(ភ្នំពេញ)៖ យ៉ាងហោចណាស់ មានជនជាតិវៀតណាម ៤៦នាក់ ដែលលួចស្នាក់នៅធ្វើការងារខុសច្បាប់ ត្រូវបានបណ្តេញចេញពីកម្ពុជា នៅថ្ងៃទី០៦ ខែតុលា ឆ្នាំ២០២៤ ម្សិលមិញនេះ។ នេះបើតាមរបាយការណ៍របស់ អគ្គនាយកដ្ឋានអន្តោប្រវេសន៍ដែលផ្សព្វផ្សាយនៅលើទំព័រហ្វេសប៊ុក។
ការបណ្តេញចេញធ្វើឡើងតាមប៉ុស្តិ៍នគរបាលច្រកទ្វារព្រំដែនអន្តរជាតិព្រែកចាក ខេត្តកំពត ក្នុងនោះមានចំនួន ៤២នាក់ (ស្រី១៦នាក់) ដែលពាក់ព័ន្ធករណីលួចស្នាក់នៅធ្វើការងារខុសច្បាប់ (Call Center) ទទួលពីស្នងការដ្ឋាននគរបាលខេត្តកំពត និងចំនួន ៤នាក់ ភេទប្រុស ពាក់ពន្ធ័ករណី លួចស្នាក់នៅធ្វើការងារខុសច្បាប់ (គ្មានលិខិតឆ្លងដែន) ទទួលពីស្នងការដ្ឋាននគរបាលខេត្តព្រះសីហនុ។
បើតាម នាយឧត្តមសេនីយ៍ សន្តិបណ្ឌិត ខៀវ សុភ័គ រដ្ឋលេខាធិការ និងជាអ្នកនាំពាក្យក្រសួងមហាផ្ទៃ បានបញ្ជាក់ប្រាប់បណ្តាញព័ត៌មាន Fresh News ឱ្យដឹងថា នៅថ្ងៃទី០៦ ខែតុលា ម្សិលមិញនេះ ក្រៅពីជនជាតិវៀតណាម ៤៦នាក់ ដែលត្រូវបានបណ្តេញចេញ ក៏មានជនបរទេស១៣នាក់ផ្សេងទៀតដែរ ត្រូវបានបណ្តេញចេញក្នុងនោះមានជនជាតិជប៉ុន១២នាក់ និងជនជាតិចិន១នាក់។ កម្ពុជាក៏កំពុងត្រៀមបណ្តេញជនបរទេសដែលធ្វើការខុសច្បាប់ជាង៣០០នាក់ផ្សេងទៀតផងដែរ ដែលក្នុងនោះមានរហូតដល់២០សញ្ជាតិ។ លោកនាយឧត្តមសេនីយ៍ បានបញ្ជាក់បន្ថែមថា ការបណ្តេញចេញនេះការអនុវត្តតាមច្បាប់ចំពោះជនបរទេសទាំងអស់ដែលចូលមកស្នាក់នៅ និងធ្វើការដោយខុសច្បាប់នៅកម្ពុជា។
កាលពីខែកញ្ញា កន្លងទៅ កម្ពុជាបានបណ្ដេញជនជាតិវៀតណាមសរុប៨១នាក់ ចេញពីប្រទេស ក្នុងនោះមានជនជាតិវៀតណាម៦០នាក់ (ស្រី១៥នាក់) ពាក់ព័ន្ធករណីលួចស្នាក់នៅធ្វើការងារខុសច្បាប់ (Call Center) ត្រូវបានបណ្តេញចេញតាមប៉ុស្តិ៍នគរបាលច្រកទ្វារព្រំដែនអន្តរជាតិព្រែកចាក ខេត្តកំពត កាលពីថ្ងៃទី០៦ ខែកញ្ញា និងជនជាតិវៀតណាម ២១នាក់ (ស្រី២នាក់) ពាក់ព័ន្ធករណី បំពានប្រកាសស្តីពីការបណ្តេញចេញ លួចឆ្លងដែនខុសច្បាប់ លួចស្នាក់នៅធ្វើការងារខុសច្បាប់ គ្មានលិខិតឆ្លងដែន ត្រូវបានបណ្តេញចេញតាមប៉ុស្តិ៍នគរបាលច្រកទ្វារព្រំដែនអន្តរជាតិបាវិត ខេត្តស្វាយរៀង កាលពីថ្ងៃទី២០ ខែកញ្ញា៕
