(ភ្នំពេញ)៖ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ នៅថ្ងៃទី២៦ ខែកញ្ញា ឆ្នាំ២០២៤ បានទទួលការចូលជួបសម្ដែងការគួរសម ពីសំណាក់លោកស្រី Yati Kurniati នាយកប្រតិបត្តិនៃ Southeast Asia Voting Group (SEAVG), មូលនិធិរូបិយវត្ថុអន្តរជាតិ (IMF)។
ជាមួយកិច្ចស្វាគមន៍យ៉ាងកក់ក្តៅ និងថ្លែងអំណរគុណចំពោះដំណើរទស្សនកិច្ច ជាក់ស្ដែងរបស់លោកស្រី Yati Kurniati នៅកម្ពុជា ចំមុនពេលកិច្ចប្រជុំបូកសរុបលទ្ធផលបេសកកម្ម Article IV នៃមូលនិធិរូបិយវត្ថុអន្តរជាតិ, ឧបនាយករដ្ឋមន្រ្តី អូន ព័ន្ធមុនីរ័ត្ន ក៏បានជម្រាបជារួមនូវស្ថានភាពសេដ្ឋកិច្ចកម្ពុជា ដែលរក្សាបាននៅភាពធន់ល្អ នៅចំពោះមុខស្ថានភាពមិនប្រាកដប្រជាខ្ពស់នៃកត្តាខាងក្រៅក្ដី ក្នុងនោះ វិស័យខ្លះមានភាពប្រសើរជាងការរំពឹងទុក ខណៈវិស័យផ្សេងមួយចំនួនទៀត អាចប្រឈមនឹងការថមថយជាងការប៉ាន់ស្មាន កាលពីដើមឆ្នាំ។ កម្ពុជា បានប្រកាន់យកគោលដៅ ក្នុងការសម្រេចកំណើនសេដ្ឋកិច្ចឱ្យបាន ៦,០% ក្នុងឆ្នាំ ២០២៤ និង ៦,៣% ឆ្នាំ ២០២៥ ។
ទន្ទឹមគ្នានេះ, រាជរដ្ឋាភិបាលក៏នៅបន្តតាមដានស្ថានភាពសេដ្ឋកិច្ច យ៉ាងយកចិត្តទុកដាក់ទាំងផ្នែកខាងក្នុង និងខាងក្រៅ ហើយនឹងធ្វើការវាយតម្លៃសេដ្ឋកិច្ចឡើងវិញ ក្នុងពេលខាងមុខ ។ ជាមួយគ្នានេះ, អគ្គបណ្ឌិតសភាចារ្យ អូន ព័ន្ធមុនីរ័ត្ន ក៏បានបញ្ជាក់ផងដែរថា ការវាយតម្លៃស្ថានភាព និងកំណើនសេដ្ឋកិច្ចកម្ពុជាសម្រាប់ឆ្នាំ ២០២៤ និង ២០២៥ អាចនឹងមានភាពខុសគ្នារវាងស្ថាប័នរាជរដ្ឋាភិបាល និងដៃគូអភិវឌ្ឍន៍នានា អាស្រ័យលើទិន្នន័យ, ការសន្មត និងការពិគ្រោះយោបល់ជាមួយភាគីពាក់ព័ន្ធ ។
ចំពោះទិដ្ឋភាពហិរញ្ញវត្ថុសាធារណៈ, អគ្គបណ្ឌិតសភាចារ្យ ក៏បានបង្ហាញពីការគិតគូររបស់រាជរដ្ឋាភិបាល ក្នុងការប្រកាន់ជំហរ គោលនយោបាយពង្រឹងប្រសិទ្ធភាពថវិកាជាជំហាន (Gradual Consolidation Fiscal Stance) សម្រាប់រយៈពេលមធ្យម ដោយពង្រឹងការប្រមូលចំណូល, បង្កើនប្រសិទ្ធភាពចំណាយ និងចាយចំគោលដៅ ព្រមទាំងកសាងទ្រនាប់ថវិកាឡើងវិញសម្រាប់ទ្រទ្រង់កំណើន និងភាពធន់សេដ្ឋកិច្ចកម្ពុជា។ ជាក់ស្តែង, រាជរដ្ឋាភិបាល បាននិងកំពុងរៀបចំគោលនយោបាយផ្សេងៗ ដូចជា «យុទ្ធសាស្ត្រកៀរគរចំណូល ២០២៤-២០២៨», «កម្មវិធីលើកកម្ពស់ភាពប្រកួតប្រជែង បង្កើនពិពិធកម្ម និង ពង្រឹងភាពធន់ ដើម្បីកំណើនសេដ្ឋកិច្ច នៅក្នុងបរិការណ៍សកល ដែលមានភាពមិនប្រាកដប្រជាខ្ពស់ឆ្នាំ ២០២៤-២០២៨» ជាដើម ។ ជាមួយគ្នានេះ, ក្រសួងសេដ្ឋកិច្ច និងហិរញ្ញវត្ថុ ក៏បានសម្របសម្រួលក្នុងការរៀបចំគោលនយោបាយសារពើពន្ធ ដែលមានការសម្របសម្រួលជាមួយនឹងគោលនយោបាយរូបិយវត្ថុ ក្នុងគោលដៅជំរុញកំណើន និងធានាស្ថិរភាពហិរញ្ញវត្ថុ ។
លោកស្រី Yati Kurniati បានធ្វើការកោតសរសើរចំពោះរាជរដ្ឋាភិបាលកម្ពុជាលើភាពបុរេសកម្ម និងម្ចាស់ការក្នុងការគ្រប់គ្រងសេដ្ឋកិច្ច និងហិរញ្ញវត្ថុសាធារណៈ ព្រមទាំងផ្លែផ្កាកំណើនដែលកម្ពុជាទទួលបាននាពេលកន្លងមក និងការឈានទៅសម្រេចគោលដៅរយៈពេលវែងខាងមុខ។
ជាមួយគ្នានេះ, លោកស្រី Yati Kurniati ក៏បានជម្រាបថា បេសកកម្ម Article IV នឹងបន្ថែមនូវការវាយតម្លៃ តាមរយៈភាពគ្រប់គ្រាន់នៃទិន្នន័យ (Data Adequacy Assessment) ដែលនឹងចាប់អនុវត្តពីឆ្នាំនេះតទៅ ក្នុងគោលបំណងកែលម្អការវាយតម្លៃសេដ្ឋកិច្ចកម្ពុជាឱ្យកាន់តែប្រសើរ និងអាចដាក់ចេញនូវអនុសាសន៍គោលនយោបាយ កាន់តែមានប្រសិទ្ធភាព។ លោកស្រី Yati Kurniati បានបញ្ជាក់ពីការត្រៀមខ្លួនគាំទ្រ និងការពារជំហររបស់រាជរដ្ឋាភិបាលកម្ពុជា នៅក្នុងក្រុមប្រឹក្សាភិបាលមូលនិធិរូបិយវត្ថុអន្តរជាតិ។
អគ្គបណ្ឌិតសភាចារ្យ អូន ព័ន្ធមុនីរ័ត្ន ក៏បានលើកឡើងពីការផ្តល់អាទិភាពខ្ពស់ ចំពោះការបង្កើនគុណភាពទិន្នន័យ និងការចែករំលែកទិន្នន័យជាមួយភាគីពាក់ព័ន្ធ ដោយក្នុង នោះរាជរដ្ឋាភិបាលបាន និងកំពុងផ្តោតសំខាន់លើការកសាងសមត្ថភាពចងក្រងទិន្នន័យរបស់វិទ្យាស្ថានជាតិស្ថិតិ នៃក្រសួងផែនការ តាមរយៈការស្នើសុំជំនួយបច្ចេកទេស ពីមូលនិធិរូបិយវត្ថុអន្តរជាតិលើការកសាងស្ថាប័ន ក៏ដូចជាសមត្ថភាពចងក្រងទិន្នន័យ ជាពិសេស គឺទិន្នន័យគណនេយ្យជាតិ។
អគ្គបណ្ឌិតសភាចារ្យ ក៏បានថ្លែងអំណរគុណយ៉ាងជ្រាលជ្រៅជាថ្មីម្តងទៀត ចំពោះជំហររបស់លោកស្រី ក្នុងការការពារផលប្រយោជន៍របស់កម្ពុជា នៅក្នុងក្រុមប្រឹក្សាភិបាលមូលនិធិរូបិយវត្ថុអន្តរជាតិ ។
អគ្គបណ្ឌិតសភាចារ្យ ឧបនាយករដ្ឋមន្រ្តី បានជូនពរលោកស្រី Yati Kurniati និងក្រុមការងារទទួលបានជោគជ័យជាផ្លែផ្កាក្នុងទស្សនកិច្ចមកកម្ពុជា៕
