(ចិន, ហៃណាន)៖ នៅវេលាម៉ោងជាង១១ព្រឹកថ្ងៃសុក្រ ទី២៩ ខែមីនា ឆ្នាំ២០២៤នេះ សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ បានដឹកនាំគណៈប្រតិភូអញ្ជើញត្រឡប់មកដល់កម្ពុជាប្រកបដោយសុវត្ថិភាព បន្ទាប់ពីបញ្ចប់បេសកកម្មការងារនៅក្នុងខេត្តហៃណាន ប្រទេសចិន។
សម្តេចតេជោ ហ៊ុន សែន បានដឹកនាំគណៈប្រតិភូអញ្ជើញចាកចេញពីកម្ពុជា កាលពីថ្ងៃទី២៦ ខែមីនា ឆ្នាំ២០២៤ ដើម្បីចូលរួមសន្និសីទប្រចាំឆ្នាំ នៃវេទិកាបូអាវសម្រាប់អាស៊ី តបតាមការអញ្ជើញរបស់លោក លី ប៉ោទុង អគ្គលេខាធិការនៃវេទិកាបូអាវសម្រាប់អាស៊ី។
ក្នុងសន្និសីទប្រចាំឆ្នាំនៃវេទិកាបូអាវសម្រាប់អាស៊ី ដែលធ្វើឡើងក្រោមមូលបទ «អាស៊ីនិងពិភពលោក៖ បញ្ហាប្រឈម និងការទទួលខុសត្រូវរួម» ត្រូវបានបើកជាផ្លូវការនៅថ្ងៃទី២៨ ខែមីនា ឆ្នាំ២០២៤។ សន្និសីទត្រូវបានបើកជាផ្លូវការដោយលោក ចាវ ឡឺជី ប្រធានគណៈកម្មាធិការអចិន្ត្រៃយ៍ នៃសភាតំណាងប្រជាជនចិន និងមានការអញ្ជើញចូលរួមថ្នាក់ដឹកនាំរដ្ឋាភិបាល ធុរកិច្ច ស្ថាប័នសិក្សាស្រាវជ្រាវ អង្គការអន្តរជាតិ និងអង្គការតំបន់ រង្វង់ប្រមាណ ២,០០០នាក់ មកពីប្រទេស និងតំបន់ចំនួន៦០ ហើយអ្នកកាសែត ១,១០០នាក់ មកពី ៤០ប្រទេស និងតំបន់ផងដែរ។
ក្នុងសន្និសីទនេះ បានពិភាក្សាផ្តោតជាសំខាន់អំពីបញ្ហាដែលកំពុងប្រឈមនៅក្នុងតំបន់អាស៊ី និងជំរុញកិច្ចសហប្រតិបត្តិការអន្តរជាតិ។ ក្នុងពិធីបើកសន្និសីទនេះ សម្តេចតេជោ ហ៊ុន សែន ក៏បានផ្តល់កិត្តិយសថ្លែងសុន្ទរកថាគន្លឹះផងដែរ។
សម្តេចតេជោ ហ៊ុន សែន បានគូសរំលេចថា ជាមួយនឹងវត្តមានជាង ២០ ឆ្នាំកន្លងមកនេះ វេទិកាបូអាវសម្រាប់អាស៊ី ត្រូវបានទទួលស្គាល់ថា ជាវេទិកាប្រកបដោយឥទ្ធិពលមួយ សម្រាប់ការរៀបចំរបៀបវារៈថ្នាក់តំបន់ និងសកលលោក ដោយបានពាំនាំនូវសំឡេង និងបញ្ញាញាណរបស់អាស៊ី នៅក្នុងការដោះស្រាយបញ្ហាប្រឈមដ៏លំបាកនានា នៅក្នុងកិច្ចខិតខំប្រឹងប្រែងកសាងពិភពលោកមួយដែលមានសន្តិភាព និងឈានទៅរកភាពកាន់តែប្រសើរសម្រាប់ទាំងអស់គ្នា។
នៅចំពោះមុខអ្នកចូលរួមរាប់ពាន់នាក់ សម្តេចតេជោ ហ៊ុន សែន បានលើកបញ្ហានានា ដែលកំពុងកើតមាននៅលើពិភពលោក បង្កជាផលប៉ះពាល់ដ៏ធ្ងន់ធ្ងរ ដែលបានកើតមានទៅលើជនស៊ីវិលស្លូតត្រង់ ក៏ដូចជាលើសេដ្ឋកិច្ច និងពាណិជ្ជកម្មអន្តរជាតិ។ បញ្ហាដែលសម្តេចបានគូសរំលេចនោះ មានដូចជាសង្គ្រាមនៅអ៊ុយក្រែនបានឈានចូលដល់ឆ្នាំទីបី ហើយជាអកុសល មិនទាន់បានឃើញពន្លឺ នៃសន្តិភាពនោះឡើយ ។ រីឯសង្គ្រាមរវាងអីស្រាអែល និងក្រុមហាម៉ាស់ ក៏នៅតែបន្តបង្កឱ្យមានអ្នកស្លាប់ និងរបួសជាច្រើន។
សម្តេចតេជោ បានបង្ហាញក្តីពេញចិត្ត និងក្តីរីករាយ ចំពោះសកម្មភាពសម្រុះសម្រួលឆ្លងប្រទេសយ៉ាងសកម្មរបស់ចិន ដើម្បីស្វែងរកបទឈប់បាញ់នៅអ៊ុយក្រែន។ សម្តេចតេជោ បានបង្ហាញការជឿជាក់ថា សកម្មភាពបែបនេះ នឹងក្លាយជាគំរូដ៏ល្អសម្រាប់តួអង្គដែលមានការទទួលខុសត្រូវផ្សេងទៀត នៃសហគមន៍អន្តរជាតិ នៅក្នុងការជួយពន្លឿនការចរចា និងឈានទៅសម្រេចបានបទឈប់បាញ់ នៅក្នុងអ៊ុយក្រែន ក៏ដូចជានៅក្នុងតំបន់ផ្សេងទៀត នៃពិភពលោក ដែលត្រូវបានបំផ្លិចបំផ្លាញដោយសង្គ្រាម និង ជម្លោះ។
សម្តេចតេជោ ក៏បានទាញចំណាប់អារម្មណ៍ផងដែរថា តំបន់អាស៊ី ក៏មានចំណុចរំញោចជាច្រើន ដែលអាចធ្វើឱ្យជម្លោះផ្ទុះឡើង ប្រសិនបើមេដឹកនាំនៅអាស៊ីមិនពិគ្រោះយោបល់ និងប្រាស្រ័យទាក់ទងគ្នា ដើម្បីដោះស្រាយភាពខ្វែងគំនិតគ្នាប្រកបដោយខ្លឹមសារ និងការទទួលខុសត្រូវ។
សម្តេចតេជោ បានបញ្ជាក់ថា ក្តីបារម្ភរបស់ខ្ញុំនាពេលបច្ចុប្បន្ន គឺទៅលើទិដ្ឋភាពដែលភូមិសាស្ត្រនយោបាយនៅតែបន្តគ្របដណ្តប់ទៅលើរបៀបវារៈសេដ្ឋកិច្ចសកល។ ព័ត៌មាន នៃការធ្លាក់ចុះសេដ្ឋកិច្ច ឬ វិបត្តិតាមវិស័យនៅ ក្នុងប្រទេសមួយ បានក្លាយជាហេតុផលប្រកាសជ័យជម្នះ សម្រាប់តំបន់ផ្សេងទៀតក្នុងពិភពលោក ។ ការបោះឆ្នោតប្រជាធិបតេយ្យ បានក្លាយជាឱកាស ដើម្បីធ្វើការសន្យាជ្រុលនិយម, ធ្វើ សកម្មភាពប្រទូស្តប្រឆាំង និង ជំរុញផលប្រយោជន៍អាត្មានិយម ដោយមិនបានគិតគូរដល់ផលប្រយោជន៍សកល និងសណ្តាប់ធ្នាប់អន្តរជាតិដែលផ្អែកលើវិធានច្បាប់។ លើសពីនេះ ការសើរើរចនាសម្ព័ន្ធ នៃខ្សែច្រវាក់ផ្គត់ផ្គង់នាពេលបច្ចុប្បន្ន មិនបានលើកទឹកចិត្តឱ្យមានការទទួលបាននូវវិបុលភាព និងការផ្ទេរបច្ចេកវិទ្យាដោយបើកចំហ, មិនរើសអើង និងមានសមធម៌នោះទេ, ប៉ុន្ត ផ្ទុយទៅវិញ, បានជំរុញឱ្យមានការបង្រួមកាន់តែតូចទៅ នៃរង្វង់ប្រទេសមួយក្រុម ដែលចង់ធ្វើឱ្យប្រទេសផ្សេងទៀត ធ្លាក់ចុះខ្សោយ។
ជាមួយនឹងការលើកឡើងបញ្ហាទាំងនេះ សម្តេចតេជោ ហ៊ុន សែន បានលើកឡើងថា ការទទួលខុសត្រូវរួមរបស់ប្រទេសនៅក្នុងតំបន់អាស៊ី គឺការរក្សាសន្តិភាព និងសន្តិសុខនៅក្នុងតំបន់ ដើម្បីធានាថា លទ្ធផល នៃការកាត់បន្ថយភាពក្រីក្រ មិនវិលត្រឡប់ថយ ក្រោយ និង ការធានាជំរុញឱ្យកាន់តែប្រសើរឡើងនូវការអភិវឌ្ឍអនាគត ដើម្បីវិបុលភាពរួមគ្នា។
សម្តេចតេជោបន្តថា អាស៊ីបានសម្រេចការអភិវឌ្ឍយ៉ាងខ្លាំងក្លា ហើយបានដើរតួជាក្បាលម៉ាស៊ីនដឹកនាំកំណើន, ជាពិសេសក្នុងអំឡុងពេលដ៏លំបាកមួយ ដែលសេដ្ឋកិច្ចពិភពលោកធ្លាក់ចុះដល់កំរិតខ្សោយបំផុត បើប្រៀបធៀបជារួម នៅក្នុងរយៈកាល ៣ទសវត្សរ៍ចុងក្រោយ។ កំណើនសេដ្ឋកិច្ចដ៏រឹងមាំរបស់ អាស៊ី និង ឋានៈជាមជ្ឈមណ្ឌលផលិតកម្ម និង ពាណិជ្ជកម្មរបស់ពិភពលោក បានផ្ដល់ឱ្យអាស៊ី នូវតួនាទីសកលដ៏សំខាន់មួយ ។ បើទោះបីជាសេដ្ឋកិច្ចពិភពលោកមានកំណើនទាប និង ត្រូវ ប្រឈមនឹងការសើរើរចនាសម្ព័ន្ធខ្សែច្រវាក់ផ្គត់ផ្គង់នាពេលថ្មីៗនេះក៏ដោយ ក៏សេដ្ឋកិច្ចអាស៊ី ទាំងមូល ត្រូវបានគេរំពឹងថា នឹងអាចរួមចំណែក ៦០% ដល់កំណើន ផ.ស.ស. ជាក់ស្តែងរបស់ ពិភពលោក ក្នុងឆ្នាំខាងមុខនេះ ។
ក្នុងន័យនេះ តំបន់អាស៊ីមានភាពចាំបាច់ត្រូវធ្វើការរួមគ្នា ដើម្បីរក្សាបាននូវសន្ទុះវិជ្ជមាន។ សម្តេចតេជោ បានលើកឡើងថា អាស៊ីត្រូវតែដឹកនាំដោយគោលការណ៍ពហុភាគីនិយម ដែលផ្អែកលើ វិធានច្បាប់ ដែលបម្រើឱ្យយើងទាំងអស់គ្នា មិនមែនសម្រាប់តែក្រុមប្រទេសណាមួយនោះទេ។ បន្ថែមពីលើនេះ ត្រូវតែបន្តខិតខំធ្វើសមាហរណកម្មឱ្យកាន់តែស៊ីជម្រៅ និង ជំរុញការតភ្ជាប់ឱ្យកាន់តែប្រសើរ ជាជាងជំរុញការកាត់ផ្តាច់ និងការរាំងស្ទះ។ មិនតែប៉ុណ្ណោះ អាស៊ី ត្រូវតែទទួលស្គាល់ថា គោលការណ៍ពហុភាគីនិយម គឺជាគោលការណ៍ដែលបានគាំទ្រដល់សកលភាវូបនីយកម្ម, ការអភិវឌ្ឍប្រកបដោយ ចីរភាព និង ការកាត់បន្ថយភាពក្រីក្រ ដែលផ្ដល់ផលប្រយោជន៍ជាក់ស្តែងដល់ពិភពលោកយើង មកដល់ពេលនេះ។
ក្នុងសុន្ទរកថានោះ សម្តេចតេជោ បានកោតសរសើរប្រទេសចិន ចំពោះការទទួលបន្ទុក ក៏ដូចជាការ ទទួលខុសត្រូវដ៏ធ្ងន់ នៅក្នុងតួនាទីជាអ្នកដឹកនាំសកល ដើម្បីគាំទ្រដល់ការរីកចម្រើនរបស់បណ្ដា ប្រទេស ចាប់ពីទ្វីបអាស៊ី, អាហ្វ្រិក រហូតដល់អាមេរិកឡាទីន។ គំនិតផ្តួចផ្តើម «ខ្សែក្រវ៉ាត់ និង ផ្លូវ» បានគាំទ្រដល់ការកសាងហេដ្ឋារចនាសម្ព័ន្ធសាធារណៈនៅក្នុងបណ្តាទ្វីបនានា។ សម្រាប់សម្តេចតេជោ ហ៊ុន សែន ហេដ្ឋារចនាសម្ព័ន្ធមូលដ្ឋានទាំងនេះ គឺជាផ្នែកមួយមិនអាចខ្វះបាន សម្រាប់កិច្ចខិតខំប្រឹងប្រែងអភិវឌ្ឍ និង កាត់បន្ថយភាពក្រីក្ររបស់ប្រជាជន នៃបណ្តាប្រទេសដែលជាភាគីទទួលផល រាប់ទាំង ប្រទេសកម្ពុជាផង។
សម្តេចតេជោ បានសង្កត់ធ្ងន់ថា គេត្រូវតែទទួលស្គាល់ថា ម៉ូឌែលនៃការរីកចម្រើន និង ការអភិវឌ្ឍរបស់ចិន បានអនុញ្ញាតឱ្យប្រទេសផ្សេងទៀត ទទួលបានវិបុលភាពជាមួយគ្នា ពោលគឺមិនមែនបោះបង់ ប្រទេសដទៃ ដើម្បីកំណើនរបស់ខ្លួននោះឡើយ។
ក្រៅតែពីការអញ្ជើញចូលរួមក្នុងសន្និសីទខាងលើនេះ ក្នុងដំណើរបំពេញបេសកកម្មការងារនៅប្រទេសចិន៣ថ្ងៃនេះ សម្តេចតេជោ ហ៊ុន សែន ក៏បានអញ្ជើញបំពេញទស្សនកិច្ចនៅវិទ្យាស្ថានកសិកម្មត្រូពិក និងទីក្រុងអវកាសអន្តរជាតិ នៅទីក្រុងវិនឆាង ខេត្តហៃណាន ប្រទេសចិនផងដែរ។
សម្តេចតេជោ ហ៊ុន សែន ក៏បានជួបពិភាក្សាការងារជាមួយថ្នាក់ដឹកនាំបក្ស និងក្រុមហ៊ុនរបស់ចិនមួយចំនួនផងដែរ រួមមាន៖ជំនួបជាមួយលោក ចាវ ឡឺជី ប្រធានគណៈកម្មាធិការអចិន្ត្រៃយ៍នៃសភាតំណាងប្រជាជនចិន, លោក ឈិន ចុង សមាជិកគណ:កម្មាធិការអចិន្ត្រៃយ៍គណ:កម្មាធិការបក្ស និងជាប្រធានគ្រប់គ្រង់ទូទៅ នៃក្រុមហ៊ុនសាងសង់ទូរគមនាគមន៍ចិន (CCCC), លោក ហ្វេង ហ្វៃ លេខាធិការបក្សកុម្មុយនិស្តចិន, នាយឧត្តមសេនីយ៍ ហឺ វ័យទុង សមាជិកការិយាល័យនយោបាយមជ្ឍិមបក្ស និងជាអនុប្រធានទី២ នៃគណៈកម្មការយោធាមជ្ឈិមបក្ស។
