(ទីក្រុងហ្សឺណែវ)៖ លោកបណ្ឌិត សម តារា អនុប្រធានគណៈកម្មការទី១ នៃរដ្ឋសភា និងលោកស្រី ខេង សំវ៉ាដា អនុប្រធានគណៈកម្មការទី៧ នៃរដ្ឋសភា បានអញ្ជើញចូលរួមកិច្ចប្រជុំរបស់គណៈកម្មការអចិន្ត្រៃយ៍ស្តីពី សន្តិភាព និងសន្តិសុខអន្តរជាតិ នៃសហភាពអន្តរសភា (IPU149th) អំពី «ក្រុមសភានិយាយភាសាបារំាងAPF» ដែលមានសមាជិកចំនួន៣០នាក់ មកពី២០ប្រទេសអញ្ជើញចូលរួម នាព្រឹកថ្ងៃទី១៤ ខែតុលា ឆ្នាំ២០២៤នេះ ។
អង្គប្រជុំបានពិភាក្សាអំពីសារៈសំខាន់នៃការទូតសភា ការថយចុះនៃការប្រើប្រាស់ភាសាបារាំង និងឥទ្ធិពលនៃបញ្ញាសប្បនិម្មិតមកលើប្រទេសកំពុងអភិវឌ្ឍន៍ និងប្រទេស ដែលមានការអភិវឌ្ឍតិចតួច។ ជាមួយគ្នានេះ ប្រទេសវៀតណាម ក៏បានលើកឡើងពីការត្រៀមរៀបចំកិច្ចប្រជុំរបស់ «ក្រុមសភានិយាយភាសាបារំាង APF» ដែលគ្រោងនឹងធ្វើឡើងនៅ ខែមករា ឆ្នាំ២០២៥ ខាងមុខនេះផងដែរ។
ក្នុងឱកាសនោះ លោកបណ្ឌិត សម តារា បានធ្វើបទអន្តរាគមន៍លើប្រធានបទស្តីអំពី «តួនាទីសភាពាក់ព័ន្ធនឹងសន្តិសុខនុយក្លេអ៊ែរ» ដោយលោកបានលើកឡើងពីបញ្ហាប្រឈមនៃការគំរាមកំហែងឥទ្ធិពលនុយក្លេអ៊ែរ ប៉ះពាល់មកលើពិភពលោក។ លោកបណ្ឌិត បានគូសបញ្ជាក់ពីកិច្ចខិតខំប្រឹងប្រែង និងតួនាទីសំខាន់របស់សមាជិកសភា ក្នុងការអនុម័តច្បាប់ ហើយប្រមុខរាជរដ្ឋាភិបាលកម្ពុជា ក៏បានចុះហត្ថលេខា ផ្តល់សច្ចាប័នលើលិខិតូបករណ៍/ច្បាប់អន្តរជាតិ និងអនុសញ្ញាអន្តរជាតិជាច្រើន ដើម្បីគាំទ្រយ៉ាងពេញទំហឹង ហាមឃាត់ការប្រើប្រាស់អាវុធនុយក្លេអ៊ែរ និងអាវុធប្រល័យលោក ដើម្បីចូលរួមក្នុងការធានាបានសុវត្ថិភាព សន្តិសុខ និងការការពារប្រជាពលរដ្ឋទាំងក្នុងតំបន់ និងពិភពលោក៕
