(ត្បូងឃ្មុំ)៖ លោក ខ្វៃ អាទិត្យា អនុប្រធានក្រុមការងារគណបក្សប្រជាជនចុះមូលដ្ឋានឃុំព្រះធាតុ បានប្រាប់ទៅសមាជិក សមាជិកាបក្សថា ត្រូវប្តេជ្ញាថែរក្សា សុខសន្តិភាពទើបផ្តល់ឱកាសឲ្យយើងជួបជុំគ្នា សប្បាយរីករាយ មានជីវភាពល្អប្រសើរ និងការអភិវឌ្ឍលើគ្រប់វិស័យនៅទូទាំងប្រទេស។
ការលើកឡើងបែបនេះ លោក ខ្វៃ អាទិត្យា បានធ្វើឡើងក្នុងឱកាសអញ្ជើញសំណេះសំណាលជាមួយសមាជិក-សមាជិកកាចំនួន៣ភូមិ ក្នុងឃុំព្រះធាតុ ស្រុកអូររាំងឪ ខេត្តត្បូងឃ្មុំ នាព្រឹកថ្ងៃទី២៤ ខែមេសា ឆ្នាំ២០២២នេះ។
ក្នុងឱកាសនេះដែរ លោក ខ្វៃ អាទិត្យា បានលើកឡើងពី វឌ្ឍនភាព ការអភិវឌ្ឍ សន្តិភាព ដែលកើតឡើងពីការខិតខំប្រឹងប្រែងយកអស់កម្លាំងកាយចិត្ត យកអាយុជីវិតធ្វើដើមទុន របស់ថ្នាក់ដឹកនាំគ្រប់លំដាប់ថ្នាក់របស់គណបក្សប្រជាជនកម្ពុជា។
លោក ខ្វៃ អាទិត្យា ក៏បានអំពាវនាវឱ្យគ្រប់សមាជិក សមាជិកា គណបក្សប្រជាជនកម្ពុជាក្នុងមូលដ្ឋានត្រូវពង្រឹងផ្ទៃក្នុងគណបក្ស សាមគ្គីភាពគ្នាបានល្អប្រសើរ និងបន្តធ្វើអំពើល្អជាមួយប្រជាពលរដ្ធក្នុងមូលដ្ឋានបន្ថែមទៀត។
សូមបញ្ជាក់ថា ក្នុងឱកាសនោះដែរ លោក ខ្វៃ អាទិត្យា និងលោក ឡេង ជីវីន អនុប្រធានក្រុមការងារគណបក្សប្រជាជនកម្ពុជា ចុះមូលដ្ឋានឃុំព្រះធាតុ រួមទាំងសហការី បានជួបសំណេះសំណាលផ្តល់ថវិកា និងគ្រឿងឧបភោគមួយចំនួនដល់មេក្រុមបក្សភូមិចំនួន៣ គឺភូមិទួលថ្កូវ ភូមិថ្នល់កែង និងភូមិព្រះធាតុកណ្តាល ឃុំព្រះធាតុ ស្រុកអូររាំងឪ ខេត្តត្បូងឃ្មុំ ផងដែរ៕
