(ភ្នំពេញ)៖ ជនរងគ្រោះក្នុងសំណុំរឿងក្រុមហ៊ុនរបស់អតីតឧកញ៉ា ឡេង ចាន់ណា ក្រោយជួបមេធាវីរាជរដ្ឋាភិបាល បានថ្លែងអំណរគុណយ៉ាងជ្រាលជ្រៅទៅកាន់សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ដែលគិតគូរ និងយកចិត្តទុកដាក់ជាមួយពួកគាត់ជាជនរងគ្រោះ។
ពួកគាត់លើកឡើងថា កន្លងទៅពួកគាត់គ្មានសង្ឃឹមក្នុងខ្លួនទាល់តែអស់ ប្រៀបដូចទូកនៅកណ្ដាលសមុទ្ររកកោះរកត្រើយមិនឃើញឡើយ បន្ទាប់ពីដឹងថាខ្លួនខាតបង់ប្រាក់ដោយសារក្រុមហ៊ុន ប្រ៊ីលាន ស៉ីធីវើល របស់អតីតឧកញ៉ា ឡេង ចាន់ណា។
ជនរងគ្រោះទាំងអស់បានបង្ហាញនូវក្ដីរំពឹងខ្ពស់ នៃពន្លឺយុត្តិធម៌ ក្រោយទទួលបានការពន្យល់តាមទិដ្ឋភាពច្បាប់ពីក្រុមមេធាវីរាជរដ្ឋាភិបាល។ ពួកគាត់ជឿជាក់លើសមត្ថភាពរបស់មេធាវីរាជរដ្ឋាភិបាល ក្នុងជួយការពារក្ដីជូនពួកគាត់តាមផ្លូវតុលាការ។
ក្រៅពីថ្លែងអំណរគុណជូនសម្ដេចធិបតី ហ៊ុន ម៉ាណែត ហើយនោះ ពួកគាត់ក៏បានថ្លែងអំណរគុណដល់លោក គី តិច ប្រធានក្រុមមេធាវីរាជរដ្ឋាភិបាល ដែលចំណាយពេលវេលាដ៏មានតម្លៃជួបពន្យល់ដោយផ្ទាល់ទៅកាន់ពួកគាត់។
សូមជម្រាបថា ក្រុមមេធាវីរាជរដ្ឋាភិបាល ដឹកនាំដោយលោក គី តិច ទេសរដ្ឋមន្ដ្រីទទួលបន្ទុកបេសកកម្មពិសេស និងជាប្រធានក្រុមមេធាវីរាជរដ្ឋាភិបាល ក្រោយការប្រគល់សិទ្ធិពីសម្ដេចធិបតី នាយករដ្ឋមន្ដ្រី បានជួបជាមួយជនរងគ្រោះចំនួន៣លើករួចមកហើយ។
លោក គី តិច បានអះអាងថា នេះជាករណីទី១ហើយ សម្ដេចធិបតី ហ៊ុន ម៉ាណែត ចាត់មេធាវីរាជរដ្ឋាភិបាល ទៅជួយការពារក្ដីដោយមិនគិតថ្លៃសេវាជូនប្រជាពលរដ្ឋក្នុងសំណុំរឿងឯកជនបែបនេះ ព្រោះមេធាវីរាជរដ្ឋាភិបាល ការពារក្ដីជូនតែរាជរដ្ឋាភិបាលប៉ុណ្ណោះ។
តាមរយៈយន្ដការនេះ លោក គី តិច បានលើកឡើងថា ទាំងអស់នេះបង្ហាញពីការគិតគូរយ៉ាងយកចិត្តទុកដាក់ទៅលើសុខទុក្ខរបស់ប្រជាពលរដ្ឋ ពីសំណាក់ប្រមុខនៃរាជរដ្ឋាភិបាលកម្ពុជា។
សូមទស្សនាការលើកឡើងរបស់ប្រជាពលរដ្ឋរងគ្រោះ៖
