(ប៊ឺហ្គិនស្តុក)៖ កិច្ចប្រជុំកំពូលដែលដឹកនាំដោយប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី នៅប្រទេសស្វីស និងមានប្រទេសចំនួនជាង៩០ ចូលរួម មិនអាចសម្រេចបាននូវការឯកភាព ដើម្បីបញ្ចប់សង្រ្គាមនៅអ៊ុយក្រែនទេ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី១៦ ខែមិថុនា ឆ្នាំ២០២៤។
ទោះបីជាមានការគាំទ្រយ៉ាងទូលំទូលាយចំពោះអ៊ុយក្រែន ក្នុងចំណោមប្រទេសដែលចូលរួមក៏ដោយ ក៏បញ្ហាប្រឈមជាច្រើននៅតែមាន ជាពិសេសអំពីការដោះស្រាយក្រោយសង្រ្គាម ដូចជាការតាំងទីលំនៅ ការដកទ័ព និងការធានាសន្តិសុខជាដើម។
សេចក្តីព្រាងនៃសេចក្តីថ្លែងការណ៍ដែលហៅសកម្មភាពរបស់រុស្ស៊ីថាជា «សង្គ្រាម» និងជំរុញឱ្យគោរពបូរណភាពទឹកដីអ៊ុយក្រែន ប្រហែលជាមិនទទួលបានការគាំទ្រពីគ្រប់ប្រទេសដែលចូលរួមនោះទេ។ លោក កាល នេហាំមើ (Karl Nehammer) អធិការបតីអូទ្រីស បានកត់សម្គាល់ថា ប្រទេសមួយចំនួនអាចនឹងបដិសេធមិនចុះហត្ថលេខាលើសេចក្តីថ្លែងការណ៍នេះ ដោយសារបញ្ហាពាក្យពេចន៍ ប៉ុន្តែពួកគេទាំងអស់យល់ស្របថា សង្រ្គាមត្រូវតែបញ្ចប់។
រុស្ស៊ី និងចិន មិនបានចូលរួមក្នុងកិច្ចប្រជុំនេះទេ។ ខាងរុស្ស៊ីបានច្រានចោលកិច្ចប្រជុំនេះ ដោយចាត់ទុកថាជាការខ្ជះខ្ជាយពេលវេលា និងបានដាក់ចេញនូវលក្ខខណ្ឌផ្ទុយគ្នាពីចម្ងាយ ខណៈដែលអ៊ុយក្រែនទទូចថា រុស្ស៊ីមិនអាចដាក់លក្ខខណ្ឌសម្រាប់ការចរចាសន្តិភាពបានឡើយ ដរាបណាសង្រ្គាមនៅតែបន្ត។
គួរជម្រាបថា ទោះបីជាមានការខ្វែងគំនិតគ្នាក៏ដោយ កិច្ចប្រជុំនេះបានបង្ហាញពីការប្តេជ្ញាចិត្តរបស់សហគមន៍អន្តរជាតិ ក្នុងការស្វែងរកដំណោះស្រាយដើម្បីបញ្ចប់សង្រ្គាម។ ប៉ុន្តែកិច្ចប្រជុំនេះក៏បង្ហាញឱ្យឃើញពីភាពស្មុគស្មាញនៃជម្លោះនេះ និងផ្លូវដ៏វែងឆ្ងាយដែលនៅសល់ ដើម្បីសម្រេចបាននូវសន្តិភាពយូរអង្វែងនៅអ៊ុយក្រែន៕
