(ត្បូងឃ្មុំ)៖ លោក ជាម ច័ន្ទសោភ័ណ អភិបាលខេត្តត្បូងឃ្មុំ បានប្រកាសអំពាវនាវឱ្យមន្រ្តីរាជការទូទាំងខេត្តត្បូងឃ្មុំគ្រប់លំដាប់ថ្នាក់ ប្រើប្រាស់បណ្ដាញទំនាក់ទំនងសង្គមឆាត CoolApp ដែលជាស្នាដៃរបស់កូនខ្មែរឲ្យបានគ្រប់ៗគ្នា។ នេះបើតាមសេចក្ដីជូនដំណឹងរបស់រដ្ឋបាលខេត្តត្បូងឃ្មុំ ដែលបណ្ដាញព័ត៌មាន Fresh News ទទួលបាន នាល្ងាចថ្ងៃទី ២៨ ខែមិថុនានេះ។

នៅក្នុងខ្លឹមសារនៃសេចក្ដីជូនដំណឹងបានបញ្ជាក់ថា៖ «CoolApp ជាកម្មវិធីបច្ចេកវិទ្យាទំនើប និងមានការច្នៃប្រឌិតខ្ពស់ មានប្រយោជន៍សម្រាប់ទំនាក់ទំនងក្នុងការងារប្រចាំថ្ងៃរបស់មន្រ្តីរាជការ និងទំនាក់ទំនាងរវាងគ្នា និងគ្នារបស់ប្រជាពលរដ្ឋទូទៅ ប្រកបដោយភាពងាយស្រួល រហ័សទាន់ចិត្ត និងសុវត្ថិភាព។ ការចូលរួមប្រើកម្មវិធី CoolApp នេះឲ្យបានច្រើនកុះករ និងជួយលើកទឹកចិត្ត ដល់កូនខ្មែរយើងឱ្យខិតខំ សិក្សាស្រាវជ្រាវថ្មីៗបន្ថែមទៀតនៅក្នុងយុគសម័យឌីជីថល»។

សេចក្ដីជូនដំណឹងរបស់រដ្ឋបាលខេត្តត្បូងឃ្មុំដដែល បានអំពាវនាវ និងលើកទឹកចិត្ត ដល់ក្រុមប្រឹក្សាខេត្ត គណៈអភិបាលខេត្ត ប្រធានមន្ទីរ អង្គភាពជំនាញជុំវិញខេត្ត កងកម្លាំងប្រដាប់អាវុធទាំងបី រដ្ឋបាលក្រុង ស្រុក រដ្ឋបាលឃុំ សង្កាត់ និងមន្រ្តីរាជការក្នុងខេត្តត្បូងឃ្មុំទាំងអស់ សូមមេត្តាចូលរួមប្រើប្រាស់ បណ្ដាញទំនាក់ទំនងសង្គម CoolApp ដែលជាស្នាដៃរបស់កូនខ្មែរឲ្យបានគ្រប់ៗគ្នា។

សូមជម្រាបថា កាលពីរាត្រីថ្ងៃអាទិត្យ ទី២៣ ខែមិថុនា ឆ្នាំ២០២៤ សម្តេចតេជោ ហ៊ុន សែន ប្រធានព្រឹទ្ធសភា និងអតីតនាយករដ្ឋមន្រ្តីកម្ពុជា ប្រកាសតាមរយៈបណ្តាញសង្គម Facebook ផ្លូវការរបស់សម្តេចដោយ អំពាវនាវឲ្យមន្រ្តីរាជការ និងប្រជាពលរដ្ឋខ្មែរ ប្រើប្រាស់កម្មវិធី CoolApp លើកទឹកចិត្តស្នាដៃកូនខ្មែរ និងដើម្បីសម្រាប់សុវត្ថិភាពសន្តិសុខជាតិ។

ខាងក្រោមនេះជាខ្លឹមសាររបស់សម្តេចតេជោ ហ៊ុន សែន ប្រកាសអំពាវនាវឲ្យមន្រ្តីរាជការ និងប្រជាពលរដ្ឋខ្មែរប្រើប្រាស់កម្មវិធីផ្ញើសារ CoolApp៖

ប៉ុន្មានថ្ងៃមកនេះខ្ញុំបានសាកល្បងប្រើកម្មវិធី CoolApp ដែលកូនខ្មែរបានផលិត និងដាក់ឲ្យប្រើប្រាស់ដែលមានខ្ញុំជាអ្នកអំពាវនាវឲ្យប្រើប្រាស់ផងដែរ។

គោលដៅរបស់ខ្ញុំក្រៅពីលើកទឹកចិត្តឲ្យកូនខ្មែរចេះស្រាវជ្រាវបច្ចេកទេសវិទ្យាសាស្ត្រ ក្លាយជាផលិតផលខ្មែរ អ្វីដែលខ្ញុំត្រូវគិតគឺសុវត្តិភាពសម្រាប់សន្តិសុខជាតិ ដែលបរទេសពិបាកជ្រៀតជ្រែកយកព័ត៌មានពីយើងបាន។ ប្រទេសគេមានប្រព័ន្ធទំនាក់ទំនងរបស់គេ ដូចជា Wechat របស់ចិន, Zalo របស់វៀតណាម, Kakao Talk របស់កូរ៉េខាងត្បូង, Telegram របស់រុស្ស៉ី ដូច្នេះកម្ពុជាយើងមាន CoolApp។

រឿងសំខាន់មួយទៀតគឺការធានាដល់ទំនាក់ទំនងក្នុងប្រទេសរបស់យើង ក្នុងករណីបណ្តាញទំនាក់ទំនងរបស់បរទេស ជួបការរអាក់រអួលដោយប្រការណាមួយ។ ដូចនេះមន្ត្រីរាជការស៉ីវិល និងកងកម្លាំងប្រដាប់គួរបង្កើតឲ្យមាន CoolApp ដើម្បីធានាម្ចាស់ការលើរក្សាការសម្ងាត់ផង និងការដាច់ទំនាក់ទំនងពីប្រព័ន្ធបរទេសផង។ CoolApp ប្រើប្រព័ន្ធរក្សាការសំងាត់បំផុត គឺប្រព័ន្ធ Encryption ដែលពុំអាចមើល ឬអានសាររបស់យើងទេ សូម្បីតែក្រុមហ៊ុន CoolApp ផ្ទាល់ក៏ដោយ។ យើងមិនបានហាមឃាត់ មិនឲ្យបងប្អូនឈប់ប្រើប្រព័ន្ធដែលធ្លាប់ប្រើនោះឡើយ។

សម្រាប់ខ្ញុំបាន និងកំពុងប្រើ៨ប្រពន្ធ័រាប់ទាំង CoolApp ថ្មីផង។ តើមានអ្វីប្លែកពីប្រព័ន្ធផ្សេងទេ? សម្រាប់ខ្ញុំបានបញ្ចូលទៅក្នុងទូរស័ព្ទ៦គ្រឿង និងសាកល្បងប្រើប្រាស់ឃើញមានភាពងាយស្រួលលើចំណុច៣គឺ៖

១. ងាយស្រួលបង្កើតដោយមិនពិបាករកលេខកូដពីកន្លែងផ្សេង ឬរង់ចាំយូរ។
២. បញ្ជូនសារជាអក្សរ រូបថត វីដេអូ និងសារសម្លេងបានលឿន។
៣. ហៅនិយាយឆ្លងឆ្លើយនិង Video call បានយ៉ាងច្បាស់ល្អ។
សរុបមកវាប្រើ Internet តិចជាងប្រពន្ធ័ផ្សេងទៀត។

ចំណុចនេះជាការសាកល្បងរបស់ខ្ញុំប៉ុណ្ណោះបើបងប្អូនចង់សាកល្បងក៏សូមសាកល្បងមើលរាប់ទាំងប្អូននៅក្រៅប្រទេស ព្រោះបងប្អូនមួយចំនួនបានប្រើប្រាស់ប្រព័ន្ធនេះ៕