(ភ្នំពេញ)៖ នៅព្រឹកថ្ងៃព្រហស្បតិ៍ ទី២១ ខែវិច្ឆិកា ឆ្នាំ២០២៤នេះ លោក ឌី វិជ្ជា និងលោកជំទាវ ហ៊ុន ម៉ាណា បានអញ្ជើញជួបសំណេះសំណាល សួរសុខទុក្ខ និងផ្ដល់អំណោយដល់អ្នកបោសសំអាត អនាម័យទីសាធារណៈ ក្នុងទីក្រុងភ្នំពេញ ចំនួន ១,១៥០នាក់ ដែលពួកគាត់បានចូលរួមបោសសម្អាត ធ្វើអនាម័យតាមទីសាធារណៈ ក្នុងទីក្រុងភ្នំពេញកំឡុងពេល និងក្រោយព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុករយៈពេល៣ថ្ងៃ កន្លងមកនេះ (១៤-១៥-១៦ វិច្ឆិកា ឆ្នាំ២០២៤)។
សមាសភាពអ្នកអនាម័យទាំងអស់មកពី៖
១៖ កម្លាំងបោសសំអាត ក្រោមការគ្រប់គ្រងរបស់មន្ទីរសាធារណៈការ និងដឹកជញ្ជូនរាជធានីភ្នំពេញ មានចំនួន ៣៧៣នាក់ ដែលជាមន្ត្រីជាប់កិច្ចសន្យា។
២៖ កម្លាំងបោសសំអាត ក្រោមការគ្រប់គ្រងរបស់ក្រុមហ៊នឯកជនមានចំនួន ៧៤៣នាក់ ក្នងនោះមានក្រុមហ៊ុន 800 Super ចំនួន ៦៤នាក់ , ក្រុមហ៊ុនមីហ្សូដា សានីថេសិន ចំនួន ៥៦២នាក់, ក្រុមហ៊ុនសុិនទ្រីចំនួន ១១៦នាក់។
នៅក្នុងឱកាសនោះ លោក ឌី វិជ្ជា និងលោកស្រី ហ៊ុន ម៉ាណា បានសំណេះសំណាល ដោយពាំនាំការផ្ដាំផ្ញើសួរសុខទុក្ខ ពីសម្ដេចតេជោ ហ៊ុនសែន និងសម្ដេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន, សម្ដេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ដល់អ្នកអនាម័យទាំងអស់ដែលបានខិតខំបំពេញការងារបានយ៉ាងល្អ ជាពិសេសក្នុងការបោសសំអាត អនាម័យតាមផ្លូវសាធារណៈ ក្នុងទីក្រុងភ្នំពេញ កំឡុងពេល និងក្រោយការប្រារពព្រះរាជពិធីបុណ្យអុំទូក ដើម្បីឱ្យបរិស្ថានទីក្រុងមានភាពស្រស់ស្អាត។
នៅក្នុងឱកាសនោះ លោក និងលោកស្រី ក៏បានផ្ដល់ជូនអំណោយដល់បងប្អូនដែលបានចូលរួមទាំងអស់ ដោយក្នុងម្នាក់ៗទទួលបានមីជាតិ ១កេស, ត្រីខ ១យួរ, នំស្រួយលីលី, ទឹកដោះគោខាប់ ៣កំប៉ុង, ភេសជ្ជៈប៉ូវកម្លាំងគ្រុឌ ៣កំប៉ុង, ភួយ១, សាប៊ូ១ដុំ, ប្រេងខ្យល់១ដប, ប្រេងកូឡា១ដប និងថវិកា២០ម៉ឺនរៀល៕
