រា៤៦ នៃច្បាប់ស្ដីពីការបោះឆ្នោតជ្រើសតាំងតំណាងរាស្ត្រ។ ក៏ប៉ុន្តែសាមីខ្លួនពុំមានឯកសារយោងគ្រប់គ្រាន់ដើម្បីចុះឈ្មោះបោះឆ្នោត ស្របតាមលក្ខខណ្ឌកំណត់ក្នុងមាត្រា៥១ នៃច្បាប់ស្ដីពីការបោះឆ្នោតជ្រើសតាំងតំណាងរាស្ត្រ និង ក្រោមចំណុច ៦.៤.៦ នៃបទបញ្ជា និងនីតិវិធីសម្រាប់ការពិនិត្យបញ្ជីឈ្មោះ និងការចុះឈ្មោះ បោះឆ្នោតប្រចាំឆ្នាំ។

ក្រុមប្រឹក្សាជំនុំជម្រះបន្ថែមថា ក្រុមចុះឈ្មោះបោះឆ្នោតនៃឃុំបួរ ពុំបានប្រព្រឹត្តដោយចេតនាទុច្ចរិតចុះឈ្មោះបោះឆ្នោតដល់ប្រជាពលរដ្ឋ ដែលពុំបំពេញលក្ខខណ្ឌគ្រប់គ្រាន់អាចបោះឆ្នោតបាននោះទេ។ ក្រុមចុះឈ្មោះបោះឆ្នោតនៃឃុំបួរ ពុំបានប្រព្រឹត្តអំពើក្លែងបន្លំឯកសារបញ្ជាក់ អត្តសញ្ញាណជូនជនណាម្នាក់ ដើម្បីប្រើសម្រាប់ការ ចុះឈ្មោះបោះឆ្នោតនោះទេ។

ក្រុមប្រឹក្សាជំនុំជម្រះ ក៏បានរកឃើញថា ប្រធានក្រុមចុះឈ្មោះបោះឆ្នោតនៃឃុំបួរ អនុវត្តនីតិវិធី ចុះឈ្មោះបោះឆ្នោតជូនប្រជាពលរដ្ឋ មិនបានត្រឹមត្រូវស្របតាមគោលការណ៍កំណត់ក្នុងចំណុច ៦.៤.២៤ នៃបទបញ្ជា និងនីតិវិធីសម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ ដែលគប្បីគណៈកម្មាធិការជាតិរៀបចំការបោះឆ្នោត គួរធ្វើការក្រើនរំលឹកដល់ប្រធានក្រុមចុះឈ្មោះបោះឆ្នោតឱ្យដឹងពីកំហុសឆ្គង ជៀសវាងការប្រព្រឹត្តកំហុសឆ្គងនេះម្ដងទៀតនៅពេលក្រោយ។

ក្នុងសេចក្តីសម្រេច ក៏បានបញ្ជាក់ថា ការជំទាស់អំពីភាពមានសិទ្ធិមានឈ្មោះក្នុងបញ្ជីបោះឆ្នោតនៃជនណាម្នាក់ ត្រូវធ្វើឡើងតាមរយៈពាក្យបណ្ដឹងជំទាស់នៅពេលបិទផ្សាយបញ្ជីបោះឆ្នោតដំបូង តាមលក្ខខណ្ឌដូចមានចែងក្នុងមាត្រា ៦១ នៃច្បាប់ស្ដីពីការបោះឆ្នោតជ្រើសតាំងតំណាងរាស្ត្រ។

ក្នុងសេចក្តីសម្រេចរបស់ក្រុមប្រឹក្សាជំនុំជម្រះរបស់ គ.ជ.ប បានគូសបញ្ជាក់ដែរថា បណ្តឹងរបស់លោក ម៉ក តាំងយូ ពុំមានមូលដ្ឋានគតិយុត្តត្រឹមត្រូវ ដែលអាចឱ្យគណៈកម្មាធិការជាតិរៀបចំការបោះឆ្នោត ដាក់ពិន័យក្រមចុះឈ្មោះបោះឆ្នោតនៃឃុំបួរ ស្របតាមបញ្ញត្តិនៃមាត្រា ១៤១ នៃច្បាប់ស្ដីពីការបោះឆ្នោតជ្រើសតាំងតំណាងរាស្ត្រនោះឡើយ៕