(ភ្នំពេញ)៖ លោក មួង សុភក្ត្រ ប្រធានក្រុមអ្នកស្រាវជ្រាវវ័យក្មេង បានបង្ហាញនូវក្តីសោមនស្សរីករាយ និងវាយតម្លៃខ្ពស់ចំពោះនយោបាយរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានគណបក្សប្រជាជនកម្ពុជា ដែលបានបើកផ្លូវទទួលយកលោក យឹម ស៊ីណន និងលោក ហ៊ុន កុសល ចូលរួមជីវភាពនយោបាយជាមួយគណបក្សប្រជាជនកម្ពុជា។
លោក យឹម ស៊ីណន និងលោក ហ៊ុន កុសល គឺជាសកម្មជនបក្សប្រឆាំង គឺអតីតបក្សសង្គ្រោះជាតិដ៏ប្តូរផ្តាច់ ហើយតែងធ្វើសកម្មភាពវាយប្រហារ និងរិះគន់យ៉ាងខ្លាំងក្លាលើរាជរដ្ឋាភិបាល និងគណបក្សប្រជាជនកម្ពុជាដឹកនាំដោយសម្តេចតេជោ ហ៊ុន សែន។ ប៉ុន្តែពេលនេះ ពួកគេបានផ្លាស់ប្តូរទស្សនៈនយោបាយត្រឡប់មកគាំទ្រ និងសូមរួមរស់ជាមួយបក្សប្រជាជនកម្ពុជាក្រោមម្លប់ដឹកនាំរបស់សម្តេចតេជោ។
សម្តេចតេជោ ហ៊ុន សែន អ្នកនយោបាយពោរពេញដោយធម៌មេត្តា សណ្តោសប្រណី និងការបង្រួបបង្រួមនោះ មិនបានប្រកាន់ទោសអូសដំណើរចំពោះសកម្មភាពពីអតីតកាលរបស់យុវជនទាំងពីររូបនេះឡើយ ហើយស្វាគមន៍ដោយក្តីរីករាយ។
លោក មួង សុភក្ត្រ ជាអ្នកស្រាវជ្រាវ និងជាអ្នកតាមដានព្រឹត្តិការណ៍នយោបាយ និងសង្គមផងនោះ បានមើលឃើញថា ការបើកផ្លូវឱ្យយុវជនទាំងពីររូបនេះ ចូលរួមរស់ជាមួយបក្សប្រជាជនកម្ពុជា គឺបង្ហាញពីនយោបាយបង្រួបបង្រួមជាតិរបស់សម្តេចតេជោនាយករដ្ឋមន្ត្រី ដែលបានប្រកាន់យកតាំងពីអតីតកាល។
លោក សុភក្ត្រ ក៏បានមើលឃើញផងដែរថា ការទទួលយកលោក យឹម ស៊ីណន និងលោក ហ៊ុន កុសល ចូលបក្សប្រជាជនកម្ពុជា និងផ្តល់តួនាទីជូនលោក ស៊ីណន ជាអនុរដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ គឺជាការផ្តល់ឱកាសជូនយុវជនបានបម្រើការងារជូនជាតិមាតុភូមិផងដែរ។
ទន្ទឹមគ្នានេះ លោក សុភក្ត្រ ក៏បានទទូចដល់អ្នកនយោបាយ ក៏ដូចជាគាំទ្របក្សនយោបាយទាំងឡាយឱ្យលុបបំបាត់ទស្សនៈ និងការលាបពណ៌ទាំងឡាយទៅលើអ្នកចូលរួមជីវភាពនយោបាយជាមួយបក្សកាន់អំណាចថាជាអ្នកលក់ឧត្តមគតិ។ ការទទូចបែបនេះ ក៏ព្រោះតែលោក សុភក្ត្រ បានមើលឃើញអ្នកនយោបាយ ឬអ្នកគាំទ្របក្សប្រឆាំងបានចោទ និងលាបពណ៌លើលោក ស៊ីណន និងលោក កុសល ថាលក់ក្បាល លក់ឧត្តមគតិ បន្ទាប់ពីពួកគេចូលរួមជីវភាពនយោបាយជាមួយបក្សប្រជាជនកម្ពុជា។
ក្នុងវីដេអូឃ្លីបនេះ លោក សុភក្ត្រ ក៏បានទទូចដល់យុវជនទាំងឡាយចូលរួមធ្វើសកម្មភាពជាមួយរាជរដ្ឋាភិបាល ដើម្បីជួយកសាងសង្គមជាតិឱ្យកាន់តែរីកចម្រើន៕
