(បារាំង)៖ យន្តហោះដឹកអ្នកដំណើររបស់ក្រុមហ៊ុនអាកាសចរណ៍ Germanwings ប្រភេទ Airbus A320 ជើងហោះហើរ 4U9525 បានធ្វើដំណើរពីទីក្រុង Barcelona ប្រទេស អេស្ប៉ាញ ទៅកាន់ ទីក្រុង Duesseldorf ប្រទេសអាល្លឺម៉ង់។ យន្តហោះនេះបានដឹកអ្នកដំណើរ១៤៤នាក់ ក្នុងនោះមានទារកពីរនាក់ និង សហសេវិកចំនួន៦នាក់ បានធ្លាក់នៅ​ក្បែរសង្កាត់ Digne-les-Bains, ក្នុងតំបន់ Alpes de Haute Provence ភាគខាងត្បូងប្រទេស បារាំង ដែលជាតំបន់​ដាច់ស្រយាលមួយ កំពុងប្រឈមមុខនឹងការធ្លាក់ព្រិលថែមទៀតផង នេះបើយោងតាមភ្នាក់ងារសារព័ត៌មាន Reuters ចេញផ្សាយនៅថ្ងៃទី២៤ ខែមីនា ឆ្នាំ២០១៥។

ហេតុការណ៍ធ្លាក់យន្តហោះនេះ បានកើតឡើងកាលពីវេលាម៉ោង ប្រមាណ១១៖២០នាទីព្រឹក(ម៉ោងក្នុងតំបន់)នៅថ្ងៃអង្គារ៍នេះ បន្ទាប់ពីយន្តហោះចេញដំណើរពី ព្រលានយន្តហោះ Barcelona នៅវេលាម៉ោង ១០៖០១នាទីព្រឹក (ម៉ោងក្នុងតំបន់)។

ជាមួយគ្នានេះដែរ លោក Thomas Winkelmann CEO នៃក្រុមហ៊ុនអាកាសចរណ៍ Germanwing បានឲ្យដឹងថា យន្តហោះបានបាត់ទំនាក់ទំនងពីប្រព័ន្ធរ៉ាដានៅវេលាម៉ោងប្រមាណ១០៖៥៣នាទីព្រឹក។ ចំណែកអ្នកបើកបរយន្តហោះធ្លាប់មានបទពិសោធន៍ហោះហើរជាង១០ឆ្នាំ និងធ្លាប់បើកយន្តហោះប្រភេទ Airbus នេះអស់រយៈពេល​៦០០០ម៉ោង។

អាជ្ញាធរបារាំងបានបញ្ជាក់ថា យន្តហោះបានធ្លាក់នៅ​តំបន់ដែលមានព្រិលធ្លាក់​យ៉ាងក្រាស និងអាកាសធាតុ​ត្រជាក់បំផុត ដែលនេះជាបញ្ហាមួយបង្កការស្មុគស្មាញ និងការលំបាកយ៉ាងខ្លាំងក្នុងកិច្ចការស្រាវជ្រាវ និងជួយសង្គ្រោះ។

ក្រុមហ៊ុន​ផលិតយន្តហោះ Airbus បានថ្លែងថា នឹងបញ្ជូនក្រុមបច្ចេកទេសជំនាញ ជាទីប្រឹក្សាជួយដល់ ក្រុមស៉ើបអង្កេតរបស់បារាំង ដើម្បីរកមូលហេតុនៃការធ្លាក់។

រហូតមកទល់ពេលនេះ មិនទាន់មានប្រភពណាមួយបញ្ជាក់ច្បាស់នៅឡើយទេ ទាក់ទិននឹងមូលហេតុនៃការ​ធ្លាក់យន្តហោះ ប៉ុន្តែអ្វីដែលអាចដឹងបាននោះគឺ មិនមានអ្នកណាម្នាក់នៅរស់នោះទេ។ នេះជាការលើកឡើងរបស់លោក Francois Hollande ប្រធានាធិបតីប្រទេស បារាំង។ លោកប្រធានាធិបតីបានបញ្ជាក់បន្ថែមថា ក្រុមសង្គ្រោះបន្ទាន់ត្រូវការរយៈពេលជាច្រើនម៉ោង ដើម្បីធ្វើដំណើរទៅកាន់កន្លែង កើតហេតុដែលជាតំបន់ដាច់ស្រយាលនេះ។

ចំណែកព្រះរាជារបស់ប្រទេសអេស្ប៉ាញបានលើកឡើងថា អ្នកដំណើរភាគច្រើនជាជនជាតិអេស្ប៉ាញ (៤៥នាក់) អាឡឺម៉ង់ និងតួកគី។ ដោយឡែកលោក Mariano Rajoy នាយករដ្ឋមន្ត្រីប្រទេស អេស្ប៉ាញបានបញ្ជាក់ថា លោកនឹងវិលត្រឡប់ទៅកាន់ទីក្រុង Madrid វិញដើម្បី​បញ្ជូន​កម្លាំងសង្គ្រោះបន្ទាន់ទៅកាន់ប្រទេសបារាំង។

ដោយឡែក លោកស្រីអធិការបតី Angela Merkel បានលើកឡើងថា លោកស្រីគ្រោងនឹងធ្វើដំណើរទៅប្រទេសបារាំង នៅថ្ងៃពុធខាងមុខ។ មេដឹកនាំប្រទេសអាឡឺម៉ង់រូបនេះបានបញ្ជាក់ថា លោកស្រីបានរក្សាទំនាក់ទំនងជាប់ជានិច្ចជាមួយ​ប្រធានាធិបតីបារាំង និងអេស្ប៉ាញដោយព្រមព្រៀង ក្នុងការជួយគ្នាទៅវិញទៅមក ក្នុងគ្រប់រូបភាពទាំងអស់ ដើម្បីឆ្លើយតបហេតុការណ៍សោកនាដកម្មនេះ៕