(បារីស)៖ ប៉ូលិសទីក្រុងប៉ារីស បានឃាត់ខ្លួនអ្នករាយការណ៍ព័ត៌មានរបស់ទូរទស្សន៍ Al-Jazeera ចំនួន ៣នាក់ ពីបទបង្ហោះយន្តហោះបញ្ជាហៅថា "Drone" ដោយល្មើសនឹងច្បាប់ប្រទេស ព្រោះខ្លាចកើតមានករណីភេរវកម្ម នេះបើយោងតាការចុះផ្សាយរបស់ ទីភ្នាក់ងារសារព័ត៌មាន AFP។
អ្នកកាសែតទាំង ៣រូបនោះ ត្រូវបានឃាត់ខ្លួននៅក្នុងសួនច្បារមួយក្នុងទីក្រុងប៉ារីស ជាទីកន្លែងដែលពួកគេកំពុងបង្ហោះ យន្តហោះបញ្ជាដោយខុសច្បាប់តែម្តង។ ប៉ូលិសបានបញ្ជាក់ថា អ្នកកាសែតទាំង ៣នាក់នោះ កំពុងស្ថិតក្នុងការសង្ស័យ ដោយសារតែម្នាក់ជាអ្នកបង្ហោះ ម្នាក់ទៀតជាអ្នកថត និងម្នាក់ទៀតជាអ្នកឈរយាម។ បើសិនជាតុលាការរកឃើញមានទោសមែននោះ អ្នកទាំងបីត្រូវជាប់គុក ១ឆ្នាំ និងពិន័យជាប្រាក់ ៨៥.០០០ដុល្លារអាមេរិក។
សូមបញ្ជាក់ផងដែរថា ការចាប់ខ្លួននេះកើតឡើងបន្ទាប់ពីយន្តហោះបញ្ជាមួយចំនួន កាលពីថ្ងៃចន្ទត្រូវបានគេប្រទះឃើញ ហោះក្រវែលប៉មតួលអេហ្វហ្វែល, ទីលាន Bastille Square និងស្ថានទូតអាមេរិក ហើយបន្ទាប់មកបន្តទៅទីលាន Place de la Concorde និងសារមន្ទីរយោធា Invalides ជាទីដែលស្តេចណាប៉ូឡេអុងត្រូវបានបញ្ចុះ៕
