(ព្រៃវែង)៖ រដ្ឋបាលខេត្តព្រៃវែង បានចេញលិខិតថ្លែងអំណរគុណសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ចំពោះការផ្តល់ថវិកា ៥០លានរៀល ដើម្បីផ្តល់ជូនប្រជាពលរដ្ឋក្រីក្រ ដែលមានការពាក់ព័ន្ធនឹងព្រឹត្តិការណ៍សហគមន៍ ២៨វិច្ឆិកា ដែលត្រូវធ្វើចត្តាឡីស័ករយៈពេល ១៤ថ្ងៃ ស្របតាមវិធានការសុខាភិបាល។ នេះបើតាមលិខិតថ្លែងអំណរគុណ ដែលបណ្តាញព័ត៌មាន Fresh News ទទួលបាននៅថ្ងៃទី០៦ ខែធ្នូ ឆ្នាំ២០២០។

រដ្ឋបាលខេត្តព្រៃវែង បានបញ្ជាក់ក្នុងលិខិតនោះថា៖ «ការជួយឧបត្ថម្ភរបស់សម្តេចតេជោ ហ៊ុន សែន នាយករដ្ឋមន្ត្រី នាពេលនេះ គឺពិតជាសរបញ្ជាក់ឲ្យឃើញ កាន់តែប្រត្យក្សថែមទៀត ពីការយកចិត្តទុកដាក់របស់សម្តេចតេជោ អំពីសុខទុក្ខ និងតម្រូវការ របស់ប្រជាពលរដ្ឋ នៅគ្រប់ពេលវេលា គ្រប់កាលៈទេសៈ និងគ្រប់ទីកន្លែងទាំងអស់ដែលបានជួបប្រទះនូវការលំបាក ហើយដែលជំនួយឧបត្ថម្ភដ៏ថ្លៃថ្លានេះ មិនត្រឹមតែជួយឧបត្ថម្ភគាំទ្រ ដល់ការរស់នៅរបស់ប្រជាពលរដ្ឋ ក្នុងខេត្តព្រែវែង ក្នុងអំឡុងពេល នៃការធ្វើចត្តាឡីស័ក រយៈពេល១៤ថ្ងៃ ប៉ុណ្ណោះទេ ប៉ុន្តែ ក៏នឹងជាចំណែកមួយដ៏សំខាន់ចូលរួមពង្រឹង ការអនុវត្តយុទ្ធនាការប្រយុទ្ធប្រឆាំងនឹងការឆ្លងរីករាលដាលនៃជំងឺកូវដ-១៩ ចូលទៅក្នុងសហគមន៍ ជាពិសេសនៅក្នុងពេលបច្ចុប្បន្ន ដែលរាជរដ្ឋាភិបាលកំពុងដោះស្រាយបញ្ហាព្រឹត្តិការណ៍សហគមន៍ ២៨វិច្ឆិកា»។

គួរំលឹកថា នៅព្រឹកថ្ងៃទី៣០ ខែវិច្ឆិកា ឆ្នាំ២០២០ សម្តេចតេជោ ហ៊ុន សែន បានប្រកាសសម្រេចទម្លាក់ថវិកាជាង១ពាន់លានរៀល ទៅកាន់រាជធានី-ខេត្តទូទាំងប្រទេស ព្រមទាំងបានកំណត់ សម្រេចផ្តល់ថវិកាជួយពលរដ្ឋក្រីក្រមួយគ្រួសារសរុប៣០ម៉ឺនរៀល ក្នុងរយៈពេល១៥ថ្ងៃនៃការធ្វើចត្តាឡីស័ក ស្មើ ២ម៉ឺនរៀល ក្នុងមួយថ្ងៃ។ ទឹកប្រាក់ដែលប្រមុខរាជរដ្ឋាភិបាលទម្លាក់ ទៅកាន់សាលារាជធានីភ្នំពេញ និងតាមបណ្តាខេត្តនានាទូទាំងប្រទេស សរុបចំនួន ១,១៧០,០០០,០០០រៀល៕