(ភ្នំពេញ)៖ «Miss Global 2015» ៣រូបទៀត នឹងមកដល់ប្រទេសកម្ពុជា នៅម៉ោង៥ ល្ងាចថ្ងៃទី៥ ខែឧសភា ឆ្នាំ២០១៦នេះ ដើម្បីចូលរួមការប្រគំតន្រ្តីសប្បុរសធម៌ ប្រមូល ថវិកាជួយមន្ទីរពេទ្យគន្ធបុប្ផា និងមន្ទីរពេទ្យកុមារអង្គរ។ ការទទួលស្វាគមន៍ដំណើរមកដល់របស់ «Miss Global 2015» ៣រូបទៀត គឺរៀបចំដោយ ក្រសួងវប្បធម៌ និងវិចិត្រសិល្បៈ ក្រសួងទេសចរណ៍ រួមនឹង សិល្បករ សិល្បការិនី ជាច្រើនរួមទៀត ចូលរួមទទួលស្វាគមន៍យ៉ាងកក់ក្តៅផងដែរ។ នេះបើតាមការលើកឡើងរបស់លោក សុះ ម៉ាច ប្រធានសមាគមសិល្បករខ្មែរ ប្រាប់អង្គភាព Fresh News និង Khmertalking នៅមុននេះបន្តិច។
នេះជាលើកទី១ហើយ ដែល Miss Global បានអញ្ចើញមកប្រទេសកម្ពុជា ដើម្បីចូលរូមការប្រគំតន្រ្តីសប្បុរសធម៌ និងមកបំពេញទស្សនកិច្ច នៅតាមរមណីយដ្ឋាននានា ជាពិសេស គឺប្រាសាទអង្គរវត្តជាដើម។ នេះជាមោទនភាពមួយសម្រាប់ប្រទេសកម្ពុជា ដែលមានបុគ្គលល្បីល្បាញមកទស្សនា និងដើរលេងកំសាន្ត។
លោកស្រី ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ បានប្រាប់អង្គភាព Fresh News និង Khmertalking នៅមុននេះបន្តិចថា «Miss Global 2015 មកចូលរួមការប្រគំតន្រ្តី សប្បុរសធម៌ ប្រមូលថវិកា ជួយមន្ទីរពេទ្យគន្ធបុប្ផា និងមន្ទីរពេទ្យកុមារអង្គរ គឺធ្វើឡើងដោយស្ម័គ្រចិត្ត។ គាត់ទាំងអស់គ្នា អញ្ជើញមកនៅពេលនេះ គឺដោយសារតែពួកគាត់មើលឃើញ ថា ប្រទេសកម្ពុជា គឺជាប្រទេសមានសុខសន្តិភាព មានភាពទាក់ទាញ និងមានរមណីយដ្ឋានស្អាតៗ ជាច្រើនកន្លែង»។
លោកស្រី ភឿ សកុណា បន្តថា ដំណើរមកដល់របស់ Miss Global 2015 នេះ នឹងជួយឲ្យកម្ពុជា មានភាពល្បីល្បាញជាងមុន តាមរយៈការជួយផ្សព្វផ្សាយពី «Miss Global 2015» និងតាមរយៈប្រវត្ថិសាស្រ្តរបស់កម្ពុជា និងភាពល្អប្រណិត នៃតំបន់រមណីយដ្ឋានដ៏ល្អឥតខ្ចោះរបស់កម្ពុជាផងដែរ។
គួរបញ្ជាក់ថា នៅព្រឹកថ្ងៃទី០៥ ខែឧសភា ឆ្នាំ២០១៦នេះ «Miss Global 2015» មួយរូប បានអញ្ចើញមកប្រទេសកម្ពុជា។ ចំណែកល្ងាចថ្ងៃដដែលនេះ ក៏មានវត្តមានរបស់ «Miss Global 2015» ៣រូបបន្ថែមទៀត ដើម្បីចូលរួមការប្រគំតន្រ្តីសប្បុរសធម៌ ដែលគ្រោងរៀបចំ នៅថ្ងៃទី៨ ខែឧសភាខាងមុខនេះ ដោយមានការចូលរួមពីលោកស្រី ឧបនាយករដ្ឋមន្រ្តី ម៉ែន សំអន រដ្ឋមន្រ្តីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច តំណាងដ៏ខ្ពង់ខ្ពស់របស់សម្តេច តេជោ ហ៊ុន សែន និងសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន និងមន្រ្តីពាក់ព័ន្ធ ជាច្រើនរូបទៀត ។
«Miss Global 2015 »ទាំង៤រូបដែលអញ្ចើញមកទស្សនកិច្ច នៅកម្ពុជា គឺជាបវរកញ្ញា ដែលជាប់ចំណាត់ថ្នាក់ពីលេខ១ ដល់លេខ ៥ រួមមាន បវរកញ្ញា មកពីប្រទេសអាមេរិក ប្រទេសអូស្រ្តាលី ប្រទេសអៀរឡង់ និងប្រទេសប៊ុលការី តែអវត្តមានបវរកញ្ញា មកពីប្រទេសហ្វីលីពីនមួយរូប៕
