(ភ្នំពេញ)៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានឱ្យដឹងថា រហូតមដល់ពេលនេះ កម្ពុជាបានបញ្ជូនទ័ពមួកខៀវ ជិត១ម៉ឺននាក់ ចេញទៅបំពេញបេសកកម្មមនុស្សធម៌ នៅក្រោមឆត្ររបស់អង្គការ សហប្រជាជាតិ ទៅកាន់ ១២បេសកកម្ម ក្នុងប្រទេសចំនួន១០ ដែលជួបប្រទះនឹងភ្លើងសង្គ្រាមស៉ីវិល, បច្ចុប្បន្ននេះមានកងទ័ពមួកខៀវចំនួន ៦២៧នាក់ ក្នុងនោះស្ត្រី ១៣០នាក់ កំពុងបំពេញភារកិច្ចក្នុងប្រទេសចំនួន៤។

ជាមួយគ្នានេះ សម្តេចមហាបវរធិបតី ហ៊ុន ម៉ាណែត ក៏បានកោតសសើរ និងថ្លែងអំណរគុណដល់កងទ័មួកខៀវកម្ពុជា មកពីគ្រប់កងឯកភាពទ័ព ដែលបានលះបង់ចូលរួមរក្សាសន្តិភាព នៅក្រោមឆត្ររបស់អង្គការសហប្រជាជាតិ (UN) នៅក្នុងប្រទេសកំពុងមានសង្គ្រាមស៉ីវិល។ ហើយកងទ័ពកម្ពុជា មិនត្រឹមតែបានចូលរួមក្នុងការធានាសន្តិភាព ការជួយជំរុញការអភិវឌ្ឍប្រទេសជាតិ ជួយដល់ប្រជាពលរដ្ឋនៅពេលជួបគ្រោះអាសន្ននានានោះទេ ប៉ុន្តែ កងទ័ពកម្ពុជា បានលើកកម្ពស់កិត្យានុភាពរបស់កម្ពុជា នៅលើឆាកអន្តរជាតិ តាមរយៈចូលរួមនៅក្នុងតំបន់បំពេញបេសកកម្ម ក្នុងតំបន់បេសកម្មរបស់ខ្លួននៅក្រៅប្រទេស។

ជាមួយគ្នានេះ សម្តេចមហាបវរធិបតី ហ៊ុន ម៉ាណែត ក៏បានលើកឡើងថា នៅពេលដែលសម្តេចបានជួបជាមួយថ្នាក់ដឹកនាំបរទេស គឺថ្នាក់ដឹកនាំបរទេសតែងតែកោតសសើរពីការលះបង់របស់កងទ័ពមួកខៀវកម្ពុជា ដើម្បីចូលរួមចំណែករក្សាសន្តិភាពជូនប្រទេសដែលកំពុងជួបវិបត្តិដោយសារតែភ្លើងសង្គ្រាម។ បើងាកទៅមើលពី៣០ឆ្នាំមុន ប្រទេសកម្ពុជា ជាប្រទេសដែលទទួលយកកងកម្លាំងមួកខៀវ ក្រោមឆត្ររបស់អង្គការសហប្រជាជាតិ ដើម្បីមករក្សាសន្តិភាព តែនៅក្នុងរយៈពេលដ៏ខ្លីកម្ពុជា បានប្រែក្លាយជាប្រទេសបញ្ជូនកងទ័ពមួកខៀវ ចេញទៅបំពេញបេសកម្មរក្សាសន្តិភាព បំពេញកិច្ចការងារមនុស្សធម៌នៅតាមបណ្តាប្រទេសមានសង្គ្រាមទៅវិញ។

ក្នុងឱកាសអញ្ជើញជាអធិបតីអបអរសាទរខួបអនុស្សាវរីយ៍៣០ឆ្នាំ ថ្ងៃបង្កើតកងពលតូចលេខ៧០ នៅទីបញ្ជាការកងពលតូចលេខ៧០ នាព្រឹកថ្ងៃទី១៥​ ខែតុលា​ឆ្នាំ២០២៤ សម្ដេចបវរធិបតី ហ៊ុន ម៉ាណែត បានឱ្យដឹងយ៉ាងដូច្នេះថា៖ «មកដល់ម៉ោងនេះ យើង (កម្ពុជា) បញ្ជូនកងទ័ពជិត ១ម៉ឺននាក់ នៅក្នុង១០ប្រទេស តាំងពីឆ្នាំ២០០៥មក ហើយបច្ចុប្បន្ននេះ យើងមាន ៦២៧នាក់ ក្នុងនោះមានស្ត្រី ១៣០នាក់ ដែលកំពុងបំពេញភារកិច្ចក្នុងប្រទេសចំនួន៤»។

ចំពោះកិច្ចការងារបញ្ជូនកងទ័ពកម្លាំងចេញក្រៅប្រទេស, សម្តេចមហាបវរធិបតី ហ៊ុន ម៉ាណែត បានថ្លែងថា បានកែសម្រួលប្រធានក្រុមការងារបញ្ជូនកងទ័ពទៅក្រៅប្រទេស ដោយប្ដូរពីរដ្ឋមន្ដ្រីក្រសួងការបរទេស និងសហប្រតិបត្តិការអន្តរជាតិ មករដ្ឋមន្ដ្រីក្រសួងការពារជាតិ ធ្វើជាប្រធានវិញ សម្រាប់កិច្ចការងារនេះ។ ដោយឡែកសក្រសួងការបរទេស ត្រូវចាត់តាំងរដ្ឋលេខាធិការ ១រូប ដើម្បីធ្វើជាអនុប្រធាន សម្រាប់ធ្វើការសម្របសម្រួល ពីព្រោះកិច្ចការងារនេះមានសារៈសំខាន់លើការងារទំនាក់ទំនងការទូត។

សម្ដេចមហាបវរធិបតី ហ៊ុន ម៉ាណែត ណែនាំឧបនាយករដ្ឋមន្ដ្រី ទៀ សីហា តាមដានឱ្យជាប់ជានិច្ចអំពីស្ថានភាពកងទ័ពមួកខៀវកម្ពុជានៅប្រទេសលីបង់ ខណៈបើមានស្ថានការណ៍ ចាំបាច់ត្រូវតែជម្លៀសកងទ័ពចេញ គឺជាការងារដ៏ចាំបាច់ ការរក្សាអាយុជីវិតកងទ័ពកម្ពុជា នៅក្រៅប្រទេស ជារឿងដំសំខាន់។ ចំណែកឯកសារ និងសម្ភារៈបើចាំបាច់ ត្រូវកម្ទេចចោល ត្រូវតែកម្ទេចចោលចុះ។ ខណៈកាលពីឆ្នាំ២០២៣ សម្តេចបានចារឱ្យកម្ទេចចោលឯកសារ និងសម្ភារៈនៅក្នុងប្រទេសម៉ាលី បន្ទាប់ពីអង្គការសហប្រជាជាតិ ប្រកាសដកកងទ័ពមួកខៀវចេញទាំងស្រុងពីប្រទេសមួយនេះ។

បន្ថែមពីនេះ សម្ដេចបវរធិបតី ហ៊ុន ម៉ាណែត បានបញ្ជាក់ថា ការធានាសុវត្ថិភាពរបស់ប្រជាពលរដ្ឋនៅតំបន់ដែលមានសង្គ្រាម ជារឿងចាំបាច់ដាច់ខាត។ ហើយរាជរដ្ឋាភិបាលកម្ពុជា បានយកចិត្តទុកដាក់ដល់ប្រជាពលរដ្ឋគ្រប់ទីកន្លែង សូមឪពុកម្ដាយ អាណាព្យាបាលមានភាពកក់ក្ដៅ។

គួរបញ្ជាក់ថា រយៈពេល១៨ឆ្នាំមកនេះ កម្ពុជាបានបញ្ជូនកងកម្លាំងសរុប ៩,៤៦៥នាក់ ក្នុងនោះនារី៨០១នាក់ ទៅកាន់១២បេសកកម្មក្នុង ១០ប្រទេស រួមមាន៖ សាធារណរដ្ឋស៊ូដង់ ស៊ូដង់ខាងត្បូង ឆាដ លីបង់ សាយប្រើស ស៊ីរី អាហ្វ្រិកកណ្តាល ម៉ាលី យ៉េមែន និងសាធារណរដ្ឋប្រជាធិបតេយ្យកុងហ្គោ។ បច្ចុប្បន្ន កម្លាំងកម្ពុជាកំពុងបំពេញបេសកកម្មមានចំនួន ៦៤០នាក់ ក្នុងនោះនារី ១១៩នាក់ ក្នុងប្រទេសចំនួន៥រួមមាន៖ ស៊ូដង់ខាងត្បូង លីបង់ ម៉ាលី អាហ្វិ្រកកណ្តាល និងសាធារណរដ្ឋប្រជាធិបតេយ្យកុងហ្គោ៕