(ភ្នំពេញ)៖ រដ្ឋាភិបាលជប៉ុន បានផ្តល់ថវិកា ១៨៧,៦៨២ដុល្លារអាមេរិកទៀតដល់កម្ពុជា សម្រាប់ការដំឡេីងប្រព័ន្ធផ្គត់ផ្គង់ទឹកស្អាតបំពង់ខ្នាតតូចនៅកោះពាមរាំង ខេត្តព្រៃវែង និងការសាងសង់អគារសិក្សានៅអនុវិទ្យាល័យខ្យង ក្នុងស្រុកជ័យសែន ខេត្តព្រះវិហារ ក្រោមគ្រោងការណ៍ជំនួយឧបត្ថម្ភឥតសំណង សម្រាប់គម្រោងទ្រង់ទ្រាយតូចសន្តិសុខមនុស្សជាតិ (ជំនួយគូសាណូណិ)។

កិច្ចសន្យាផ្តល់ជំនួយនេះត្រូវបានចុះហត្ថលេខានៅរសៀលថ្ងៃទី១៥ ខែមករា ឆ្នាំ២០២១ រវាងលោក មិកាមិ ម៉ាសាហ៊ីរ៉ូ ឯកអគ្គរាជទូតវិសាមញ្ញនិងពេញសមត្ថភាព របស់ប្រទេសជប៉ុនប្រចាំនៅកម្ពុជា និងលោក ថៃ ឡូ ប្រធានសមាគមទឹកកម្ពុជា, លោក ចេង លឹមហ៊ាន់ ប្រធានមន្ទីរអប់រំ យុវជន និងកីឡាខេត្តព្រះវិហារ ដែលបានធ្វើឡើងនៅស្ថានទូតជប៉ុនប្រចាំកម្ពុជា។

លោក មិកាមិ ម៉ាសាហ៊ីរ៉ូ បានថ្លែងថា ចាប់តាំងពីឆ្នាំ១៩៩១ បន្ថែមលើគម្រោងឥណទាន និងជំនួយឥតសំណងខ្នាតធំ រដ្ឋាភិបាលជប៉ុន បាននិងកំពុងអនុវត្តកម្មវិធី KUSANONE នៅកម្ពុជា ដើម្បីជួយដល់អាជ្ញាធរមូលដ្ឋាន និងអង្គការក្រៅរដ្ឋាភិបាលក្នុងការអនុវត្តគម្រោងរបស់ពួកគាត់។ KUSANONE មានន័យថាមូលដ្ឋានក្នុង ភាសាជប៉ុន។

នៅក្នុងរយៈពេល៣០ឆ្នាំ ចុងក្រោយនេះស្ថានទូតជប៉ុនប្រចាំប្រទេសកម្ពុជា បានចូលរួមចំណែកក្នុងគម្រោងជាង៦០០ តាមរយៈជំនួយឥតសំណង KUSANONEនេះ។

លោក មិកាមិ ម៉ាសាហ៊ីរ៉ូ បានបន្ថែមថា បញ្ហាសុខភាព និងអនាម័យកាន់តែមានសារសំខាន់ ជាពិសេសនៅពេលដែលជំងឺកូវីដ១៩ មានការគំរាមកំហែង នៅលើពិភពលោក ក្នុងនោះប្រទេសជប៉ុននឹងបន្តចូលរួមចំណែកក្នុងការដោះស្រាយបញ្ហាប្រឈមទាំងនោះ តាមរយៈគ្រោងការណ៍សហប្រតិបត្តិការសេដ្ឋកិច្ច និងអភិវឌ្ឍន៍ផ្សេងៗរួមទាំងជំនួយ «គូសាណូណិ» ផងដែរ។

លោកឯកអគ្គរាជទូត មិកាមិ ម៉ាសាហ៊ីរ៉ូ បានបន្ថែមថា គម្រោងទាំង២ថ្មីនេះរួមមាន៖

* ទី១៖ គម្រោងសម្រាប់កសាងប្រព័ន្ធផ្គត់ផ្គង់ទឹកស្អាតបំពង់ខ្នាតតូចនៅកោះពាមរាំង ស្ថិតក្នុងខេត្តព្រៃវែង ថវិកាចំនួន ៩៦,៧៧៥ដុល្លារអាមេរិក អង្គភាពទទួលជំនួយគឺ សមាគមទឹកកម្ពុជា (CAWA) ដែលនៅក្នុងគម្រោងនេះប្រព័ន្ធផ្គត់ផ្គង់ទឹកស្អាតនឹងត្រូវបានសាងសង់ ហើយបណ្តាញចែកចាយទឹកស្អាតប្រមាណ ៩.៦គីឡូម៉ែត្រ នឹងត្រូវ ដំឡើងនៅកោះពាមរាំង ខេត្តព្រៃវែង។ តាមរយៈគម្រោងនេះប្រជាជនជាង ១,៣០០នាក់ នឹងទទួលបានទឹកស្អាតដែលមានតម្លៃសមរម្យ និងទទួលបាន អនាម័យគ្រប់គ្រាន់ ដែលនឹងចូលរួមចំណែកលើកកម្ពស់ជីវភាពរស់នៅរបស់ពួកគេ។

* ទី២៖ គម្រោងសាងសង់អគារសិក្សានៅអនុវិទ្យាល័យខ្យង ក្នុងស្រុកជ័យសែន ខេត្តព្រះវិហារ ថវិកាចំនួន ៩០,៩០៧ដុល្លារអាមេរិក អង្គភាពទទួលជំនួយគឺ មន្ទីរអប់រំ យុវជន និងកីឡាខេត្តព្រះវិហារ នៅក្នុងគម្រោងនេះ មានអគារសិក្សាមួយខ្នង មាន៥បន្ទប់ បំពាក់ដោយគ្រឿងសង្ហារឹមសាលារៀនបង្គន់៤ កន្លែងលាងដៃមួយ និងធុងស្តុកទឹកមួយ បានសាងសង់នៅអនុវិទ្យាល័យខ្យង ខេត្តព្រះវិហារ។ គម្រោងនេះនឹងផ្តល់អត្ថប្រយោជន៍ដល់សិស្ស ២១០នាក់ និងគ្រូ៩នាក់ តាមរយៈការលើកកម្ពស់ គុណភាពអប់រំ និងបរិយាកាសសិក្សារៀនសូត្រ ក៏ដូចជាចូលរួមចំណែកក្នុងការធំលូតលាស់ប្រកបដោយសុខភាពល្អ របស់សិស្សផងដែរ។

ជំនួយទាំងនេះគឺផ្អែកលើការប្តេជ្ញាចិត្តនៅក្នុងសេចក្តីថ្លែងការណ៍របស់សហប្រធាននៃកិច្ចប្រជុំរដ្ឋមន្ត្រីការបរទេស មេគង្គ-ជប៉ុន លើកទី១៣ នៅថ្ងៃទី៩ ខែកក្កដា ឆ្នាំ២០២០ ដែលបានលើកឡើងអំពី ការអនុវត្តជំនួយឥតសំណងសម្រាប់គម្រោងទ្រង់ទ្រាយតូចសន្តិសុខមនុស្សជាតិឆ្នាំ២០២០ ក្រោមគំនិតផ្តួចផ្តើមគូសាណូណិមេគង្គ សម្រាប់គោលដៅអភិវឌ្ឍន៍ប្រកបដោយចីរភាព ដែលមានទឹកប្រាក់សរុបប្រមាណ ៩១លានដុល្លារអាមេរិក។ គំនិតផ្តួចផ្តើមនេះមានគោលបំណងគាំទ្រដល់ការអភិវឌ្ឍសេដ្ឋកិច្ច និងសង្គមកិច្ច នៅតាមភូមិស្រកថ្នាក់មូលដ្ឋានទូទាំងតំបន់មេគង្គ។

ជំនួយឥតសំណងគូសាណូណិរបស់ជប៉ុន បានចាប់ផ្តើមនៅប្រទេសកម្ពុជានៅឆ្នាំ១៩៩១ ដើម្បីគាំទ្រដល់កិច្ចខិតខំប្រឹងប្រែងរបស់កម្ពុជាក្នុងការអភិវឌ្ឍន៍ និងស្ថាបនា ប្រទេសឡើងវិញនៅតាមកម្រិតមូលដ្ឋាន។ គម្រោងជំនួយនេះមានទិសដៅការពារជនងាយរងគ្រោះពីកត្តាមួយចំនួនដូចជាភាពក្រីក្រ ឬភាពអកុសលនានា ដែលអាចគំរាមកំហែង ដោយផ្ទាល់ដល់អាយុជីវិត ជីវភាពរស់នៅ និងសេចក្តីថ្លៃថ្នូររបស់ពួកគេ ក៏ដូចជាជួយជំរុញនូវភាពម្ចាស់ការលើខ្លួនឯងរបស់ប្រជាសហគមន៍។

សូមបញ្ជាក់ថា ចាប់តាំងពីឆ្នាំ១៩៩១មក រដ្ឋាភិបាលជប៉ុនបានផ្តល់ថវិកាជាង ៦៣លានដុល្លារអាមេរិកដល់អាជ្ញាធរមូលដ្ឋាន និងអង្គការក្រៅរដ្ឋាភិបាល ដើម្បីអនុវត្ត គម្រោងគូសាណូណិចំនួន ៦៤០គម្រោងនៅទូទាំងប្រទេសកម្ពុជាផងដែរ៕