(ភ្នំពេញ)៖ លោក សុខ សូកេន រដ្ឋមន្ត្រីក្រសួងទេសចរណ៍ បានចូលរួមជាអធិបតីក្នុងពិធីចុះហត្ថលេខាលើអនុស្សរណៈនៃការយោគយល់គ្នា រវាងក្រសួងទេសចរណ៍ និងក្រុមហ៊ុន Visa Worldwide PTE. Limited ដែលដឹកនាំដោយលោក Arturo Planell អ្នកគ្រប់គ្រងប្រចាំតំបន់អាស៊ីអាគ្នេយ៍របស់ក្រុមហ៊ុន Visa Worldwide PTE. Limited នាថ្ងៃទី១០ ខែកញ្ញា ឆ្នាំ២០២៤ នៅទីស្ដីការក្រសួងទេសចរណ៍។

អនុស្សរណៈនៃការយោគយល់គ្នានេះ ផ្ដោតលើចំណុចសំខាន់ៗនៃកិច្ចសហប្រតិបត្តិការ រួមមាន៖ ការចែករំលែកទិន្នន័យ ការគាំទ្រផ្នែកទីផ្សារ ការកសាងសមត្ថភាពនិងចំណេះដឹងផ្នែកហិរញ្ញវត្ថុ និងឌីជីថល និងការផ្លាស់ប្តូរបរិបទឌីជីថល ដែលផ្ដោតលើការទូទាត់តាមឌីជីថលក្នុងវិស័យទេសចរណ៍ទាំងមូល។

លោករដ្ឋមន្ត្រីក្រសួងទេសចរណ៍ បានគូសបញ្ជាក់ពីភាពជាដៃគូយ៉ាងសំខាន់របស់ក្រុមហ៊ុន Visa Worldwide PTE. Limited ក្នុងការកសាងប្រព័ន្ធបច្ចេកវិទ្យាមួយដ៏រឹងមាំ ដើម្បីផ្ដល់ភាពងាយស្រួលក្នុងការប្រើប្រាស់ និងទូទាត់សម្រាប់ទេសចរនៅកម្ពុជា៕