(ស្វាយរៀង)៖ លោកស្រី កែ រ៉ាវី ជាអ្នកប្រកបរបរបោកខោអាវ និងលាងចានឲ្យគេ នៅភូមិជប់ ឃុំកណ្តៀងរាយ ស្រុកស្វាយទាប ខេត្តស្វាយរៀង បានស្នើដល់ក្រសួងសង្គមកិច្ច អតីតយុទ្ធជន និងយុវនីតិសម្បទា ជួយយកកុមារម្នាក់ ដែលមិនគ្រប់លក្ខណៈទៅថែរក្សា។

លោកស្រី កែ រ៉ាវី បានលើកឡើងថា លោកស្រីបានចាញ់បោកគេ ក្នុងការទទួលមើលកុមារម្នាក់នេះ ពេលគ្នាមានអាយុប្រមាណ ៧ខែ ក្នុងតម្លៃ ៥០ដុល្លារ/ខែ។ លោកស្រី បានដាក់ការសន្និដ្ឋានថា ប្រហែលជាក្រោយពេលអ្នកបង្កើតដឹងថាកូនមានបុគ្គលិកលក្ខណៈមិនគ្រប់គ្រាន់ ក៏យកទៅបោះបង់ ដោយធ្វើជាឲ្យលោកស្រីចិញ្ចឹម។

ក្នុងកិច្ចសម្ភាសជាមួយនិពន្ធនាយករងព័ត៌មាន Fresh News ដែលបានចុះដល់មូលដ្ឋានផ្ទាល់ លោកស្រី កែ រ៉ាវី បានបន្តថា លោកស្រីធ្លាប់ទាក់ទងតាមទូរសព្ទឲ្យអ្នកបង្កើតមកយកកូនវិញ ប៉ុន្តែអ្នកបង្កើតអះអាងថា លែងទទួលយកហើយ។ លោកស្រី បានថ្លែងថា ខ្លួនពុំមានលទ្ធភាពមើលថែកុមារម្នាក់នេះទៀតនោះទេ ហើយឥលូវនេះ កុមារមានអាយុប្រមាណ ៦ឆ្នាំហើយ។

លោកស្រី ថោ ពៅ ប្រធានមជ្ឈមណ្ឌលទារក និងកុមារជាតិ នៃក្រសួងសង្គមកិច្ច អតីតយុទ្ធជន និងយុវនីតិសម្បទា នៅថ្ងៃទី១៦ ខែតុលា ឆ្នាំ២០២៤ បានប្រាប់បណ្តាញព័ត៌មាន Fresh News ថា អាចទទួលយកកុមាររូបនេះបាន ក្នុងករណីមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តស្វាយរៀង វាយតម្លៃរួចហើយ។

សូមជម្រាបថា លោកស្រី កែ រ៉ាវី គឺជាអ្នកតំណាងគ្រួសារ១ ក្នុងចំណោម ១០គ្រួសារផ្សេងទៀត ដែលទទួលបានអំណោយពីប្រធានក្រុមការងាររាជរដ្ឋាភិបាល ចុះជួយស្រុកស្វាយទាប នៅថ្ងៃទី១០ ខែតុលា ឆ្នាំ២០២៤ ក្នុងឱកាសចុះសួរសុខទុក្ខ និងចែកអំណោយដល់អ្នកកម្សត់ខ្សត់ខ្សោយ ក្នុងភូមិកណ្តៀងរាយ ឃុំកណ្តៀងរាយ៕