(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានជំរុញឱ្យអ្នកឧកញ៉ា ម៉ុង ឬទ្ធី ដែលជាអ្នកជំនួញល្បីឈ្មោះ ក្នុងវិស័យកសិកម្ម ផលិតជីសរីរាង្គ ដើម្បីលក់ចែកជូនប្រជាកសិករ ក្នុងតម្លៃទាបជាងជីនាំចូលមកពីបរទេស។ នេះយោងតាមការលើកឡើងរបស់ អ្នកឧកញ៉ា ម៉ុង ឬទ្ធី នាព្រឹកថ្ងៃទី០១ ខែវិច្ឆិកា ឆ្នាំ២០២៤នេះ បន្ទាប់ពីលោកបានទទួលទានអាហារពេលព្រឹក ជាមួយសម្តេចមហាបវរធិបតី ហ៊ុន ម៉ាណែត។
អ្នកឧកញ៉ា ម៉ុង ឬទ្ធី បានឱ្យដឹងថា «ថ្ងៃសុក្រ ១កើត ខែកត្តិក ឆ្នាំរោង ឆស័ក ពុទ្ធសករាជ ២៥៦៨ត្រូវនឹងថ្ងៃទី១ ខែវិច្ឆិកា ឆ្នាំ២០២៤ វេលាម៉ោង៨ព្រឹក សម្តេចមហាបវរធិបតី បានផ្តល់កិត្តិយសដ៏មហាខ្ពង់ខ្ពស់បំផុត ពិសារអាហារពេលព្រឹកពិភាក្សាលើវិស័យផលិតជីសរីរាង្គ (ជីធម្មជាតិ) ដើម្បីលក់ចែកជូនប្រជាកសិករយើង ក្នុងតម្លៃទាបជាងជីនាំចូលមកពីបរទេស»។
ទន្ទឹមគ្នានេះ សម្តេចមហាបវរធិបតី ហ៊ុន ម៉ាណែត ថែមទាំងបានជំរុញ និងលើកទឹកចិត្តដល់អ្នកឧកញ៉ាពង្រីកវិស័យទេសចរណ៍ធម្មជាតិ ឱ្យកាន់តែច្រើនបន្ថែមទៀត ។
អ្នកឧកញ៉ា ម៉ុង ឬទ្ធី បានលើកឡើងបន្ថែមថា ក្រោយពីបានជួបពិភាក្សារយៈពេលមួយម៉ោងដប់ប្រាំនាទីរួចមក លោកមានការកោតសរសើរ និងវាយតម្លៃខ្ពស់បំផុត ចំពោះសម្តេចធិបតីឈ្លាសវៃដ៏ខ្ពង់ខ្ពស់បំផុត ស្ទើរតែគ្រប់ពាក្យទាំងអស់ សម្តេចគិតគូរតែពីផលប្រយោជន៍ជាតិ និងប្រជាជន។
ឆ្លើយតបនឹងការជំរុញរបស់ សម្តេចមហាបវរធិបតី ហ៊ុន ម៉ាណែត អ្នកឧកញ៉ា ម៉ុង ឬទ្ធី បានប្តេជ្ញាថានឹងខិតខំប្រឹងប្រែង រកគ្រប់មធ្យោបាយ ដើម្បីអនុវត្តឱ្យបានតាមអនុសាសន៍របស់សម្តេច ដើម្បីបានចូលរួមចំណែកបម្រើជាតិប្រជាជន លើវិស័យកសិកម្ម កសិ-ឧស្សាហកម្ម និងទេសចរណ៍ធម្មជាតិនេះ។
អ្នកឧកញ៉ា ម៉ុង ឬទ្ធី ត្រូវបានគេទទួលស្គាល់ថាជាសេដ្ឋីកសិកម្មដ៏ល្បីល្បាញមួយរូបនៅកម្ពុជា ហើយនៅឆ្នាំ២០២៤នេះ លោកបានសាងសង់ផ្លូវរត់ឡូរីមួយខ្សែ ប្រើប្រាស់ថាមពលកកើតឡើងវិញប្រវែងជិត១០គីឡូម៉ែត្រ នៅក្នុងតំបន់កសិទេសចរណ៍ ម៉ុង ឫទ្ធី សែនជ័យ ស្ថិតក្នុងស្រុកសំរោងទង ខេត្តកំពង់ស្ពឺ ដើម្បីចូលរួមលើកកម្ពស់វិស័យទេសចរណ៍ក្នុងស្រុក។
ផ្លូវរត់ឡូរីនេះមានប្រវែងសរុប៩២០០ម៉ែត្រ ដោយបានបើកការដ្ឋានសាងសង់កាល់ពីអំឡុងខែមករា ឆ្នាំ២០២៤ និងបានសម្ពោធដាក់ឱ្យដំណើរការនៅកាលពីខែកក្កដា ឆ្នាំ២០២៤។ នៅក្នុងគម្រោងនេះមានស្ថានីយសម្រាប់អ្នកដំណើរឡើងជិះឡូរីចំនួនពីរកន្លែង មានរូងក្រោមដី៣កន្លែង និងមានឡូរីសរុបចំនួន៣០គ្រឿង ដោយប្រើថាមពលអាគុយ៕
