(ភ្នំពេញ)៖ គាំទ្រចំពោះការអំពាវនាវរបស់សម្តេចតេជោ ហ៊ុន​ សែន ប្រធានព្រឹទ្ធសភាកម្ពុជា ដែលបានស្នើរាជរដ្ឋាភិបាលបង្កើតគ្រុប CoolApp របស់រាជរដ្ឋាភិបាល ទាំងស្ថាប័នថ្នាក់ជាតិ ថ្នាក់ក្រោមជាតិ និងកងកម្លាំងប្រដាប់អាវុធគ្រប់ប្រភេទ ព្រមទាំងប្រជាពលរដ្ឋខ្មែរទាំងអស់ ប្រើប្រាស់ CoolApp ជំនួសឲ្យ Telegram នោះ លោក អ៊ុំ វុទ្ធទី ស្ថាបនិក និងជាប្រធានក្រុមប្រឹក្សាភិបាលសមាគមនិស្សិតកម្ពុជា ប្រចាំសាធារណរដ្ឋប្រជាមានិតចិន (ACSC) នៅយប់ថ្ងៃទី២៨ ខែកញ្ញា ឆ្នាំ២០២៤នេះ បានប្រកាសឱ្យសមាជិកសមាគម និងនិស្សិតកំពុងសិក្សានៅចិនទាំងអស់នាំគ្នាប្រើប្រាស់ CoolApp ជាសម្រាប់ទំនាក់ទំនងប្រចាំថ្ងៃ។

លោក អ៊ុំ វុទ្ធទី បានបញ្ជាក់ពីចំណុចខ្លាំងរបស់ CoolApp ដែលបងប្អូនខ្មែរ និងនិស្សិតនៅប្រទេសចិនគួរតែប្រើប្រាស់ CoolApp គឺ Call សម្លេងថ្លាច្បាស់ Call & Chat ពីប្រទេសចិនមកកាន់កម្ពុជា ដោយមិនបាច់ប្រើ VPN យ៉ាងងាយស្រួល ដែលចំណុចនេះ បានជួយកាត់បន្ថយការចំណាយរបស់និស្សិត ដែលកន្លងមកពួកគាត់ត្រូវបង់សេវា VPN ប្រចាំខែ។

លោក អ៊ុំ វុទ្ធទី បានបញ្ជាក់ឱ្យដឹងថា «ថ្នាក់ដឹកនាំ សមាជិក សមាជិកាសមាគមនិស្សិតកម្ពុជា ប្រចាំសាធារណរដ្ឋប្រជាមានិតចិន បានគាំទ្រយ៉ាងពេញទំហឹង នូវអនុសាសន៍របស់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា ដោយនាំគ្នាប្រើប្រាស់ CoolApp របស់ខ្មែរ ជំនួយ Telegram សម្រាប់ការប្រើប្រាស់ក្នុងការសិក្សា និងជីវភាពប្រចាំថ្ងៃ ជាពិសេសទំនាក់ទំនាក់មកអ្នកផ្ទះ និងមិត្ភភ័ក្ភនៅកម្ពុជា។

ខ្ញុំបានស្នើដល់បងប្អូននិស្សិតខ្មែរនៅប្រទេសចិនទាំងអស់ ងាកមកប្រើប្រាស់ CoolApp ដោយសារតែចំណុចខ្លាំងរបស់ CoolApp គឺ Call សម្លេងថ្លាច្បាស់ Call & Chat ពីប្រទេសចិនមកកាន់កម្ពុជា ដោយមិនបាច់ប្រើ VPN យ៉ាងងាយស្រួល ដែលចំណុចនេះ បានជួយកាត់បន្ថយការចំណាយរបស់និស្សិត ដែលកន្លងមកបងប្អូននិស្សិតយើង ត្រូវបង់សេវា VPN ប្រចាំខែ។ QR ខាងក្រោមនេះ ជាគណនី CoolApp របស់រូបខ្ញុំបាទផ្ទាល់ ដែលប្រើប្រាស់ជំនួសគណនី Telegram»។

សូមជម្រាបថា សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានស្នើឲ្យរាជរដ្ឋាភិបាលបង្កើតគ្រុប CoolApp របស់រាជរដ្ឋាភិបាល ទាំងស្ថាប័នថ្នាក់ជាតិ ថ្នាក់ក្រោមជាតិ និងកងកម្លាំងប្រដាប់អាវុធគ្រប់ប្រភេទ ព្រមទាំងប្រជាពលរដ្ឋខ្មែរទាំងអស់ប្រើប្រាស់ CoolApp ជំនួសឲ្យ Telegram បន្ទាប់ពីនារយៈពេលចុងក្រោយនេះ Telegram របស់សម្ដេច មានបញ្ហាមិនអាចបញ្ជូនសារចេញបានទាំងអក្សរ ទាំងសារសំឡេង។ ការស្នើរបស់សម្ដេចតេជោ បានធ្វើឡើងនារាត្រីថ្ងៃទី២៨ ខែកញ្ញា ឆ្នាំ២០២៤។

បើតាមសំណេរលើបណ្ដាញសង្គម Facebook ផ្លូវការរបស់សម្ដេចតេជោ បានបញ្ជាក់ថា៖

«ប៉ុន្មានខែមកនេះតេឡេក្រាម (Telegram) របស់ខ្ញុំទទួលសារបានតែមិនអាចបញ្ជូនសារចេញបានទាំងអក្សរ ទាំងសារសម្លេង ប្រសិនជាចេញបានក៏ត្រូវរង់ចាំ ដែលធ្វើឲ្យអ្នកផ្ញើសារមកខ្ញុំតាមតេឡេក្រាមមិនបានឆ្លើយតបពីខ្ញុំ ឬត្រូវឆ្លើយយឺត។

ខ្ញុំសូមបងប្អូនដែលមានទំនាក់ជាមួយខ្ញុំងាកមកប្រើតាម WhatsApp ពិសេសតាម CoolApp ដែលជារបស់ខ្មែរ។

ដោយសារមានព័ត៌មានជាច្រើនបានផ្សាយពីការបែកធ្លាយទិន្នន័យបុគ្គលតាម Telegram នៅតាមប្រទេសមួយចំនួនបានធ្វើឲ្យខ្ញុំព្រួយបារម្មណ៍ពីសន្តិសុខជាតិ និងសុវត្តិភាពព័ត៌មានផ្ទាល់ខ្លួនរបស់ប្រជាជនយើងម្នាក់ៗ។

ដោយកង្វល់ពីបញ្ហាដូចបានលើកឡើងខាងលើ ខ្ញុំស្នើរាជរដ្ឋាភិបាលបង្កើតគ្រុប CoolApp របស់រាជរដ្ឋាភិបាល របស់ស្ថាបន័ថ្នាក់ជាតិ ថ្នាក់ក្រោមជាតិ របស់កងកម្លាំងប្រដាប់អាវុធគ្រប់ប្រភេទជំនួសឲ្យ Telegram។

ស្ថាប័នផ្សេងទៀតដូចជា ព្រឹទ្ធសភា រដ្ឋសភា តុលាការ ក៏គួររៀបចំគ្រុប CoolApp ផងដែរ។ មន្ត្រីរាជការស៊ីវិល កងកម្លាំងប្រដាប់អាវុធ និងប្រជាជន ដែលប្រើស្មាតហ្វូនក៏គប្បីបង្កើត CoolApp ដើម្បីប្រើតាមការស្ម័គ្រចិត្ត។

នេះមិនមែនជាការបង្ខិតបង្ខំឲ្យប្រើប្រាស់ CoolApp ទេ តែជាការដាស់តឿនសម្រាប់ធានាដល់សន្តិសុខជាតិ និងសន្តិសុខផ្ទាល់ខ្លួន អាស្រ័យដោយ CoolApp ជារបស់ខ្មែរក្នុង​ដែនសុវត្តិភាពរបស់កម្ពុជា និងម្យ៉ាងទៀត CoolApp ក៏ប្រើប្រាស់បាននៅទូទាំងពិភពលោក ដូចប្រព័ន្ធដ៏ទៃទៀតដែរ ខុសគ្នាត្រង់ CoolApp មិនអាចឲ្យបរទេសចូលយកទិន្នន័យរបស់រដ្ឋ ឬ ឯកជនបាននោះឡើយ។

យើងត្រូវការប្រព័ន្ធល្បឿនលឿន និងច្បាស់ទាំងសម្លេងទាំងរូបភាពដូច CoolApp សព្វថ្ងៃ ព្រមទាំងត្រូវការរក្សាការសម្ងាត់របស់ជាតិក៏ដូចជា បុគ្គលម្នាក់ៗផងដែរ។

បច្ចុប្បន្នអ្នកប្រើប្រាស់ CoolApp បានកើនលឿនរហូតដល់៣០ម៉ឺននាក់ និងប្រើប្រាស់ប្រព័ន្ធ Encryption ដូចកម្មវិធីបរទេសដែរ មិនអាចជនណាម្នាក់មើលសាររបស់យើងបានឡើយ សូម្បីតែក្រុមហ៊ុនផ្ទាល់ក៏ដោយ។ កម្ពុជាមាន CoolApp ក៏ជាមោទនភាពរបស់ខ្មែរយើងដែរ ព្រោះសមាជិកអាស៊ានទាំងអស់ មានតែ វៀតណាម និងកម្ពុជា»៕