(ព្រះសីហនុ)៖ តំបន់សេដ្ឋកិច្ចពិសេសក្រុងព្រះសីហនុ ទទួលបានការចាប់អារម្មណ៍យ៉ាងខ្លាំងពីអ្នកវិនិយោគនៅជុំវិញពិភពលោក។ បច្ចុប្បន្នតំបន់សេដ្ឋកិច្ចពិសេសក្រុងព្រះសីហនុ មានរោងចក្រ សហគ្រាសកំពុងវិនិយោគចំនួន១៧៥ និងផ្តល់ការងារជាង ៣ម៉ឺនកន្លែង។
រយៈពេលប៉ុន្មានឆ្នាំកន្លងមកនេះ តំបន់សេដ្ឋកិច្ចពិសេសក្រុងព្រះសីហនុ ដោយសារការប្រកាន់ខ្ជាប់នូវគោលគំនិត «ជោគជ័យរួមគ្នា» បានទាក់ទាញការវិនិយោគពីសហគ្រាសនៅទូទាំងពិភពលោក។ បច្ចុប្បន្ននេះ មានសហគ្រាសមកពីប្រទេសចិន អាស៊ីអាគ្នេយ៍ អឺរ៉ុប និងសហរដ្ឋអាមេរិកសរុបចំនួន១៧៥ បានវិនិយោគធ្វើអាជីវកម្មនៅតំបន់សេដ្ឋកិច្ចពិសេសក្រុងព្រះសីហនុ។
លោក Channy នាយកប្រតិបត្តិរបស់ក្រុមហ៊ុន HORSEWARE PRODUCTS(CAMBODIA)CO.,LTD ក្នុងតំបន់សេដ្ឋកិច្ចពិសេសក្រុងព្រះសីហនុបានថ្លែងថា «កាលពីមុន អ្វីដែលជាកត្តាសំខាន់បំផុតជំរុញឱ្យយើងខ្ញុំសម្រេចចិត្តវិនិយោគនៅតំបន់សេដ្ឋកិច្ចពិសេសក្រុងព្រះសីហនុ គឺដោយសាទីនេះ មានលក្ខខណ្ឌវិនិយោគដ៏អំណោយផល បរិស្ថានស្អាត ហើយក៏មានសន្តិសុខយាម ២៤ម៉ោងផងដែរ បានផ្តល់បរិយាកាសអាជីវកម្មដ៏ល្អប្រសើរដល់ការអភិវឌ្ឍសហគ្រាស»។
ក្រុមហ៊ុន HORSEWARE PRODUCTS(CAMBODIA)CO.,LTD មកពីប្រទេសអៀរឡង់ គឺជាសហគ្រាសអឺរ៉ុបទីមួយក្នុងតំបន់សេដ្ឋកិច្ចពិសេសក្រុងព្រះសីហនុ។ ក្រុមហ៊ុននេះ ចូលវិនិយោគក្នុងតំបន់ជាផ្លូវការនៅឆ្នាំ២០១០។ ក្រុមហ៊ុននេះមានផ្ទៃដីសរុបចំនួន១៣,០០០ម៉ែត្រការ៉េ បច្ចុបន្នមានកម្មករនិយោជិតចំនួន ២៨៧នាក់។
សកម្មភាពចម្បងរបស់ក្រុមហ៊ុន គឺផលិតសម្ភារៈ និងខោអាវសម្រាប់ជិះសេះ មានសមត្ថភាពផលិតសម្ភារៈ និងខោអាវសម្រាប់ជិះសេះបានចំនួន២២,០០០ ក្នុងមួយខែ។ ផលិតផលទាំងនេះ ត្រូវបាននាំចេញទៅប្រទេសអៀរឡង់ អាមេរិក និងឃ្លាំងអឺរ៉ុបនៅទីក្រុង Rotterdam ប្រទេសហូឡង់។ លើសពីនេះទៅទៀត ក្រុមហ៊ុននេះ ក៏ផ្គត់ផ្គង់ទំនិញទៅកាន់អតិថិជនធំៗមកពីប្រទេសអាល្លឺម៉ង់ បែលហ្ស៉ិក ស៊ុយអែតដោយផ្ទាល់។
ក្នុងរយៈពេលជាង១០ឆ្នាំចុងក្រោយនេះ ក្រុមហ៊ុន HORSEWARE PRODUCTS(CAMBODIA)CO.,LTD បាននឹងកំពុងបោះជំហានទៅមុខប្រកបដោយភាពនឹងនរ។
ទន្ទឹមនឹងនេះ សហគ្រាសអាមេរិក CAFFCO INTERNATIONAL (CAMBODIA)LIMITED ដែលបោះទីតាំងនៅតំបន់សេដ្ឋកិច្ចពិសេសក្រុងព្រះសីហនុ នៅឆ្នាំ២០១៣ បានរីកចម្រើនយ៉ាងផុសផុល ដោយផ្អែកលើឧត្តមភាពរបស់តំបន់សេដ្ឋកិច្ចពិសេស។
លោក Lamar Thompson នាយកប្រតិបត្តិរបស់ក្រុមហ៊ុនបានបញ្ជាក់ថា មូលហេតុសំខាន់ជាងគេ ដែលក្រុមហ៊ុនគាត់សម្រេចចិត្តវិនិយោគនៅតំបន់សេដ្ឋកិច្ចពិសេសក្រុងព្រះសីហនុ គឺដោយសារតំបន់សេដ្ឋកិច្ចពិសេសក្រុងព្រះសីហនុ ស្ថិតនៅជិតកំពង់ផែស្វយ័តក្រុងព្រះសីហនុ ដែលមានភាពងាយស្រួលក្នុងការដឹកជញ្ជូន អាចជួយកាត់បន្ថយចំណាយនៃការដឹកជញ្ជូនរបស់ក្រុមហ៊ុន។
បន្ទាប់ពីការសាងសង់រយៈពេល ១ឆ្នាំ នៅឆ្នាំ២០១៤ ក្រុមហ៊ុននេះ បានចាប់ផ្តើមដំណើការជាផ្លូវការ សកម្មភាពចម្បង គឺផលិតដើមណូអែល PVC និងកាដូណូអែលផ្សេងៗ សម្រាប់នាំចេញទៅសហរដ្ឋអាមេរិក។
តាមរយៈការអភិវឌ្ឍរយៈពេលច្រើនឆ្នាំ ក្រុមហ៊ុន CAFFCO INTERNATIONAL (CAMBODIA) LIMITED បានពង្រីកទ្រងទ្រាយនៃផលិតកម្មជាបន្តបន្ទាប់ និងលើកកម្ពស់ផលិតភាពជាបណ្តើរៗ។ ចំនួនកម្មករនិយោជិត បានកើនឡើងពីចំនួន ១២០នាក់ ដល់ចំនួន ៤៧០នាក់ នៅពេលមានការបញ្ជាទិញច្រើន ចំនួនកម្មករនិយោជិតអាចកើនឡើងដល់៥៥០នាក់។ ទន្ទឹមនឹងនេះ ចាប់ពីការចូលវិនិយោគក្នុងតំបន់សេដ្ឋកិច្ចពិសេសមក បរិមាណផលិតរបស់ក្រុមហ៊ុនបានកើនឡើង ១០ភាគរយក្នុងមួយឆ្នាំ ហើយថែរក្សានិន្នាការអភិវឌ្ឍន៍ដ៏ល្អជារៀងរហូត។
ក្រៅពីក្រុមហ៊ុន HORSEWARE PRODUCTS(CAMBODIA)CO.,LTD និងក្រុមហ៊ុន CAFFCO INTERNATIONAL (CAMBODIA) LIMITED នៅមានសហគ្រាសមកពីប្រទេសសហរដ្ឋអាមេរិក អង់គ្លេស បារាំង ស្វីស កូរ៉េខាងត្បូងជាច្រើនទៀតសម្រេចបានការអភិវឌ្ឍន៍ជោគជ័យរួមគ្នានៅក្នុងតំបន់សេដ្ឋកិច្ចពិសេសក្រុងព្រះសីហនុ។
តំបន់សេដ្ឋកិច្ចពិសេសក្រុងព្រះសីហនុមាន គោលដៅអភិវឌ្ឍប្រែក្លាយខ្លួនទៅជាសួនឧស្សាហកម្មអន្តរជាតិគំរូមួយ ផ្តល់នូវការគាំទ្រយ៉ាងពេញលេញរាល់ការវិនិយោគនៅទីនេះ។ ដោយហេតុនេះហើយ តំបន់សេដ្ឋកិច្ចពិសេសបានកែលម្អហេដ្ឋារចនាសម្ព័ន្ធគាំទ្រផលិតកម្ម និងការរស់នៅឥតឈប់ឈរ ដើម្បីលើកកម្ពស់កម្រិតសេវាកម្មអន្តរជាតូបនីយកម្ម។ បច្ចុប្បន្ននេះ តំបន់សេដ្ឋកិច្ចពិសេសមិនត្រឹមតែបានសាងសង់អាងប្រព្រឹត្តកម្មទឹកកខ្វក់ រោងចក្រចំហាយផ្គុំជាមួយអគ្គិសនី អាផាតមិន អាគារស្នាក់នៅបុណ្ណោះទេ ហើយក៏មានការិយាល័យច្រកចេញចូលតែមួយនៃរដ្ឋបាលតំបន់សេដ្ឋកិច្ចពិសេសក្រុងព្រះសីហនុ បុស្តិ៍សុខភាព មជ្ឈមណ្ឌលផ្តល់សេវាកម្មច្បាប់ វិទ្យាស្ថានពហុបច្ចេកទេសមិត្តភាពកម្ពុជាចិនខេត្តព្រះសីហនុ និងវិទ្យាស្ថានធុរកិច្ច និងបច្ចេកវិទ្យាក្រុងព្រះសីហនុផងដែរ បានបង្កើតបរិយាកាសអាជីវកម្មដ៏ល្អប្រសើរសម្រាប់សហគ្រាសក្នុងតំបន់សេដ្ឋកិច្ចពិសេស។
