(ភ្នំពេញ)៖ លោក វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី នៅព្រឹកថ្ងៃទី២១ ខែវិច្ឆិកា ឆ្នាំ២០២៤នេះ បានអនុញ្ញាតឱ្យលោក Taniguchi Kentaro ប្រធានក្រុមហ៊ុន Mirarth Holdings, Inc. ដែលជាក្រុមហ៊ុនជប៉ុន ចូលជួបសម្តែងការគួរសម និងជម្រាបជូនអំពីវឌ្ឍនភាពនៃគម្រោងវិនិយោគកែច្នៃគ្រាប់ស្វាយចន្ទីរបស់ក្រុមហ៊ុននៅក្នុងខេត្តកំពង់ធំ។
នាឱកាសនោះលោក Taniguchi Kentaro បានថ្លែងអំណរគុណយ៉ាងជ្រាលជ្រៅជូនចំពោះ លោកឧបនាយករដ្ឋមន្ត្រីប្រចាំការ ដែលបានលើកទឹកចិត្តដល់ក្រុមហ៊ុន និងឆ្លៀតពេលដ៏មានតម្លៃទទួលជួបរូបលោក និងគណៈប្រតិភូក្រុមហ៊ុនសារជាថ្មីម្តង។
លោក Taniguchi Kentaro បានជម្រាបជូនថា បច្ចុប្បន្ន ក្រុមហ៊ុន Mirarth Holdings Inc. មានសមត្ថភាពកែច្នៃគ្រប់ស្វាយចន្ទី ១៥០០តោន ក្នុងមួយឆ្នាំ និងអាចឡើងដល់ប្រមាណ ៣០០០តោន នៅដើមឆ្នាំ២០២៥ ហើយក្រុមហ៊ុននឹងបន្តពង្រីកផលិតកម្មរបស់ខ្លួនរហូតដល់ប្រមាណ ២៥ ០០០ តោន ក្នុងរយៈពេល ៣ ទៅ ៤ ឆ្នាំទៀត។
ជាមួយគ្នានេះ ក្រុមហ៊ុនបានចាប់ដៃគូជាមួយក្រុមហ៊ុនមួយនៅប្រទេសហូឡង់ដ៍ ហើយគ្រោងនឹងនាំចេញគ្រាប់ស្វាយចន្ទីប្រមាណ ២៥០តោន ទៅកាន់ទីផ្សារអ៊ឺរ៉ុបក្នុងពេលខាងមុខនេះ។ ក្រុមហ៊ុនក៏មានគម្រោងពង្រីកសកម្មភាពកែច្នៃគ្រាប់និងកសិផលស្វាយចន្ទីផងដែរ ដូចជាការកែច្នៃធ្វើជាប្រេង គ្រឿងសម្អាង និងផលិតថាមពលជីវម៉ាស(Biomass) ដែលសុទ្ធសឹងជាផលិតផលដែលមានតម្លៃបន្ថែមខ្ពស់។
នាឱកាសនោះដែរលកឧបនាយករដ្ឋមន្ត្រីប្រចាំការ វង្សី វិស្សុត បានបង្ហាញនូវក្តីរីករាយ និងអបអរសាទរចំពោះវឌ្ឍនភាព និងការរីកចម្រើនជាបន្តបន្ទាប់របស់ក្រុមហ៊ុន Mirarth Holdings Inc. និងបានវាយតម្លៃខ្ពស់ចំពោះការសម្រេចចិត្តរបស់ក្រុមហ៊ុន ក្នុងការវិនិយោគកែច្នៃគ្រប់ស្វាយចន្ទី ក្នុងខេត្តកំពង់ធំ។ គម្រោងវិនិយោគនេះបាននិងកំពុងចូលរួមចំណែកជំរុញសន្ទុះនៃការរីកលូតលាស់នៃវិស័យដំណាំស្វាយចន្ទីរបស់កម្ពុជា និងការបង្កើតការងារ ពិសេសបាននាំមកនូវចំណេះដឹង ជំនាញ បទពិសោធ និងបច្ចេកវិទ្យាចាំបាច់ ក្នុងការបង្កើនផលិតកម្មស្វាយចន្ទី ដូចជាការប្រើប្រាស់បច្ចេកវិទ្យា AI ក្នុងការដាំដុះជាដើម។
លោកឧបនាយករដ្ឋមន្ត្រីប្រចាំការ ក៏បានគូសរំលេចនូវចក្ខុវិស័យរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងការប្រែក្លាយកម្ពុជាទៅជាប្រទេសដែលនាំចេញគ្រាប់ស្វាយចន្ទីច្រើនជាងគេលើពិភពលោក ឬអធិរាជស្វាយចន្ទី តាមរយៈការលើកកម្ពស់ការផលិតនិងការកែច្នៃគ្រាប់ស្វាយចន្ទី និងផែនការសំខាន់ៗរបស់រាជរដ្ឋាភិបាល ក្នុងការអភិវឌ្ឍវិស័យស្វាយចន្ទី ដែលត្រូវបានគូសវាសដោយសម្តេចមហាបវរធិបតី ផ្ទាល់ ប្រកបដោយការយកចិត្តទុកដាក់ខ្ពស់ និងភាពគ្រប់ជ្រុងជ្រោយ នៅក្នុងខ្សែចង្វាក់តម្លៃនៃដំណាំស្វាយចន្ទីទាំងមូល។
ជាមួយគ្នានេះលោកឧបនាយករដ្ឋមន្ត្រីប្រចាំការ វង្សី វិស្សុត ក៏បានបង្ហាញនូវការគាំទ្រចំពោះក្រុមហ៊ុនដែលមានគម្រោងធ្វើពិពិធកម្មសកម្មភាពកែច្នៃស្វាយចន្ទី សំដៅផលិតនូវផលិតផលមានតម្លៃបន្ថែមកាន់តែខ្ពស់ និងមានប្រយោជន៍សម្រាប់សង្គម-សេដ្ឋកិច្ចកម្ពុជា និងឆន្ទៈចូលរួមក្នុងកិច្ចការសង្គមរបស់ក្រុមហ៊ុននៅក្នុងខេត្តកំពង់ធំ។ ឯកឧត្តម វង្សី វិស្សុត ក៏បានលើកទឹកចិត្តដល់ក្រុមហ៊ុនក្នុងការចុះកិច្ចសន្យាទទួលទិញគ្រាប់ស្វាយចន្ទី (contract farming) ផងដែរ។
លោកឧបនាយករដ្ឋមន្ត្រីប្រចាំការ បានជូនពរឱ្យក្រុមហ៊ុនបន្តទទួលបាននូវភាពជោគជ័យ និងបានបញ្ជាក់នូវជំហរគាំទ្ររបស់ទីស្តីការគណៈរដ្ឋមន្ត្រីនិងផ្តល់កិច្ចសហការ ដើម្បីចូលរួមគាំទ្រដល់ការវិនិយោគនៅក្នុងក្របខ័ណ្ឌនៃតួនាទីភារកិច្ចរបស់ខ្លួន៕
