(កំពង់ធំ)៖ លោក ដៀប ពីរី ប្រធានក្រុមប្រឹក្សាខេត្ត និងលោក នួន ផារ័ត្ន អភិបាលខេត្តកំពង់ធំ នៅថ្ងៃទី១ ខែវិច្ឆិកា ឆ្នាំ២០២៤ បានអញ្ជើញជាអធិបតីភាព បិទវេទិកាថ្នាក់ខេត្ត ស្ដីពីកំណែទម្រង់វិមជ្ឈការ និងវិសហមជ្ឈការ។
ថ្លែងក្នុងពិធីបិទវេទកា លោក នួន ផារ័ត្ន បានឱ្យដឹងថា ក្រោយពីដំណើការអង្គវេទិការយៈពេលមួយថ្ងៃកន្លះមកនេះទទួលបានលទ្ធផល ជាផ្លែផ្កាគួរជាទីមោទន តាមផែនការ របៀបវារៈដែលបានគ្រោងទុក។ តាមរយៈការធ្វើបទ បង្ហាញលើប្រធានបទសំខាន់ៗ ដែលបានលើកឡើងដោយរដ្ឋបាលឃុំ-សង្កាត់ ក្រុង-ស្រុក មន្ទីរ-អង្គភាពនានាជុំវិញខេត្ត អង្គការសង្គមស៊ីវិលដែលប្រតិបត្តិការក្នុងខេត្ត សមាគមប្រឹក្សាថ្នាក់ក្រោមជាតិ បានបង្ហាញឱ្យយើងឃើញថា អង្គភាពពាក់ព័ន្ធនៅរដ្ឋបាលថ្នាក់ក្រោមជាតិ នៃខេត្តកំពង់ធំ មានការយល់ដឹងស៊ីជម្រៅអំពីដំណើរការ និងសារៈសំខាន់នៃការងារកំណែទម្រង់វិមជ្ឈការ និងវិសហមជ្ឈការនៅ ថ្នាក់ក្រោមជាតិ។
លោក នួន ផារ័ត្ន បានបន្តថា ផ្អែកតាមលទ្ធផលនៃកិច្ចប្រជុំថ្នាក់ឃុំសង្កាត់ និងកិច្ចប្រជុំថ្នាក់ក្រុង ស្រុក និងរដ្ឋបាលខេត្ត តាមរយៈក្រុមការងារបច្ចេកទេសថ្នាក់ខេត្ត យើងទទួលបានសំណើ សំណូមពរ និងបញ្ហាប្រឈមមួយ ចំនួនដូចជា៖ ថ្នាក់ឃុំ សង្កាត់ចំនួន១០ បញ្ហាប្រឈម ថ្នាក់ក្រុង ស្រុក ចំនួន១៣ បញ្ហាប្រឈម និងថ្នាក់ខេត្តចំនួន១១ បញ្ហាប្រឈមចំនួន ៣៤បញ្ហាប្រឈម។ បញ្ហាប្រឈមទាំង៣៤ របស់រដ្ឋបាលគ្រប់ថ្នាក់នៃខេត្តកំពង់ធំត្រូវ បានដាក់ជូនពិភាក្សា រកដំណោះស្រាយ ក្នុងអង្គវេទិកាមានការចូលរួមយ៉ាងផុលផុសពីសមាជិក សមាជិកា។
ជាលទ្ធផល រដ្ឋបាលខេត្តទទួលបានបញ្ហាប្រឈមដែលស្នើសុំដោះស្រាយនៅថ្នាក់ខេត្ត និងស្នើទៅថ្នាក់ជាតិមានដូចខាងក្រោម៖
*សម្រាប់រដ្ឋបាលឃុំ-សង្កាត់ ដោះស្រាយដោយ រដ្ឋបាលខេត្ត ចំនួន ៧បញ្ហា ស្នើទៅថ្នាក់ជាតិចំនួន៥ បញ្ហាប្រឈម។
*សម្រាប់រដ្ឋបាលក្រុង ស្រុក ដោះស្រាយដោយ រដ្ឋបាលខេត្ត មាន ៦បញ្ហា និងស្នើទៅថ្នាក់ជាតិចំនួន១១ បញ្ហាប្រឈម។
*សម្រាប់រដ្ឋបាលខេត្ត ដោះស្រាយកម្រិតរដ្ឋបាលខេត្ត ចំនួន ៣បញ្ហាប្រឈម និងស្នើទៅថ្នាក់ជាតិចំនួន ១០បញ្ហាប្រឈម។ ចំពោះបញ្ហាដែលនៅសេះសល់ រដ្ឋបាលខេត្តកំពង់ធំបានស្នើសុំទៅថ្នាក់ជាតិដើម្បីជួយដោះស្រាយបន្ត៕
